ଗଞ୍ଜାମ ମଡେଲ୍ କୁ ଅକ୍ସଫୋର୍ଡର ପ୍ରଶଂସା

ଭୁୁବନେଶ୍ୱର: କୋଭିଡ ପରିଚାଳନାରେ ରାଜ୍ୟ ସରକାର ଆନ୍ତର୍ଜାତୀୟସ୍ତରରେ ପୁଣି ପ୍ରଶଂସିତ ହୋଇଛନ୍ତି । ଗଞ୍ଜାମ ଜିଲ୍ଲାକୁ ଏକ ମଡ଼େଲ୍ ଭାବେ ଗ୍ରହଣ କରିଛନ୍ତି ଅକ୍ସଫୋର୍ଡ ବିଶ୍ୱବିଦ୍ୟାଳୟ । ଛୋଟ ଛୋଟ ଅଞ୍ଚଳ ପ୍ରତି ଧ୍ୟାନ ଦେଲେ ଯାଇ ସଂକ୍ରମଣ ରୋକାଯାଇପାରିବ । ଗଞ୍ଜାମ ଏବଂ ମୁମ୍ବାଇର ଧରାବୀ ବସ୍ତି ଏହାର ଉଦାହରଣ ବୋଲି ଅକ୍ସଫୋର୍ଡ ବିଶ୍ୱବିଦ୍ୟାଳୟ କହିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଟ୍ୱିଟ୍ ଯୋଗେ ଏହି ସୂଚନା ଦେଇଛନ୍ତି ।

କରୋନା ସଂକ୍ରମଣର ସ୍ଥିତି ନେଇ ଅକ୍ସଫୋର୍ଡ ବିଶ୍ୱବିଦ୍ୟାଳୟ ପକ୍ଷରୁ ବିଶ୍ୱର ୩୧୦ ଟି ସହର ଉପରେ ଅଧ୍ୟୟନ କରାଯାଇଥିଲା । ଯେଉଁଥିରେ ଥିଲା ଗଞ୍ଜାମ ଏବଂ ମୁମ୍ବାଇର ଧରାବୀ ବସ୍ତି । ଏହି ଦୁଇ ଜାଗାରେ ହଜାର ହଜାର ଲୋକ ସଂକ୍ରମିତ ହୋଇଥିଲେ । କିନ୍ତୁ ଆଜି ଏଠାରେ ୨୦୦ରୁ ବି କମ୍ ସଂକ୍ରମିତ ଅଛନ୍ତି । ଗଞ୍ଜାମ ଓ ଧରାବୀ ବସ୍ତି ମଡେଲରୁ ଅନେକ କିଛି ଶିଖିହେବ ବୋଲି ଅକ୍ସଫୋର୍ଡ କହିଛି ।

ଅଧ୍ୟୟନରେ କୁହାଯାଇଛି ଯେ ଗଞ୍ଜାମରେ ମେ ୨ ତାରିଖରେ ପ୍ରଥମ ସଂକ୍ରମଣ ରିପୋର୍ଟ ଆସିଥିଲା । ଅଗଷ୍ଟ ମାସରେ ସଂକ୍ରମଣ ହାର ୫୯% ଛୁଇଁଥିଲା । ମାତ୍ର ରାଜ୍ୟ ସରକାର ଓ ପ୍ରଶାସନର ବିଭିନ୍ନ ପଦକ୍ଷେପ ଯୋଗୁଁ ସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣକୁ ଆସିଛି ।

ପୂର୍ବରୁ ବିଶ୍ୱ ସ୍ୱାସ୍ଥ୍ୟ ସଂଗଠନ ଓଡ଼ିଶା ସରକାରଙ୍କ କୋଭିଡ୍ ପରିଚାଳନାକୁ ପ୍ରଶଂସା କରିଥିଲା । ସେଥିରେ ଗଞ୍ଜାମର ଉଦାହରଣ ଦିଆଯାଇଥିଲା ।