ଭୁୁବନେଶ୍ୱର: ରାଜଧାନୀରେ ଜଣେ ୧୩ ବର୍ଷର ନାବାଳିକା ଉପରେ ହୋଇଥିବା ଗଣଦୁଷ୍କର୍ମ ମାମଲାର ତଦନ୍ତ ଭାର କ୍ରାଇମବ୍ରାଞ୍ଚ ହାତକୁ ଯାଇଛି । ରାଜ୍ୟ ସରକାରଙ୍କ ନିର୍ଦ୍ଦେଶ ପରେ କ୍ରାଇମବ୍ରାଞ୍ଚ ର ଏକ ସ୍ୱତନ୍ତ୍ର ଟିମ୍ ଦ୍ୱାରା ଏହାର ତଦନ୍ତ ଆରମ୍ଭ ହୋଇଛି । ଇତିମଧ୍ୟରେ କ୍ରାଇମବ୍ରାଞ୍ଚଟିମ୍ ଓଟିଭି ଅଫିସ୍ କୁ ଯାଇ ଖୋଳତାଡ଼ କରିଛନ୍ତି । ଆବଶ୍ୟକୀୟ କାଗଜପତ୍ର ଯାଞ୍ଚ କରିବା ସହ କିଛି ଅଧିକାରୀଙ୍କୁ ଜେରା କରିଥିଲେ । ଓଟିଭି ମୁଖ୍ୟ ଜାଗୀମଙ୍ଗତ ପଣ୍ଡାଙ୍କ ବ୍ୟକ୍ତିଗତ ସହାୟକଙ୍କ ସମେତ ୩ ଜଣଙ୍କୁ କ୍ରାଇମବ୍ରାଞ୍ଚରେ ହାଜିରା ଦେବା ପାଇଁ ସମନ୍ କରାଯାଇଛି ।
ଏହି ଜଘନ୍ୟ ମାମଲାରେ ଓଟିଭିର ୨ କର୍ମଚାରୀ, ୨ ସୁରକ୍ଷାକର୍ମୀ, ରାଉରକେଲାର ଜଣେ ପୁଲିସ ସମେତ ୭ ଜଣ ଅଭିଯୁକ୍ତ ଅଛନ୍ତି । ଖୋଦ୍ ଓଟିଭି ଏମଡି ଶ୍ରୀମତୀ ପଣ୍ଡା ଏହି ମାମଲାରେ ସଂପୃକ୍ତ ହୋଇପଡ଼ିଛନ୍ତି । ମାମଲା ସମ୍ପର୍କରେ ଜାଣି ତାହାକୁ ଚପାଇ ଦେବାକୁ ଉଦ୍ୟମ କରିଥିଲେ ବୋଲି ପୀଡ଼ିତାଙ୍କ ମାଆ ସଙ୍ଗୀନ ଅଭିଯୋଗ ଆଣିଛନ୍ତି ।
ସୂଚନାଥାଉକି, ଗତ ଅଗଷ୍ଟ ୩୦ ତାରିଖରେ ମହିଳା ଥାନାରେ ଗଣଦୁଷ୍କର୍ମ ଅଭିଯୋଗର ଏତଲା ହେବା ପରେ ପୁଲିସ ୭ ଅଭିଯୁକ୍ତଙ୍କ ବିରୋଧରେ ପୋକସୋ ଆକ୍ଟରେ ମାମଲା ରୁଜୁ କରିଥିଲା । ଏସଆଇଟି ଏହାର ତଦନ୍ତ କରିବେ ବୋଲି ଡିସିପି ସୂଚନା ଦେଇଥିଲେ । ମାତ୍ର ଇତିମଧ୍ୟରେ ମାସେ ପୂରିସାରିଥିଲେ ମଧ୍ୟ ପୁଲିସ ଅଭିଯୁକ୍ତମାନଙ୍କୁ ଗିରଫ କରିବାକୁ ସକ୍ଷମ ହୋଇନାହିଁ ।
ପୁଲିସ ଥରେ ଦୁଇଥର ଓଟିଭି ଅଫିସ୍ ଯାଇ ତଦନ୍ତ କରିଥିଲା । ପୀଡ଼ିତାଙ୍କ ୧୬୧ ବୟାନ ରେକର୍ଡ କରିଥିଲା । ମାତ୍ର ପରବର୍ତ୍ତୀ ସମୟରେ ପୁଲିସ ତଦନ୍ତ ଗତି ଜଣାପଡ଼ି ନ ଥିଲା । ମାମଲାରେ ଓଟିଭି କର୍ମଚାରୀଙ୍କ ସଂପୃକ୍ତି ଓ ଏମଡିଙ୍କ ଭୂମିକା ଉପରେ ଅଙ୍ଗୁଳି ଉଠିଥିବାରୁ ପୁଲିସ ଚାପର ବଶବର୍ତ୍ତୀ ହୋଇଥିବା ଚର୍ଚ୍ଚା ହେଉଥିଲା ।
ପୁଲିସ ତଦନ୍ତର ଶିଥିଳତାକୁ ଖୋଦ୍ ହାଇକୋର୍ଟ ପ୍ରଶ୍ନ ଉଠାଇ ତଦନ୍ତ ଅଗ୍ରଗତି ସମ୍ପର୍କରେ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଥିଲେ । ପୁଲିସ ଏହି ରିପୋର୍ଟ ଦେବାକୁ ପ୍ରସ୍ତୁତ ହେଉଥିବା ବେଳେ ମାମଲାର ତଦନ୍ତ ଦାୟିତ୍ୱ କ୍ରାଇବ୍ରାଞ୍ଚ ହାତକୁ ଚାଲିଯାଇଛି । ଡେରିରେ ହେଉ ପଛେ ଖୋଦ୍ ରାଜ୍ୟ ସରକାରଙ୍କ ନିଦ ଭାଙ୍ଗିଛି । ଏହି ମାମଲାରେ କମିଶନରେଟ୍ ପୁଲିସ ଉପରେ ସରକାରଙ୍କ ଭରସା ନ ଥିବା ସ୍ପଷ୍ଟ ହେଉଛି ।
ଖୋଦ୍ ରାଜଧାନୀରେ ଜଣେ ୧୩ ବର୍ଷର ନାବାଳିକାକୁ ୭ ଜଣ ଯୁବକ ୧୫ ଦିନ ଧରି ଗଣଦୁଷ୍କର୍ମ କରିଥିବାର ଅଭିଯୋଗ ହୋଇଛି । ପୀଡ଼ିତା ଏବଂ ତାଙ୍କ ମାଆ ସିଧାସଳଖ ଅଭିଯୁକ୍ତମାନଙ୍କ ନାଁ ନେଇଛନ୍ତି । ଓଟିଭି ଏମଡିଙ୍କ ସହ ତାଙ୍କ କଥାବାର୍ତ୍ତାର ଅଡିଓ ଭାଇରାଲ୍ ହୋଇଛି । ମାତ୍ର ଏତେସବୁ ପରେ ବି ମୁଖ୍ୟ ବିରୋଧୀ ଦଳ ବିଜେପି ଏହି ପ୍ରସଙ୍ଗ ଉପରେ ପାଟି ନ ଖୋଲିବା ସମସ୍ତଙ୍କୁ ଚକିତ କରିଛି ।
ସେପଟେ ପୀଡ଼ିତାଙ୍କ ମାଆ ନ୍ୟାୟଭିକ୍ଷା କରି ମହିଳା ଶିଶୁ ଅଧିକାର ସୁରକ୍ଷା କମିଶନ ଏବଂ ମହିଳା କମିଶନଙ୍କ ଦ୍ୱାରସ୍ଥ ହୋଇଥିଲେ ମଧ୍ୟ କିଛି ଫଳ ମିଳିନାହିଁ । ଓଲଟି ମହିଳା କମିଶନ ଅଧ୍ୟକ୍ଷା ଏବେ ଏବେ ଓଟିଭିର ପିଠି ଥାପୁଡ଼ିବା ଆରମ୍ଭ କରିଛନ୍ତି ।
