ଭୁବନେଶ୍ୱର: ବୟସ ମାତ୍ର ୨୯ । ବିଧାୟକ ଭାବେ ମାତ୍ର ୨୫ ମାସର ଅଭିଜ୍ଞତା । ମନ୍ତ୍ରୀ ଭାବେ ମାତ୍ର ୬ ମାସର ଅଭିଜ୍ଞତା । ସେ ହେଉଛନ୍ତି ସୂର୍ଯ୍ୟବଂଶୀ ସୂରଜ । ରାଜ୍ୟ ସରକାରଙ୍କ ଉଚ୍ଚଶିକ୍ଷା, କ୍ରୀଡ଼ା ଏବଂ ଯୁବ ବ୍ୟାପାର ତଥା ଓଡ଼ିଆ ଭାଷା ଓ ସଂସ୍କୃତି ବିଭାଗର ରାଷ୍ଟ୍ରମନ୍ତ୍ରୀ । ଭୁବନେଶ୍ୱରର କଳିଙ୍ଗ ଷ୍ଟାଡିୟମ୍ ଆଥଲେଟିକ୍ ଟ୍ରାକ୍ ରେ ନିଜ ସରକାରୀ ଗାଡ଼ିରେ ବୁଲି ସେ ଚର୍ଚ୍ଚାକୁ ଆସିଛନ୍ତି । ତାଙ୍କର କାର୍ଯ୍ୟ ପାଇଁ ସେ ସମାଲୋଚିତ ହୋଇଥିବା ବେଳେ ନିଜର ଭୁଲ୍ ପାଇଁ କିନ୍ତୁ ମୁଣ୍ଡ ନୂଆଁଇ ନାହାନ୍ତି । ଓଲଟି ଏହି ଘଟଣା ସାମନାକୁ ଆଣିଥିବା ପୂର୍ବ କ୍ରୀଡ଼ାମନ୍ତ୍ରୀଙ୍କୁ ଟାହିଟାପରା କରିଛନ୍ତି ।
ପୂର୍ବତନ କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା ଗତକାଲି ତାଙ୍କର ସୋସିଆଲ୍ ମିଡିଆ ଏକ୍ସ ଆକାଉଣ୍ଟରେ ଏକ ଭିଡିଓ ପୋଷ୍ଟ କରି ଘଟଣା ସାମନାକୁ ଆଣିଥିଲେ । ସେଥିରେ ଦେଖିବାକୁ ମିଳୁଛି ଯେ କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀ ସୂରଜ ତାଙ୍କ ସରକାରୀ ଗାଡ଼ିରେ ସିଧା କଳିଙ୍ଗ ଷ୍ଟାଡିୟମ୍ ଆଥଲେଟିକ ଟ୍ରାକ୍ କୁ ଯାଇଛନ୍ତି । ସାଙ୍ଗରେ ଆଉ ଏକ ସରକାରୀ ଗାଡ଼ି ବି ଅଛି । ଟ୍ରାକ୍ ଉପରେ ଦୁଇଟି ଯାକ କାର୍ ଅଟକୁଛି । ମନ୍ତ୍ରୀ ତାଙ୍କ ଗାଡ଼ିରୁ ଓହ୍ଲାଇ ଅନ୍ୟ ଗାଡ଼ିରେ ଆସିଥିବା ଅଧିକାରୀମାନଙ୍କ ସହ ଟ୍ରାକ୍ ପରିଦର୍ଶନ କରୁଛନ୍ତି ।
ଶ୍ରୀ ବେହେରା ତାଙ୍କ କମେଣ୍ଟରେ ଲେଖିଥିଲେ ଯେ ନବୀନ ଓଡ଼ିଶା ଯୁଗରେ କଳିଙ୍ଗ ଷ୍ଟାଡିୟମର ଏହି ଆଥକ୍ଟିକ୍ ଟ୍ରାକ୍ ଅନ୍ତର୍ଜାତୀୟ ଆଥଲେଟମାନଙ୍କ ପାଇଁ ରନିଂ ଟ୍ରାକ୍ ଥିଲା । ବର୍ତ୍ତମାନ ଏହା ଶାସକ ଦଳର ନେତାମାନଙ୍କ ଭେଇକିଲ୍ ରନିଂ ଟ୍ରାକ୍ ହୋଇଛି । ଯାହା ସବୁ କ୍ରୀଡ଼ାପ୍ରେମୀଙ୍କୁ ଆଘାତ ଦେଇଛି । ଓଡ଼ିଶା ପାଇଁ ଏହା ଅତ୍ୟନ୍ତ ଲଜ୍ଜାର ବିଷୟ ।
ଜାତୀୟସ୍ତରର କ୍ରୀଡ଼ା ସାମ୍ବାଦିକ ଚେତନ ଶର୍ମା ତାଙ୍କ ସୋସିଆଲ୍ ମିଡିଆ ଆକାଉଣ୍ଟରେ ସେ ଏହାକୁ ନିନ୍ଦା କରି ରାଜ୍ୟ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ଦୃଷ୍ଟି ଆକର୍ଷଣ କରିଛନ୍ତି । ସେ ଭିଡିଓଟିକୁ ମଧ୍ୟ ପୋଷ୍ଟ କରିଛନ୍ତି ଏବଂ ଲେଖିଛନ୍ତି ଯେ ଏହି ଭିଡିଓଟି ମୁଁ ଏବେ ଏବେ ପାଇଲି । ଏହା କଳିଙ୍ଗ ଷ୍ଟାଡିୟମ୍ ର ବୋଲି ଜାଣିଲି । ସେହି ଟ୍ରାକ୍ ରେ ଦୌଡ଼ିବା ପାଇଁ ଆଥଲେଟମାନଙ୍କୁ ସ୍ୱତନ୍ତ୍ର ଜୋତା ବ୍ୟବହାର କରିବାକୁ ପଡ଼େ । ମାତ୍ର ସେହି ଟ୍ରାକ୍ ରେ ଭିଆଇପିଙ୍କ କାର ଗଡୁଥିବା ଦେଖିବାକୁ ମିଳୁଛି । ଯାହା ସମ୍ପୂର୍ଣ୍ଣ ନିଷେଧ । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଦୟାକରି ଏଥିପ୍ରତି ଦୃଷ୍ଟି ଦିଅନ୍ତୁ ।
ଆଥଲେଟିକ୍ ଟ୍ରାକରେ କ୍ରୀଡ଼ାମନ୍ତ୍ରୀଙ୍କର ଗାଡ଼ିଚଢ଼ା ସଉକକୁ ସବୁଆଡୁ ସମାଲୋଚନା ହେଉଥିବା ବେଳେ ମନ୍ତ୍ରୀ ସୂର୍ଯ୍ୟବଂଶୀ ସୁରଜ ସୋସିଆଲ୍ ମିଡିଆରେ ତାଙ୍କ ପ୍ରତିକ୍ରିୟା ରଖିଛନ୍ତି । ଘଟଣା ସାମନାକୁ ଆଣିଥିବା ପୂର୍ବତନ ମନ୍ତ୍ରୀ ତୁଷାରକାନ୍ତି ବେହେରାଙ୍କୁ ଆକ୍ଷେପ କରି ସେ ଲେଖିଛନ୍ତି-
ପୂର୍ବତନ କ୍ରୀଡ଼ାମନ୍ତ୍ରୀ ଟିକେ ଅଧିକ ସକ୍ରିୟ ଥିବା ଜଣାପଡୁଛି । ଦାୟିତ୍ୱ ଅପସାରଣ ପରେ ସକ୍ରିୟ ଥିବାରୁ ଧନ୍ୟବାଦ । କିଛି ଜରୁରୀ ଓ ଅସ୍ୱାଭାବିକ ପରିସ୍ଥିତି ପାଇଁ ଗାଡ଼ି ଥିଲା । ଖେଳାଳି ଓ କର୍ମଚାରୀଙ୍କ ଗୋପନୀୟତା ଦୃଷ୍ଟିରୁ କୁହାଯିବନି ।
ନିଜର ଭୁଲ ସ୍ୱୀକାର କରିବା ପରିବର୍ତ୍ତେ କ୍ରୀଡ଼ାମନ୍ତ୍ରୀ ଶ୍ରୀ ସୁରଜଙ୍କର ଏଭଳି ପ୍ରତିକ୍ରିୟା ତାଙ୍କୁ ଡବଲ ସମାଲୋଚନାର ଶରବ୍ୟ କରିଛି । ଏହା ନବାବଙ୍କର କାର୍ଯ୍ୟ ଓ ନବାବଙ୍କର ଭାଷା ବୋଲି ଅନେକ କଟୁ ସମାଲୋଚନା କରିଛନ୍ତି । କମ ବୟସରୁ ରାଜନୀତିକୁ ଆସିଥିବା ଏବଂ ନୂଆ ନୂଆ ମନ୍ତ୍ରୀ ହୋଇଥିବା ସୁରଜ ବାବୁଙ୍କଠାରୁ ଏଭଳି ଗର୍ବ ଓ ଅହଂକାର ଆଶା କରାଯାଏନି । ସଦ୍ୟ ପରଲୋକଗତ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ଭଳି ଜ୍ଞାନୀ, ଗୁଣୀ ଏବଂ ସଫଳ ରାଜନେତାଙ୍କଠାରୁ ବିନମ୍ରତାର ପାଠ ଶିଖିବାକୁ ବନ୍ଧୁମାନେ ତାଙ୍କୁ ପରାମର୍ଶ ଦେଇଛନ୍ତି ।
