ଭୁବନେଶ୍ୱର: ସବୁ କଳ୍ପନାଜଳ୍ପନାର ଅବସାନ ଘଟାଇ ଆଜି ବିଜେଡିରେ ଯୋଗଦେଇଛନ୍ତି କ୍ୟାପଟେନ୍ ମନ୍ମଥ ରାଉତରାୟ । ମନ୍ମଥ ହେଉଛନ୍ତି ବରିଷ୍ଠ କଂଗ୍ରେସ ନେତା ତଥା ଜଟଣୀ ବିଧାୟକ ସୁର ରାଉତରାୟଙ୍କ ସାନପୁଅ । ମାସେ ତଳେ ପାଇଲଟ୍ ଚାକିରି ଛାଡ଼ି ବିଧିବଦ୍ଧ ଭାବେ ରାଜନୀତି ମଇଦାନକୁ ଓହ୍ଲାଇଥିଲେ । ମାତ୍ର କେଉଁ ଦଳରେ ଯୋଗଦେବେ ଜଣାଇ ନ ଥିଲେ । ପୁଅ ଜଟଣୀରୁ କଂଗ୍ରେସ ଟିକେଟରେ ଲଢ଼ୁ ବୋଲି ବାପାଙ୍କର କୁଆଡ଼େ ଇଚ୍ଛା ଥିଲା । ତେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱ ତଥା ବିଜେଡି ପ୍ରତି ଆକୃଷ୍ଟ ହୋଇ ସେ ବିଜେଡିକୁ ଆସିଛନ୍ତି । ବାପାଙ୍କ ଅନୁମତି ଏବଂ ଆଶୀର୍ବାଦ ନେଇ ସେ ଆଜି ବିଜେଡିରେ ଯୋଗଦେଇଥିବା ମନ୍ମଥ କହିଛନ୍ତି ।
ବିଜେଡି ଅଫିସରେ ଏଥିପାଇଁ ମିଶ୍ରଣ ପର୍ବର ଆୟୋଜନ କରାଯାଇଥିଲା । ଶହ ଶହ ସମର୍ଥକଙ୍କ ସହ ଏକ ବିରୋଟ ପଟୁଆରରେ ମନ୍ମଥ ଆସିଥିଲେ । ରାଜ୍ୟସଭା ସାଂସଦ ସର୍ବଶ୍ରୀ ମାନସ ମଙ୍ଗରାଜ, ଡ. ସସ୍ମିତ୍ ପାତ୍ର, ସୁଲତା ଦେଓଙ୍କ ପ୍ରମୁଖଙ୍କ ଉପସ୍ଥିତିରେ ସେ ବିଧିବଦ୍ଧ ଭାବେ ବିଜେଡିରେ ସାମିଲ ହୋଇଥିଲେ । ମନ୍ମଥ ଏବଂ ସମର୍ଥକମାନଙ୍କୁ ଶ୍ରୀ ମଙ୍ଗରାଜ ଏବଂ ଡ. ପାତ୍ର ଉପଢ଼ୈାକନ ଦେଇ ଦଳକୁ ସ୍ୱାଗତ କରିଥିଲେ ।
ବିଜେଡିରେ ମିଶିବା ଅବସରରେ ମନ୍ମଥ ଭାବବିହ୍ୱଳ ହୋଇଯାଇଥିଲେ । କହିଥିଲେ, ମୁଁ ବାପାଙ୍କ ଆଶୀର୍ବାଦ ନେଇ ଏଠାକୁ ଆସିଛି । ଲୋକଙ୍କ ପାଇଁ କାମ କରିବାକୁ ପାଇଲଟ୍ ଚାକିରି ଛାଡ଼ି ରାଜନୀତିକୁ ଆସିଛି । ଏଥିପାଇଁ ବିଜୁ ବାବୁ ଏବଂ ନବୀନ ବାବୁ ମୋ ପ୍ରେରଣା ବୋଲି ସେ କହିଛନ୍ତି । ୫-ଟି ଅଧ୍ୟକ୍ଷ ଭି.କେ. ପାଣ୍ଡିଆନଙ୍କର ଉତ୍ସର୍ଗୀକୃତ ମନୋଭାବ ଏବଂ କଥା କମ୍, କାମ ବେଶୀ ମନ୍ତ୍ର ମୋତେ ଅଧିକ ଉଦବେଳିତ କରିଛି । ତେଣୁ ବିଜେଡିରେ ମୋ ସ୍ୱପ୍ନ ପୂରଣ ହୋଇପାରିବ ବୋଲି ସେ କହିଛନ୍ତି । ଦଳରେ ସୁଯୋଗ ଦେଇଥିବା ମୁଖ୍ୟମନ୍ତ୍ରୀ ଏବଂ ୫-ଟି ଅଧ୍ୟକ୍ଷଙ୍କ ସମେତ ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଏବଂ ରାଜ୍ୟସଭା ସାଂସଦ ମାନସ ମଙ୍ଗରାଜଙ୍କୁ ସେ ଧନ୍ୟବାଦ ଓ କୃତଜ୍ଞତା ଜଣାଇଥିଲେ ।
ବିଜେଡିରେ ମନ୍ମଥଙ୍କ ଯୋଗଦାନ ପରେ ସେ କେଉଁଠୁ ଲଢ଼ିବେ ତାଙ୍କୁ ନେଇ ଆରମ୍ଭ ହୋଇଛି ଚର୍ଚ୍ଚା ଆଲୋଚନା । ଭୁବନେଶ୍ୱର ଲୋକସଭା ଆସନରୁ ସେ ଲଢ଼ିବେ ବୋଲି ବିଶେଷ ସୂତ୍ରରୁ ଜଣାପଡ଼ିଛି । ଏହାହେଲେ ବିଜେପିର ଅପରାଜିତା ଷଡ଼ଙ୍ଗୀଙ୍କୁ ସେ କଡ଼ା ଟକ୍କର ଦେଇପାରିବେ । ଆଉ ଏକ ମହଲର ଅନୁମାନ କହୁଛି, ସେ ଜଟଣୀରୁ ବିଧାୟକ ପ୍ରାର୍ଥୀ ହେବେ । ବିଭୂତି ବଳବନ୍ତରାୟ ଲୋକପ୍ରିୟତା ହରାଇଥିବାରୁ ମନ୍ମଥଙ୍କୁ ଟିକେଟ ଦେଇ ବିଜେଡି ଗୋଟିଏ ଗୁଳିରେ ଦୁଇଟି ଶିକାର କରିବାର ଯୋଜନା ରଖିଥାଇପାରେ ବୋଲି କୁହାଯାଉଛି ।
