ଭୁବନେଶ୍ୱର: ଯାହା ଚର୍ଚ୍ଚା ହଉଥିଲା ସତ ହେଲା । ବିଜେପିକୁ ପଳେଇଲେ ବିଜେଡିର ନୂଆପଡ଼ା ଅଘୋଷିତ ପ୍ରାର୍ଥୀ ଜୟ ଢ଼ୋଲକିଆ । ଆଜି ଅପରାହ୍ନରେ ବିଜେପି ରାଜ୍ୟ କାର୍ଯ୍ୟାଳୟରେ ସଭାପତି ମନମୋହନ ସାମଲ, ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସମେତ ଦଳୀୟ ନେତୃବୃନ୍ଦଙ୍କ ଉପସ୍ଥିତିରେ ସେ ପଦ୍ମ ଧରିଛନ୍ତି । ବିଜେପି ପ୍ରାର୍ଥୀ ଭାବେ ସେ ନୂଆପଡ଼ା ଉପନିର୍ବାଚନ ଲଢ଼ିବେ । ଦଳ ପକ୍ଷରୁ ଖୁବ୍ ଶୀଘ୍ର ଏହାର ଘୋଷଣା ହେବ ।
ବିଜେଡିର ଦିବଙ୍ଗତ ବିଧାୟକ ରାଜେନ୍ଦ୍ର ଢ଼ୋଲକିଆଙ୍କ ପୁଅ ହେଉଛନ୍ତି ଜୟ । ବାପାଙ୍କ ଅନ୍ତେ ସେ ବିଜେଡିର ପ୍ରାର୍ଥୀ ବୋଲି ଦଳ ପକ୍ଷରୁ ଅଣ ଆନୁଷ୍ଠାନିକ ଘୋଷଣା ହୋଇସାରିଥିଲା । ନବୀନ ପଟ୍ଟନାୟକ ଦିଲ୍ଲୀରୁ ଫେରିବା ପରେ କେବଳ ଆନୁଷ୍ଠାନିକ ଘୋଷଣାକୁ ଅପେକ୍ଷା ଥିଲା । ଜୟଙ୍କ ପ୍ରାର୍ଥୀତ୍ୱକୁ ନେଇ ନୂଆପଡ଼ା ବିଜେଡି ଶିବିରରେ ପ୍ରବଳ ଉତ୍ସାହ ଖେଳିଥିଲା । ବିଜେଡି ପ୍ରାର୍ଥୀ ଭାବେ ଜୟ ଭୋଟ ପ୍ରଚାର ବି ଆରମ୍ଭ କରିଦେଇଥିଲେ । ବିଜେଡି ପ୍ରାର୍ଥୀଙ୍କୁ ଜିତାଇବା ପାଇଁ ଦଳ ପକ୍ଷରୁ ୬ ଜଣିଆ ଷ୍ଟିୟରିଂ କମିଟି, ୧୦ ଜଣିଆ ଜୋନାଲ୍ କମିଟି ଏବଂ ତିନି ଜଣିଆ ଲୋକାଲ୍ ଆକ୍ସନ୍ କମିଟି ଗଠନ ହୋଇଛି ।
ଇତିମଧ୍ୟରେ ଜୟ ଢ଼ୋଲକିଆଙ୍କ ଅଚାନକ ଦିଲ୍ଲୀ ଗସ୍ତ ରାଜନୈତିକ ମହଲରେ ଗୁଞ୍ଜରଣ ସୃଷ୍ଟି କରିଥିଲା । ତାଙ୍କର ଦିଲ୍ଲୀ ଗସ୍ତ ସମ୍ପର୍କରେ କେହି ଟେର୍ ପାଇ ନ ଥିଲେ । ଦିଲ୍ଲୀରେ ଅବସ୍ଥାନ କରୁଥିବା ନବୀନ ପଟ୍ଟନାୟକଙ୍କୁ ସେ ଭେଟିବାକୁ ଯାଇଛନ୍ତି ବୋଲି କିଛି ଲୋକ ଚର୍ଚ୍ଚା କରିଥିଲା ବେଳେ ବିଜେପିର ଦିଲ୍ଲୀ ନେତୃତ୍ୱଙ୍କ ସହ ତାଙ୍କର ଭେଟଘାଟ୍ ହୋଇଥିବା ମଧ୍ୟ ଚର୍ଚ୍ଚା ହେଲା । ନୂଆପଡ଼ା ଆସନ ବିଜେପି ହାତକୁ ଟେକି ଦେବାକୁ ବିଜେଡି ଡିଲ୍ କରିଛି ବୋଲି ମଧ୍ୟ ଚର୍ଚ୍ଚା ହେଲା ।
ଏହିସବୁ ଚର୍ଚ୍ଚା ଭିତରେ ଆଜି ସକାଳୁ ସୋସିଆଲ୍ ମିଡିଆରେ ଗୋଟିଏ ପୋଷ୍ଟ ଘୁରି ବୁଲିଥିଲା । ବିଜେପି ବ୍ୟାନରରେ ଜୟ ଢ଼ୋଲକିଆଙ୍କୁ ସ୍ୱାଗତ ଫଟୋ ଦେଖିବାକୁ ମିଳିଥିଲା । ଏଥିରୁ ସେ ଯେ ବିଜେପିରେ ଯୋଗଦେଉଛନ୍ତି ତାହାର ଆଭାସ ମିଳିଥିଲା । ବିଜେଡିର ବରିଷ୍ଠ ନେତା ଦେବୀ ମିଶ୍ର ଗଣମାଧ୍ୟମକୁ ପ୍ରତିକ୍ରିୟାରେ କହିଥିଲେ ଯେ ଗତକାଲି ରାତି ପର୍ଯ୍ୟନ୍ତ ଜୟ ସେମାନଙ୍କ ସହ ଯୋଗାଯୋଗରେ ଥିଲେ । ମାତ୍ର ଆଜି ସକାଳୁ ତାଙ୍କ ସହ ଯୋଗାଯୋଗ ହୋଇପାରୁନି । ବିଜେପି ତାଙ୍କୁ ହାଇଜାକ୍ କରିନେଇଛି ବୋଲି ସେ ସଙ୍କେତ ଦେଇଥିଲେ ।
ଏପଟେ ଜୟ ଢ଼ୋଲକିଆଙ୍କୁ ନେଇ ବିଜେପି ଶିବିର ଚଳଚଞ୍ଚଳ ହୋଇଥିଲା । ଭୁବନେଶ୍ୱର ବିଜେପି ଅଫିସରେ ମିଶ୍ରଣ ପର୍ବର ପ୍ରସ୍ତୁତି ଆରମ୍ଭ ହୋଇଥିଲା । ଦିନ ୨ଟା ବେଳେ ମିଶ୍ରଣ ପର୍ବ ପାଇଁ ଯୋଜନା ହୋଇଥିଲା । ମାତ୍ର ସେଥିରେ କେଁ ପଶିଥିଲା । ବରିଷ୍ଠ ନେତା ବସନ୍ତ ପଣ୍ଡାଙ୍କୁ ମନେଇବା କଷ୍ଟ ହୋଇପଡ଼ିଲା । କାରଣ ତାଙ୍କ ପୁଅ ଅଭିନନ୍ଦନ ପଣ୍ଡା ନୂଆପଡ଼ାରୁ ଦାବିଦାର ଥିବାରୁ ଜୟଙ୍କ ବିଜେପିରେ ମିଶିବାକୁ ସେ ଗ୍ରହଣ କରି ନ ଥିଲେ । ତେବେ ଦୀର୍ଘ ସମୟ ଧରି ଦଳୀୟ ନେତୃତ୍ୱ ତାଙ୍କୁ ବୁଝାଇବା ପରେ ସେ ଶାନ୍ତ ପଡ଼ିଥିଲେ । ମିଶ୍ରଣ ପର୍ବରେ ସଭାମଞ୍ଚ ମଣ୍ଡନ କରି ଜୟଙ୍କ ପ୍ରାର୍ଥୀତ୍ୱ ସହ ସହମତ ବୋଲି ଜଣାଇବାକୁ ବାଧ୍ୟ ହୋଇଥିଲେ ।
ଜୟଙ୍କୁ ବିଜେପି ଆଣିବାରେ ଉପକୂଳ ଅଞ୍ଚଳର ଜଣେ ଯୁବ ବିଧାୟକଙ୍କ ଭୂମିକା ଚର୍ଚ୍ଚାକୁ ଆସିଛି । ଏହା ବିଜେପିକୁ କେତେ ଫାଇଦା ଦେବ ତାହା ସମୟ କହିବ । ମାତ୍ର ବିଜେଡି ପାଇଁ ଏହା ଶକ୍ତ ଝଟକା ହୋଇଛି । ବିଜେଡି ଏବେ କାହାରିକୁ ପ୍ରାର୍ଥୀ କରିବ ତାହା ଉପରେ ସମସ୍ତଙ୍କ ନଜର ରହିଛି ।
