ଗିରଫ ହେଲେ ଖାଉ ବାବୁ

ଭୁୁବନେଶ୍ୱର: ନବରଙ୍ଗପୁର ଅତିରିକ୍ତ ଉପଜିଲ୍ଲାପାଳ ପ୍ରଶାନ୍ତ କୁମାର ରାଉତଙ୍କୁ ନେଇ ଏବେ ସବୁଆଡ଼େ ଚର୍ଚ୍ଚା । ତାଙ୍କ ଘରୁ ଠାବ ହୋଇଥିବା କୋଟି କୋଟି ନଗଦ ଟଙ୍କା ସମସ୍ତଙ୍କୁ ଚକିତ କରିଦେଇଛି । ଭୁବନେଶ୍ୱର ଓ ନବରଙ୍ଗପୁର ଘରୁ ୩ କୋଟିରୁ ଅଧିକ ଟଙ୍କା ଜବତ ହୋଇଛି । ଗଣ୍ଡା ଗଣ୍ଡା ପେଟିରେ ଥାକ ମରାହୋଇଥିବା ଏହି ଟଙ୍କାକୁ ବାବୁ ପଡୋଶୀ ଘର ଛାତକୁ ଫିଙ୍ଗି ଭିଜିଲାନସ୍ ଆଖିରୁ ଖସିଯିବାକୁ ଉଦ୍ୟମ କରିଥିଲେ । ମାତ୍ର ତାହା ସମ୍ଭବ ହୋଇନାହିଁ ।

ଏହି ବାବୁଙ୍କର ଭୁବନେଶ୍ୱର ଓ ନବରଙ୍ଗପୁର ଘରୁ ୩ କୋଟି ୩ ଲକ୍ଷ ନଗଦ ଟଙ୍କା ଜବତ ହୋଇଥିବା ବେଳେ ଦୁଇଟି ବେନାମୀ ବ୍ୟାଙ୍କ ଆକାଉଣ୍ଟରେ ୩୮ ଲକ୍ଷ ୬୪ ହଜାର ଟଙ୍କା ଅଛି । ଏହି ଦୁଇଟିକୁ ମିଶାଇ ତାଙ୍କର ୯୨ ଲକ୍ଷ ୩୪ ହଜାର ଟଙ୍କା ବ୍ୟାଙ୍କ ଜମା ଥିବା ବେଳେ ଦୁଇ ପିଲାଙ୍କ ପାଠପଢ଼ା ବାବଦରେ ୮୭ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି । ଏହାଛଡ଼ା ଘରୁ ଅଧଡର୍ଜନ ବେନାମୀ ବ୍ୟାଙ୍କ ଆକାଉଣ୍ଟ, ଏଟିଏମ୍ କାର୍ଡ, ଜମିବାଡ଼ି କାଗଜପତ୍ର ଜବତ କରାଯାଇଛି । ଏସବୁର ଆକଳନ ଜାରି ରହିଛି ।

ବାବୁଙ୍କର ଭୁବନେଶ୍ୱର କାନନବିହାରରେ ବିରାଟ ଅଟ୍ଟାଳିକା ଅଛି । ଏହାର ମୂଲ୍ୟ କୋଟିଏରୁ ଅଧିକ ହେବ । ଏହାଛଡ଼ା ଭୁବନେଶ୍ୱର, କଟକରେ ୪ ଟି ପ୍ଲଟ୍ ଏବଂ ଉମରକୋଟରେ ଗୋଟିଏ ପ୍ଲଟ୍ ଏ ପର୍ଯ୍ୟନ୍ତ ଠାବ କରାଯାଇଛି । ପାଖାପାଖି ୫୦ ଲକ୍ଷ ମୂଲ୍ୟର ଦୁଇଟି ଦାମୀ କାର୍ ଚଢ଼ୁଛନ୍ତି । ସେଥିରୁ ଇନୋଭା କାର୍ ଟି ର କାଗଜପତ୍ର ଠିକ୍ ନାହିଁ । ଟଙ୍କା ନେବା ଆଣିବାରେ ବାବୁ ଏହାକୁ ବ୍ୟବହାର କରୁଥିଲେ ବୋଲି ସନ୍ଦେହ କରାଯାଉଛି । ପ୍ରାୟ ୨୮ ଲକ୍ଷ ମୂଲ୍ୟର ଆସବାବପତ୍ର ଓ ସୁନା ଅଳଙ୍କାର ରଖିଛନ୍ତି ।

ବାବୁଙ୍କର ଚାକିରି ଜାଗା ନବରଙ୍ଗପୁର, ଅୟସ ଜାଗା ଭୁବନେଶ୍ୱର ଏବଂ ଜନ୍ମମାଟି ଭଦ୍ରକର ମୋଟ ୯ଟି ଜାଗାରେ ଭିଜିଲାନସ୍ ଟିମ୍ ଚଢ଼ଉ କରି ଏହି ଅମାପ ସମ୍ପତ୍ତିର ସନ୍ଧାନ ପାଇଛି । ଭିଜିଲାନସ୍ ର ଆକଳନ କହୁଛି, ପ୍ରଶାନ୍ତ ରାଉତଙ୍କର ଆୟ ବହିର୍ଭୂତ ସମ୍ପତ୍ତି ପରିମାଣ ୫ କୋଟି ୨୧ ଲକ୍ଷ ୯ ହଜାର ୬୫୯ ଟଙ୍କା । ଏହା ତାଙ୍କ ଉଚିତ୍ ଆୟର ୫୦୬% ଅଧିକ । ଆଜି ଏହି ଦୁର୍ନୀତିଗ୍ରସ୍ତ ବାବୁଙ୍କୁ ଭିଜିଲାନସ୍ ଗିରଫ କରିଛି ।

ଏହି ମହାଶୟଙ୍କ ପାଇଁ ଗିରଫ ନୂଆ ଅନୁଭବ ନୁହେଁ । ୫ ବର୍ଷ ତଳେ ସୁନ୍ଦରଗଡ଼ ଜିଲ୍ଲା ବିଶ୍ରା ବ୍ଲକ୍ ବିଡିଓ ଥିବା ବେଳେ ଜଣଙ୍କଠାରୁ ୧ ଲକ୍ଷ ଲାଞ୍ଚ ନେଲାବେଳେ ଭିଜିଲାନସ୍ ହାତରେ ଧରାପଡ଼ିଥିଲେ । ଏହି ମାମଲାରେ ଗିରଫ ହୋଇ ଚାକିରିରୁ ନିଲମ୍ବିତ ହୋଇଥିଲେ । ତେବେ ନିଲମ୍ବନ ହଟିବା ପରେ ନବରଙ୍ଗପୁର ଅତିରିକ୍ତ ଜିଲ୍ଲାପାଳ ଭାବେ ସେ ଅବସ୍ଥାପିତ ହୋଇଥିଲେ ।

ସେତେବେଳେ ଲାଞ୍ଚ ମାମଲାରେ ଗିରଫ ହୋଇ ଚାକିରିରୁ ନିଲମ୍ବିତ ହୋଇଥିବା ଏହି ଅଧିକାରୀଙ୍କୁ ପରବର୍ତ୍ତୀ ସମୟରେ କିଭଳି ପଦୋନ୍ନତି ମିଳିଲା ବୋଲି ଏବେ ପ୍ରଶ୍ନ ଉଠୁଛି । ଜଣେ ଭିଜିଲାନସ୍ ଅଧିକାରୀଙ୍କ ସୂଚନା ଅନୁଯାୟୀ, ତତ୍କାଳୀନ ବିଡିଓ ପ୍ରଶାନ୍ତ ରାଉତଙ୍କ ବିରୋଧରେ ଲାଞ୍ଚ ମାମଲା ରୁଜୁ ହୋଇଥିଲେ ମଧ୍ୟ ରାଜ୍ୟ ସରକାରଙ୍କଠାରୁ “ପ୍ରୋସିକ୍ୟୁସନ୍ ସାଙ୍କସନ୍’ ମିଳି ନ ଥିଲା । ଫଳରେ ଚାର୍ଜସିଟ୍ ଦାଖଲ ହୋଇପାରିଲା ନାହିଁ । ସେ ଏହି ମାମଲାରୁ ଖସିଗଲେ । ତାଙ୍କର ଏହି ପ୍ରଭାବ ତାଙ୍କୁ ପୁଣି ଭଲ ଜାଗାକୁ ନେଇଗଲା । ତେବେ ଏହା କେତେ ସତ୍ୟ ସ୍ପଷ୍ଟ ହୋଇନାହିଁ ।

କେବଳ ଏହି ନିର୍ଦ୍ଦିଷ୍ଟ ମାମଲା ନୁହେଁ, ରାଜ୍ୟ ସରକାରଙ୍କ ‘ପ୍ରୋସିକ୍ୟୁସନ୍ ସାଙ୍କସନ୍’ ପ୍ରାବଧାନକୁ ଆଇନର ଗଳାବାଟ ବୋଲି ଅସାଧୁ କର୍ମଚାରୀମାନେ ଧରି ନେଇଥିବାରୁ ଏଭଳି ଅବସ୍ଥା ହେଉଛି । ଏହି ଗଳାବାଟ ବନ୍ଦ ହେଲେ ଯାଇ ଦୁର୍ନୀତିଗ୍ରସ୍ତ ଅଧିକାରୀ ସାବାଡ଼ ହେବେ ବୋଲି ସଂପୃକ୍ତ ଭିଜିଲାନସ୍ ଅଧିକାରୀ କହିଛନ୍ତି ।

ଦୁର୍ନୀତିଗ୍ରସ୍ତ ସରକାରୀ କର୍ମଚାରୀଙ୍କ ଉପରେ ଜନସାଧାରଣଙ୍କ ଅଙ୍କୁଶ ନ ରହିବା ବି ଏଭଳି ଅବସ୍ଥାକୁ ନିୟନ୍ତ୍ରଣ କରୁଛି । ଜନସାଧାରଣ ସଚେତନ ହେଲେ ଲାଞ୍ଚୁଆ ଅଫିସର ଲାଞ୍ଚ ନେବାକୁ ଭୟ କରନ୍ତେ ବୋଲି କିଛି ମହଲ ମତ ଦେଉଛନ୍ତି । ଯାହା ବି ହେଉ, ନବରଙ୍ଗପୁରରେ ଅତିରିକ୍ତ ଉପଜିଲ୍ଲାପାଳଙ୍କ ଘରେ ଭିଜିଲାନସ୍ ରେଡ୍ ଏବଂ ଗିରଫ ଖବର ଜାଣିବା ପରେ ସ୍ଥାନୀୟ ବାସିନ୍ଦା ବାଣଫୁଟାଇ ଖୁସି ମନାଉଛନ୍ତି । ଜଣେ ଦୁର୍ନୀତିଗ୍ରସ୍ତ କର୍ମଚାରୀଙ୍କ ପାଇଁ ଏହାଠାରୁ ବଳି ଲଜ୍ଜା ଓ ଅପମାନର ବିଷୟ କିଛି ନାହିଁ । ଅବଶ୍ୟ ପ୍ରଶାନ୍ତ ରାଉତଙ୍କ ଭଳି ଖାଉ ଅଫିସରଙ୍କ ଠାରୁ ଏହା ଆଶା କରିବା ମୂଖାର୍ମୀ ।