ବାରିପଦା: ସାଂସ୍କୃତିକ ତଥା ପାରମ୍ପରିକ ଉତ୍ସବ ମାଧ୍ୟମରେ ଜଙ୍ଗଲ ଓ ପରିବେଶ ସୁରକ୍ଷାର ଏହି ନିଆରା ପରମ୍ପରା ଜଙ୍ଗଲ ରକ୍ଷା ବନ୍ଧନ ଉତ୍ସବ ୨୦୦୪ ସେ ମସିହାରୁ ମୟୂରଭଞ୍ଜ ଜିଲାରୁ ଆରମ୍ଭ କରାଯାଇଥିଲା । ଭାରତୀୟ ସଂସ୍କୃତିରେ ରକ୍ଷାବନ୍ଧନ ଉତ୍ସବ ଏକ ସ୍ୱତନ୍ତ୍ର ମୂଲ୍ୟ ବହନ କରେ । ଆବାହମାନ କାଳରୁ ଚାଲି ଆସିଥିବା ଏହି ପରମ୍ପରାକୁ ଜଙ୍ଗଲ ସୁରକ୍ଷା ପାଇଁ ଆଗଭର ଥିବା ଲୋକମାନଙ୍କ ମାଧ୍ୟମରେ ଆଦୃତ କରି ନିକଟବର୍ତ୍ତୀ ଜଙ୍ଗଲରେ ଗଛକୁ ରାକ୍ଷୀ ବାନ୍ଧିବାର ନିଆରା ପରମ୍ପରା ଲୋକମାନଙ୍କ ମଧ୍ୟରେ ବେଶ ଆଦୃତ ହୋଇଅଛି ।
ଦୀର୍ଘ ୨୦ବର୍ଷ ମଧ୍ୟରେ ଏହି କାର୍ଯ୍ୟକ୍ରମ କେବଳ ଓଡ଼ିଶାରେ ନୁହେଁ ବର୍ତ୍ତମାନ ସାରା ଭାରତବର୍ଷରେ କୋଣ ଅନୁକୋଣରେ ବିଭିନ୍ନ ନାମରେ ପାଳିତ ହେଉଛି । ଏ ବର୍ଷ ମୋରଡ଼ା ବ୍ଲକ୍ ର ସୁରେଇଡିହି ଗ୍ରାମପଞ୍ଚାୟତରେ ଝିଙ୍କିରିଆଶୋଳ ଗ୍ରାମରେ ସ୍ଵେଚ୍ଛାସେବୀ ଅନୁଷ୍ଠାନ ସ୍ପାର୍ଡ଼ା, ସ୍ଥାନୀୟ ଗ୍ରାମ୍ୟ ଜଙ୍ଗଲ ସୁରକ୍ଷା କମିଟି ଝିଙ୍କିରିଆସୋଲ ଓ ବାରିପଦା ବନଖଣ୍ଡର ମିଳିତ ଉଦ୍ୟମରେ ଏହି ଜଙ୍ଗଲ ରକ୍ଷା ବନ୍ଧନ ଉତ୍ସବ ପାରମ୍ପରିକ ରୀତିନୀତିରେ ପାଳନ ହୋଇଯାଇଛି ।
