ଭୁୁବନେଶ୍ୱର: ଓଡ଼ିଶାରେ ପୁଞ୍ଜି ନିବାସରେ ବାଧକ ହୋଇନି କରୋନା । ଶିଳ୍ପାୟନ କ୍ଷେତ୍ରରେ ରାଜ୍ୟ ଆଗକୁ ବଢ଼ିଛି । ଆଜି ୧୨ ଟି ପ୍ରକଳ୍ପର ଶୁଭାରମ୍ଭ/ଶିଳାନ୍ୟାସ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେଥିରେ ଅଛି ସ୍ୱାସ୍ଥ୍ୟସେବା, ଶକ୍ତି, ଇସ୍ପାତ, ଆଇଟି, ସିମେଣ୍ଟ ଏବଂ ଖାଦ୍ୟ ପ୍ରକ୍ରିୟାକରଣର ୪ ଟି ବଡ଼ ଏବଂ ୮ଟି ଏମଏସଏମଇ ପ୍ରକଳ୍ପ । ସମୁଦାୟ ୮ ହଜାର ୭୯୬ କୋଟି ୬୧ ଲକ୍ଷ ଟଙ୍କାର ଏହି ପ୍ରକଳ୍ପଗୁଡ଼ିକରେ ୭୦୯୦ କର୍ମନିଯୁକ୍ତିର ସୁଯୋଗ ଆଣିଛି ।
ବିଶ୍ୱବ୍ୟାପୀ କୋଭିଡ ପରିସ୍ଥିତି ସତ୍ତ୍ୱେ ଓଡ଼ିଶା ପୁଞ୍ଜି ନିବେଶକାରୀଙ୍କ ପାଇଁ ସର୍ବୋକୃଷ୍ଟ ସ୍ଥାନ ହୋଇ ରହିଥିବାରୁ ମୁଖ୍ୟମନ୍ତ୍ରୀ ଆନନ୍ଦ ପ୍ରକାଶ କରିଛନ୍ତି । କୋଭିଡ ଯୋଗୁଁ କ୍ଷତିଗ୍ରସ୍ତ ହୋଇଥିବା ରାଜ୍ୟର ଶିଳ୍ପ ଅର୍ଥନୀତିକୁ ଟ୍ରାକ୍ କୁ ଫେରାଇବା ସରକାରଙ୍କ ପାଇଁ ଗୁରୁତ୍ୱପୂର୍ଣ୍ଣ ଥିଲା । ଯେଉଁଥିରେ ସରକାର ସଫଳ ହୋଇଛନ୍ତି । ଶିଳ୍ପଦ୍ୟୋଗୀଙ୍କ ଆତ୍ମ ବିଶ୍ୱାସ ଫେରାଇ ଆଣିବାରେ ଏହି ୧୨ ନୂଆ ପ୍ରକଳ୍ପ ସହାୟକ ହେବ ବୋଲି ମୁଖ୍ୟମନ୍ତ୍ରୀ କହିଥିଲେ । ଶିଳ୍ପ ପ୍ରକଳ୍ପ ସ୍ଥାପନରେ ସରକାରୀ ବିଭାଗଗୁଡ଼ିକ ସମନ୍ୱୟ ଭିତ୍ତିରେ କାର୍ଯ୍ୟ କରିବା ଉପରେ ମୁଖ୍ୟମନ୍ତ୍ରୀ ଗୁରୁତ୍ୱ ଦେଇଥିଲେ ।
ଶୁଭାରମ୍ଭ ହୋଇଥିବା ଦୁଇଟି ପ୍ରକଳ୍ପ ମଧ୍ୟରେ ରହିଛି ଯାଜପୁରର ହରିଦାସପୁରଠାରେ ରାମକୋ ସିମେଣ୍ଟ ଲିମିଟେଡର ଗ୍ରାଇଣ୍ଡିଂ ପ୍ଲାଣ୍ଟଏବଂ ବରଗଡ଼ ବିଜେପୁରଠାରେ ଆଦିତ୍ୟ ବିର୍ଲା ରିନ୍ୟୁଏବୁଲସ୍ ଲିମିଟେଡର ସୋଲାର୍ ପାୱାର ପ୍ଲାଣ୍ଟ ।
ଶିଳାନ୍ୟାସ୍ ପ୍ରକଳ୍ପଗୁଡ଼ିକ ହେଲା
– ଢ଼େଙ୍କାନାଳ ଝାରବନ୍ଧଠାରେ ରୁଙ୍ଗଟା ମାଇନସ୍ ଲିମିଟେଡର ନୂଆ ସମ୍ପ୍ରସାରଣ ୟୁନିଟ୍ ।
– ସମ୍ବଲପୁର ପଣ୍ଡଲୋଇଠାରେ ଶ୍ୟାମ ମେଟାଲିକସ୍ ଆଣ୍ଡ ଏନର୍ଜିର ନୂଆ ପେଲେଟ୍ ପ୍ଲାଣ୍ଟ ସମ୍ପ୍ରସାରଣ ।
– ଖୋର୍ଦ୍ଧାଠାରେ ୟୁବିଏନ୍ ସଫ୍ଟୱେୟାର୍ ସଲ୍ୟୁସନସ୍ ର ଏକ ସଫ୍ଟୱେୟର୍ ଡେଭେଲପମେଣ୍ଟ ସେଣ୍ଟର ।
– ଖୋର୍ଦ୍ଧା ଡେରାସଠାରେ ବି-ୱାନ୍ ବିଜିନେସ୍ ହାଉସ ପ୍ରଇଭେଟ୍ ଲିମିଟେଡର ନୂଆ ସି ଫୁଡ୍ ପ୍ରସେସିଂ ୟୁନିଟ୍ ।
– ବଲାଙ୍ଗୀରରେ ସ୍ୱସ୍ତି ଇକୋୱେୟାରସ୍ ଲିମିଟେଡ ର ବାଇଓ-ଡିଗ୍ରେଡେବଲ୍ ଟେବୁଲ ୱେୟାରସ୍ ଡିସପୋଜାଲ୍ ମାନଫ୍ୟାକଚରିଂ ୟୁନିଟ୍ ।
– ଖୋର୍ଦ୍ଧା ଛତାବରଠାରେ ବୈଦ୍ୟବୁଟି ଫାର୍ମାସିର ଆୟୁର୍ବେଦିକ ପ୍ରଡକ୍ଟସ୍ ଆଣ୍ଡ କସମେଟିକସ୍ ମାନଫ୍ୟାକଚରିଂ ୟୁନିଟ୍
– ଖୋର୍ଦ୍ଧା ଛତାବରଠାରେ ମେହାନ ଇଣ୍ଡଷ୍ଟ୍ରିସ୍ ଲିମିଟେଡର କଏର ମ୍ୟାଟ୍ରେସ୍ ଆଣ୍ଡ ଫୋମ୍ ମାନଫ୍ୟାକଚରିଂ ୟୁନିଟ୍ ।
– କଟକ ରାମଦାସପୁରଠାରେ ଡାଇଭରସିଫାଇଡ୍ ଏନର୍ଜି ସଲ୍ୟୁସନ୍ ଲିମିଟେଡ୍ ର ଏକ ୟୁନିଟ୍
– କଟକ ରାମଦାସପୁରରେ ସ୍ୱଗତ ୟୁରେଥାନେ ପ୍ରାଇଭେଟ୍ ଲିମିଟେଡର ପଲୁ୍ୟରେଥାନେ ଇଲାଷ୍ଟେମର୍ ମାନଫ୍ୟାକଚରିଂ ୟୁନିଟ୍
– କଟକ ରାମଦାସପୁରରେ ଓମ୍ ଇକୋ ବିଲ୍ଡ ଟେକ୍ ର ଅଟୋକ୍ଲେଭଡ୍ ଏରୋଟେଡ କଂକ୍ରିଟ୍ ବ୍ଲକସ୍ ମାନଫ୍ୟାକଚରିଂ ୟୁନିଟ୍ ।