ଭୁବନେଶ୍ୱର: ଏପ୍ରିଲ୍ ୧୭ ତାରିଖ ବିଜୁ ବାବୁଙ୍କ ପୂଣ୍ୟତିଥିରେ ତଥାକଥିତ ବିଜୁ ଲିଗାସି ନେତାମାନଙ୍କ ଦ୍ୱାରା ଗଠନ ହୋଇଥିଲା ଓଡ଼ିଶା ନାଗରିକ ମଞ୍ଚ । ସେଦିନ ସଭାରେ ବିଜୁ ବାବୁଙ୍କ ସ୍ମୃତିଚାରଣ ସହ ନବୀନ ପଟ୍ଟନାୟକଙ୍କୁ ଭୀଷଣ ଗାଳି ପଡ଼ିଥିଲା । ବିଜୁ ବାବୁଙ୍କ ପୁଅ ନବୀନଙ୍କୁ ତଳେ ପକାଇ ନିଜକୁ ବିଜୁ ବାବୁଙ୍କର ଗୋଟାପଣ ବୋଲି ପ୍ରଚାର କରିଥିଲେ ଆତ୍ମଘୋଷିତ ବିଜୁ ଲିଗାସି ନେତା । ୪ ଦିନ ପରେ ଆଜି ସେଇ ଓଡ଼ିଶା ନାଗରିକ ମଞ୍ଚ ବ୍ୟାନର୍ ତଳେ ପାଳନ ହୋଇଛି ପୂର୍ବତନ ମୁଖ୍ୟମନ୍ତ୍ରୀ ସ୍ୱର୍ଗତ ଜାନକୀ ବଲ୍ଲଭ ପଟ୍ଟନାୟକଙ୍କର ଏକାଦଶ ପୂଣ୍ୟତିଥି ।
ସ୍ଥାନୀୟ ହୋଟେଲ ସ୍ୱସ୍ତି ପ୍ରମିୟମରେ ଆୟୋଜିତ ଶ୍ରଦ୍ଧାଞ୍ଜଳି ସଭାରେ ପୌରହିତ୍ୟ କରିଥିଲେ ଓଡ଼ିଶା ନାଗରିକ ମଞ୍ଚର ଅନ୍ୟତମ ଆବାହକ ବିଜୟ ମହାପାତ୍ର । ସେ ତାଙ୍କ ସ୍ମୃତିଚାରଣରେ ଜାନକୀ ବାବୁଙ୍କର ଏକ ରାଜନୈତିକ ଭବିଷ୍ୟତବାଣୀ ସମ୍ପର୍କରେ ଅନୁଭୂତି ବାଣ୍ଟିଥିଲେ । ନବୀନ ବାବୁଙ୍କୁ ନେଇ ବିଜେଡି ଗଠନ ନ କରିବାକୁ ଜାନକୀ ବାବୁ ସତର୍କ କରାଇଥିଲେ ବୋଲି ୩୦ ବର୍ଷ ତଳର ପୁରୁଣା କଥାକୁ ପ୍ରଥମ ଥର ପାଇଁ ଖୋଲି କହିଥିଲେ ବିଜୟ ।
ବିଜୟ କହିଥିଲେ-୧୯୯୭ ମସିହାରେ ବିଜେଡି ଗଠନ ସମ୍ପର୍କରେ ଆଲୋଚନା ଚାଲିଥାଏ । ଜାନକୀ ବାବୁ ମୁଖ୍ୟମନ୍ତ୍ରୀ ଥାନ୍ତି । ମୋ ସହ କଥା ହେବାକୁ ବନ୍ଧୁ ଅରୁଣ ଦେ’ଙ୍କ ହାତରେ ହଠାତ୍ ଖବର ପଠାଇଥିଲେ । ମାତ୍ର ମୁଁ ଗଲି ନାହିଁ । ବାରମ୍ବାର ସେ ଖବର ପଠାଇଲା ପରେ ମଧ୍ୟ ମୁଁ କଥା ହେବାକୁ ମନା କରିଥିଲି । ଫୋନ୍ ରେ ମୋ କଥା ହେବାକୁ ଚାହିଁଥିଲେ । ସେଥିରେ ମଧ୍ୟ ରାଜି ହୋଇ ନ ଥିଲି । ଶେଷରେ ଅରୁଣ ଦେ’ ଙ୍କୁ କହିଥିଲେ, ବିଜୟକୁ ଗୋଟେ କଥା କହିଦେବ ସେ ଦଳ ତିଆରି କରୁ । କିନ୍ତୁ ନିଜେ କରୁ । ଓଡ଼ିଶାର ନେତାମାନଙ୍କୁ ନେଇ କରୁ । ଯଦି ନବୀନ ବାବୁ ଆସିବେ, ବିଜୟର ବହୁତ କ୍ଷତି ହେବ ।
ଜାନକୀ ବାବୁଙ୍କର ଏହି ଭବିଷ୍ୟତବାଣୀ ସତ ହେଲା । ଯାହା ଏବେ ଇତିହାସ ବୋଲି କହିଥିଲେ ବିଜୟ ମହାପାତ୍ର । ପରବର୍ତ୍ତୀ ସମୟରେ ଜାନକୀ ବାବୁଙ୍କ ସହ ତାଙ୍କର ଘନିଷ୍ଠତା ବଢ଼ିଲା ପରେ ସେକଥା ମନେ ପକାଇ ବହୁ ସମୟ ଆଲୋଚନା କରିଥିବା ଥିବା ସେ କହିଥିଲେ ।
ଏହି କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ଯୋଗଦେଇ ବିଜୁ ଲିଗାସି ନେତା ପ୍ରଭାତ ତ୍ରିପାଠୀ ଓ ଅମର ଶତପଥୀ ଜାନକୀ ବାବୁଙ୍କର ସ୍ମୃତିଚାରଣ କରିଥିଲେ । ବିଜୁ ବାବୁଙ୍କ ଶ୍ରାଦ୍ଧରେ ଗଠିତ ଏଇ ବିଜୁ ଲିଗାସି ମଞ୍ଚ ପକ୍ଷରୁ ଆଜି ଜାନକୀ ବାବୁଙ୍କର ଶ୍ରାଦ୍ଧ ପାଳନକୁ ନେଇ କୌତୁହଳ ସୃଷ୍ଟି ହୋଇଛି । ଏ ସମ୍ପର୍କିତ ସାମ୍ବାଦିକଙ୍କ ପ୍ରଶ୍ନରେ ଏହାର ଅନ୍ୟତମ ଆବାହକ ତଥା ଜାନକୀ ବାବୁଙ୍କ ଜ୍ୱାଇଁ ସୌମ୍ୟରଂଜନ ପଟ୍ଟନାୟକ ଚିହିଁକି ଉଠିଥିଲେ । ଅର୍ଥକୁ ଅନର୍ଥ କରାଯାଉଥିବାରୁ ବିରକ୍ତ ହୋଇଥିଲେ । ଲିଗାସିର ଅର୍ଥ ଧନ ସମ୍ପତ୍ତିର ଉତ୍ତରାଧିକାରୀ ନୁହେଁ, ବିଚାରଧାରାକୁ ଆପଣାଇବା ବୋଲି ସେ ଦୋହରାଇଥିଲେ । ଏଥିସହ ଓଡ଼ିଶା ନାଗରିକ ମଞ୍ଚ ଏକ ରାଜନୈତିକ ସଂଗଠନ ନୁହେଁ ବୋଲି ପୁଣି ଥରେ ସ୍ପଷ୍ଟ କରିଥିଲେ । ଏହାକୁ ନେଇ ହେଉଥିବା ରାଜନୈତିକ ଚର୍ଚ୍ଚା ଆଲୋଚନାକୁ ସେ ନାପସନ୍ଦ କରିଛନ୍ତି ।
