ଓଡ଼ିଆ ଅସ୍ମିତା ଉପରେ ପ୍ରହାର

ଭୁୁବନେଶ୍ୱର: ବିଜେପି ସରକାରଙ୍କ ପୁଞ୍ଜି ଓଡ଼ିଆ ଅସ୍ମିତା । ଓଡ଼ିଶା ମାଟିର ସମ୍ମାନ ଓ ଓଡିଆଙ୍କ ଟେକ ମୋହନ ସରକାରଙ୍କ ପ୍ରାଥମିକତା ରହିବା କଥା । ମାତ୍ର ବାସ୍ତବରେ ତାହା ହେଉ ନାହିଁ । ଓଡ଼ିଆ ଅସ୍ମିତା ରକ୍ଷା ଦିଗରେ ସରକାର ରାଜନୈତିକ ବାଛ ବିଚାରର ବଶବର୍ତ୍ତୀ ହୋଇଛନ୍ତି । ଯାହାର ବେଶୀ ଶିକାର ହୋଇଛି ରାଜ୍ୟର ଅଗ୍ରଣୀ ଘରୋଇ ଶିକ୍ଷାନୁଷ୍ଠାନ କିଟ୍ ବିଶ୍ୱବିଦ୍ୟାଳୟ ।

ଚଳିତବର୍ଷ କିଟ୍ ଆୟୋଜନରେ ତିନି ତିନୋଟି ଅନ୍ତର୍ଜାତୀୟ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ବିଶ୍ୱର କୋଣ ଅନୁକୋଣରୁ ପ୍ରତିଷ୍ଠିତ ବ୍ୟକ୍ତିମାନେ ଯୋଗଦେଇଥିଲେ । ଓଡ଼ିଶାକୁ ବିଶ୍ୱ ଦରବାରରେ ଅଧିକରୁ ଅଧିକ ଆଦୃତ କରାଇବାର ପ୍ରବଳ ସୁଯୋଗ ଥିଲା । କିନ୍ତୁ ଦୁର୍ଭାଗ୍ୟ ଯେ କୌଣସି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ମାଝୀ, ଦୁଇ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ, ପ୍ରଭାତୀ ପରିଡ଼ା କି ଉଚ୍ଚ ଶିକ୍ଷା ଏବଂ କ୍ରୀଡ଼ା ମନ୍ତ୍ରୀ ସୂରଜ ସୂର୍ଯ୍ୟବଂଶୀ ସାମିଲ ହୋଇ ନ ଥିଲେ ।

ଜାନୁଆରୀରେ ପ୍ରଥମେ ହୋଇଥିଲା ଚେସ୍ ମହାକୁମ୍ଭ ଅନ୍ତର୍ଜାତୀୟ କନଫରେନ୍ସ । ୪୦ ଦେଶରୁ ୫ ହଜାରରୁ ଅଧିକ ପ୍ରତିନିଧି ଓ ପ୍ରତିଯୋଗୀ ଯୋଗଦେଇଥିଲେ । ଏଥିରେ ଯୋଗଦେବାକୁ ପ୍ରଥମ ଥର ପାଇଁ ଓଡ଼ିଶା ଆସିଥିଲେ ଚେସ୍ ତାରକା ବିଶ୍ୱନାଥନ ଆନନ୍ଦ । ଏହି ତିନି ଦିନିଆ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ କିମ୍ବା କ୍ରୀଡ଼ାମନ୍ତ୍ରୀ ସାମିଲ ହୋଇ ନ ଥିଲେ । ପ୍ରତିଯୋଗୀମାନଙ୍କୁ ଉତ୍ସାହିତ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ସୌଜନ୍ୟତା ମଧ୍ୟ ଦେଖାଗଲା ନାହିଁ ।

ସେହିଭଳି ମାର୍ଚ୍ଚ ୪ରୁ ୮ ତାରିଖ ଯାଏଁ କିଟ୍ ଅନୁଷ୍ଠାନ ଦ୍ୱାରା ଆୟୋଜିତ ହୋଇଥିଲା ବିଚ୍ ଭଲିବଲ୍ ଅନ୍ତର୍ଜାତୀୟ ପ୍ରତିଯୋଗିତା । ୫୨ ଦେଶରୁ ୮୩ ଟିମ୍ ଏଥିରେ ଭାଗ ନେଇଥିଲେ । ମାତ୍ର ନା ମୁଖ୍ୟମନ୍ତ୍ରୀ ଆସିଲେ ନା କ୍ରୀଡ଼ାମନ୍ତ୍ରୀ ଆସିଲେ । ରାଜ୍ୟ ସରକାର ସହଯୋଗ ବି କଲେନି । ତେବେ ବି କାର୍ଯ୍ୟକ୍ରମର ଆୟୋଜନରେ ଖୁସି ହୋଇ ଫେରିଥିଲେ ବିଦେଶୀ ଅତିଥିମାନେ ।

ମାର୍ଚ୍ଚ ୧୬ରେ କିଟ୍ ଏବଂ କିସ୍ କ୍ୟାମ୍ପସ୍ କୁ ଆସିଥିଲେ ରିଲାଏନସ୍ ଫାଉଣ୍ଡେନର ପ୍ରତିଷ୍ଠାତା ଓ ଚେୟାରପର୍ସନ୍ ଶ୍ରୀମତୀ ନୀତା ଅମ୍ବାନୀ । ତାଙ୍କୁ ସମ୍ମାନଜନକ କିସ୍ ହୁ୍ୟମାନିଟାରିଆନ୍ ସମ୍ମାନ-୨୦୨୫ ପ୍ରଦାନ କରାଯାଇଥିଲା । ଏଥିପାଇଁ ଭବ୍ୟ କାର୍ଯ୍ୟକ୍ରମର ଆୟୋଜନ କରାଯାଇଥିଲା । ରାଜ୍ୟ ସରକାରଙ୍କୁ ନିମନ୍ତ୍ରଣ ଦିଆଯାଇଥିଲା । ମାତ୍ର କେହି ଆସି ନ ଥିଲେ ।

ଗତ ସପ୍ତାହରେ କିଟ୍ ରେ ବଡ଼ କାର୍ଯ୍ୟକ୍ରମ ଥିଲା ଫେମିନା ମିସ୍ ଇଣ୍ଡିଆ ପ୍ରତିଯୋଗିତାର ଗ୍ରାଣ୍ଡ ଫିନାଲେ । ପୂର୍ବ ଭାରତର ପ୍ରଥମ ଶିକ୍ଷାନୁଷ୍ଠାନ ଭାବେ କିଟ୍ ରେ ଏହା ଅନୁଷ୍ଠିତ ହୋଇଥିଲା । ଭାରତବର୍ଷର ୩୦ ଜଣ ପ୍ରତିଯୋଗୀ ଏଥିରେ ଭାଗ ନେଇଥିଲେ । କାର୍ଯ୍ୟକ୍ରମର ସହଯୋଗ ପାଇଁ ରାଜ୍ୟ ସରକାରଙ୍କ ପର୍ଯ୍ୟଟନ ବିଭାଗର ସଦୟ ସ୍ୱୀକୃତି ଥିଲେ ମଧ୍ୟ କାହାରି ଦେଖା ନ ଥିଲା । ପ୍ରତିଯୋଗୀମାନେ ପୁରୀ କୋଣାର୍କ ବୁଲିବାକୁ ଯାଇଥିଲେ ମଧ୍ୟ ପର୍ଯ୍ୟଟନ ବିଭାଗର କୌଣସି ସହଯୋଗ ନ ଥିଲା । ପିଅନ ଜଣେ ବି ସେମାନଙ୍କ ସାଙ୍ଗରେ ରହିଲେନି ।

ଏତେ ବଡ଼ ବଡ଼ ଅନ୍ତର୍ଜାତୀୟ କାର୍ଯ୍ୟକ୍ରମରେ ଯୋଗଦେବାକୁ ମୁଖ୍ୟମନ୍ତ୍ରୀଙ୍କର ଅନିଚ୍ଛା ଏବଂ ରାଜ୍ୟ ସରକାରଙ୍କ ଅସହଯୋଗ ପଛରେ ରାଜନୈତିକ ନା ଅନ୍ୟ କାରଣ ତାହା ଚର୍ଚ୍ଚାର ବିଷୟ ହୋଇଛି । କିଟ୍ ଅନୁଷ୍ଠାନର ମାଲିକ ଅଚୁ୍ୟତ ସାମନ୍ତ ବିଗତ ଦିନରେ ବିଜେଡିରେ ଥିଲେ ବୋଲି ମୋହନ ସରକାରଙ୍କର ଏଭଳି ମନୋଭାବ କି ବୋଲି ବେଶୀ ଆଲୋଚନା ହେଉଛି ।

ତେବେ ଯାହା ବି ହେଉ, ଏହା ଓଡ଼ିଆ ଅସ୍ମିତା ଉପରେ ପ୍ରହାର ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି । ଓଡ଼ିଆ ସ୍ୱାଭିମାନ ରକ୍ଷାରେ ସଂକୀର୍ଣ୍ଣତାର ସ୍ଥାନ ନାହିଁ ବୋଲି ସେମାନେ କହିଛନ୍ତି । କାର୍ଯ୍ୟକ୍ରମରେ ଯୋଗ ନ ଦେଲ ନାଇଁ, ଦେଶ ବିଦେଶର ପ୍ରତିନିଧିମାନଙ୍କୁ ଅତିଥି ଭବନ ଡାକି ଫୁଲ ଟିକେ ଦେଇଥିଲେ କ’ଣ ମହାଭାରତ ଅଶୁଦ୍ଧି ହୋଇ ଯାଇଥାନ୍ତା? ଏହି ସାମାନ୍ୟ ସୌଜନ୍ୟତା ଦ୍ୱାରା ଓଡ଼ିଶା ଏବଂ ଓଡ଼ିଶା ସରକାରଙ୍କ ପ୍ରତି ଅତିଥିମାନେ ଭଲ ଅନୁଭୂତି ନେଇ ଫେରି ନ ଥାନ୍ତେ କି? ସରକାରଙ୍କ ପରାମର୍ଶଦାତାମାନେ ଏହି ସାଧାରଣ କଥାକୁ କେମିତି ଭୁଲିଗଲେ ବୋଲି ସେମାନେ ପ୍ରଶ୍ନ କରିଛନ୍ତି ।