ଭୁବନେଶ୍ୱର: ଜଣେ ପ୍ରାଣୀଧନ ନିରୀକ୍ଷକ(ଏଲଆଇ)ଙ୍କର ଆଖି ତରାଟି ହେଲା ଭଳି ସମ୍ପତ୍ତି । କୌଣସି ଉପାନ୍ତ ଅଞ୍ଚଳରେ ନୁହେଁ, ବରଂ ଭୁବନେଶ୍ୱର ଓ କଟକର ମୁଖ୍ୟ ଜାଗାରେ ତାଙ୍କର ଅଛି ୯୧ ଟି ପ୍ଲଟ୍ । ସେଥିମଧ୍ୟରୁ ଭୁବନେଶ୍ୱରରେ ୮୧ ଏବଂ କଟକରେ ୧୦ ପ୍ଲଟ୍ ଅଛି । ରେଜିଷ୍ଟ୍ରର ବିକ୍ରୀ ଦଲିଲରେ ଏହାର ମୂଲ୍ୟ ୩ କୋଟି ୩୩ ଲକ୍ଷ ରହିଥିଲେ ମଧ୍ୟ ପ୍ରକୃତ ମୂଲ୍ୟ ଯଥେଷ୍ଟ ଅଧିକ ହେବ । ତା’ ସାଙ୍ଗରେ ୫ ଟି ବିଲଡିଂ, ୨ ଟି ଫ୍ଲାଟ୍ ଏବଂ ଗୋଟିଏ ଆଉଟ୍ ହାଉସ୍ ର ବି ସେ ମାଲିକ ।
ଭିଜିଲାନସ୍ ଖୋଳତାଡ଼ରେ ଏ ପର୍ଯ୍ୟନ୍ତ ତାଙ୍କ ଘରୁ ସଂପୃକ୍ତ ଜାଗାବାଡ଼ିର କାଗଜପତ୍ର ସାଙ୍ଗକୁ ଅଧକିଲୋ ସୁନା, ବିଭିନ୍ନ ବ୍ୟାଙ୍କ ଏବଂ ବୀମା କମ୍ପାନୀରେ ୩୯.୪୮ ଲକ୍ଷର ଡିପୋଜିଟ୍ ଦୃଶ୍ୟମାନ ହୋଇଛି । ଯୁଆଡ଼େ ହାତ ମାରିଲେ ଗଦା ଗଦା ସମ୍ପତ୍ତି ବହାରୁଥିବାରୁ ଭିଜିଲାନସ୍ ଅଧିକାରୀମାନଙ୍କ ପାଇଁ ହିସାବ କଷ୍ଟକର ହୋଇପଡ଼ିଛି । ବର୍ତ୍ତମାନ ସୁଦ୍ଧା ଠାବ ସମ୍ପତ୍ତିର ମୂଲ୍ୟ ୭ କୋଟି ୨୧ ଲକ୍ଷ ଆକଳନ କରାଯାଇଛି ।
ଭିଜିଲାନସ୍ ହାବୁଡ଼ରେ ପଡ଼ିଥିବା ଏହି ଅମାପ ସମ୍ପତ୍ତିଧାରୀ ପ୍ରାଣୀଧନ ନିରୀକ୍ଷକ ବା ଲାଇଭ୍ ଷ୍ଟକ୍ ଇନସପେକ୍ଟର ହେଉଛନ୍ତି ଜଗନ୍ନାଥ ରାଉତ । ଭୁବନେଶ୍ୱର ଉପକଣ୍ଠ ରଘୁନାଥପୁର ଅନ୍ତର୍ଗତ କଳାରାହାଙ୍ଗଠାରେ ସେ ଅବସ୍ଥାପିତ । ରଘୁନାଥପୁର ବାସିନ୍ଦା ଜଗନ୍ନାଥ ତାଙ୍କର ଗାଁରେ ହିଁ ମାଳ ମାଳ ପ୍ଲଟ୍, କୋଠାବାଡ଼ି କରିପକେଇଛନ୍ତି । ତାଙ୍କର ଅମାପ ସମ୍ପତ୍ତି ଯେ ପୈତୃକ ଧନ ତାହା ନୁହେଁ । ସରକାରୀ ଚାକିରି କାଳରେ ବେଆଇନ ସମ୍ପତ୍ତି ଠୁଳ କରିଥିବା ଭିଜିଲାନସ୍ ବିଭାଗ ପାଖରେ ଖବର ପହଞ୍ଚିଛି ।
