ଭୁବନେଶ୍ୱର: ଲମ୍ବା ସମୟ ଧରି ଚାଲିଥିବା କଳ୍ପନାଜଳ୍ପନାର ଅନ୍ତ ଘଟିଛି । କେନ୍ଦ୍ରୀୟ ନେତୃତ୍ୱଙ୍କ ଭରସାକୁ ଅତୁଟ ରଖିଛନ୍ତି ମନମୋହନ ସାମଲ । ସେ ପୁଣି ଥରେ ହୋଇଛନ୍ତି ରାଜ୍ୟ ବିଜେପି ସଭାପତି । ଚତୁର୍ଥ ଥର ପାଇଁ ଏହି ଦାୟିତ୍ୱ ସମ୍ଭାଳିବାକୁ ଯାଉଛନ୍ତି । ଆସନ୍ତାକାଲି ଦିନ ୧୧ଟାରେ ଦଳ ପକ୍ଷରୁ ବିଧିବଦ୍ଧ ଭାବେ ତାଙ୍କ ନାଁ ଘୋଷଣା ହେବ ।
ବିଜେପି ରାଜ୍ୟ ସଭାପତି ନିର୍ବାଚନ ପାଇଁ ଆଜି ଥିଲା ନାମାଙ୍କନପତ୍ର ଦାଖଲର ଦିନ । ମନମୋହନ ସାମଲ ଏକମାତ୍ର ପ୍ରାର୍ଥୀ ଭାବେ ନାମାଙ୍କନ ଦାଖଲ କରିବେ ବୋଲି ବିଭିନ୍ନ ସୂତ୍ରରୁ ସୂଚନା ମିଳୁଥିଲା । ତେବେ କିଛି ଚକମା ଯେ ନ ହେବ ତାହା ବି କହି ହଉ ନ ଥିଲା । କାରଣ ସଭାପତି ରେସ୍ ରେ ଗୋଲକ ମହାପାତ୍ରଙ୍କ ନାଁ ବହୁ ଆଗରୁ ଚର୍ଚ୍ଚା ହେଉଥିଲା ବେଳେ ନଗଦ ସମ୍ଭାବ୍ୟ ତାଲିକାରେ ଯୋଡି ହୋଇଥିଲେ ବରଗଡ଼ ସାଂସଦ ପ୍ରଦୀପ ପୁରୋହିତ ଏବଂ କନ୍ଧମାଳ ସାଂସଦ ସୁକାନ୍ତ ପାଣିଗ୍ରାହୀ । ଆଜି ଭୁବନେଶ୍ୱରରେ ରହିବାକୁ ସେମାନଙ୍କୁ ନିର୍ଦ୍ଦେଶ ଜାରି ହୋଇଥିଲା । ସୁତରାଂ ସେମାନଙ୍କ ଭିତରୁ କେହି ସଭାପତି ହୋଇପାରନ୍ତି ବୋଲି ଗତକାଲି ରାତିରୁ ଦଳୀୟ ମହଲରେ ଗୁଞ୍ଜରଣ ଖେଳିଥିଲା ।
ଆଜି ପ୍ରାର୍ଥୀପତ୍ର ଦାଖଲ ଥିବାରୁ ବିଜେପି ଅଫିସ ସକାଳୁ ସକାଳୁ ଚଳଚଞ୍ଚଳ ରହିଥିଲା । ସମୟ ଗଡ଼ିବା ସହିତ ନେତାମାନଙ୍କର ଭିଡ଼ ବଢ଼ିଥିଲା । ନୂଆ ସଭାପତିଙ୍କୁ ନେଇ ସମସ୍ତଙ୍କ ମନରେ ଉତ୍କଣ୍ଠା ଥିବା ବେଳେ ଦିଲ୍ଲୀରୁ ଆସି ପହଞ୍ଚିଥିଲେ କେନ୍ଦ୍ରୀୟ ପର୍ଯ୍ୟବେକ୍ଷକ ସଞ୍ଜୟ ଜୟସ୍ୱାଲ୍ । ମୁଖ୍ୟମନ୍ତ୍ରୀ ମୋହନ ମାଝୀ ଏବଂ ଅନ୍ୟ ବରିଷ୍ଠ ନେତାମାନେ ମଧ୍ୟ ପହଞ୍ଚିଥିଲେ । ସେମାନଙ୍କ ଉପସ୍ଥିତିରେ ମନମୋହନ ସାମଲ ଏକମାତ୍ର ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଥିଲେ । ସେହିଭଳି ଜାତୀୟ ପରିଷଦର ସଦସ୍ୟ ଭାବେ ୩୨ ଜଣ ନାମାଙ୍କନ ଭରିଥିଲେ ।
ଆସନ୍ତାକାଲି ୯ଟାରୁ ୧୧ଟା ଯାଏଁ ମତଦାନ ସମୟ ଅଛି । ତେବେ ସଭାପତି ପାଇଁ ଜଣେ ପ୍ରାର୍ଥୀ ନାମାଙ୍କନ ଦାଖଲ କରିଥିବାରୁ ଆଉ ନିର୍ବାଚନର ଆବଶ୍ୟକତା ନାହିଁ । ମନମୋହନ ସାମଲଙ୍କୁ ନିଦ୍ୱର୍ନ୍ଦରେ ସଭାପତି ଘୋଷଣା କରାଯିବ । ସେହିଭଳି ୩୨ ଜଣ ଜାତୀୟ ପରିଷଦ ସଦସ୍ୟଙ୍କର ପ୍ରାର୍ଥୀପତ୍ର ଯାଞ୍ଚ ହୋଇ ଔପଚାରିକତା ପୂରଣ ହେବ । ଆସନ୍ତାକାଲି ଦିନ ୧୧ଟାରେ ସଭାପତି ଏବଂ ଜାତୀୟ ପରିଷଦ ସଦସ୍ୟଙ୍କ ନାଁ ବିଧିବଦ୍ଧ ଘୋଷଣା ହେବ ବୋଲି କେନ୍ଦ୍ରୀୟ ପର୍ଯ୍ୟବେକ୍ଷକ ସଞ୍ଜୟ ଜୟସ୍ୱାଲ୍ ଏକ ପ୍ରେସ୍ ମିଟ୍ ରେ ସୂଚନା ଦେଇଛନ୍ତି ।
ମନମୋହନ ସାମଲ ହେଉଛନ୍ତି ରାଜ୍ୟ ବିଜେପିର ଜଣେ ଅଭିଜ୍ଞ ଓ ପ୍ରଭାବଶାଳୀ ନେତା । ବହୁବର୍ଷ ଧରି ଦଳରେ ଅଲୋଡ଼ା ହୋଇପଡ଼ିଥିବା ଏହି ନେତାଙ୍କୁ ପୁର୍ନଜୀବନ ଦେଇଥିଲା ଧାମନଗର ଉପନିର୍ବାଚନ । ଦଳ ତାଙ୍କୁ ସେହି ଉପନିର୍ବାଚନ ପରିଚାଳନା ଦାୟିତ୍ୱ ଦେଇଥିଲା । ଯେଉଁଥିରେ ସଫଳ ହୋଇଥିଲେ ମନମୋହନ । ଶକ୍ତିଶାଳୀ ବିଜେଡିକୁ ଧରାଶାୟୀ କରିଥିବାରୁ ପୁରସ୍କାର ସ୍ୱରୂପ ତାଙ୍କୁ ମିଳିଥିଲା ରାଜ୍ୟ ବିଜେପି ମୁଖିଆ ଆସନ । ୨୦୨୩ ମାର୍ଚ୍ଚରେ ସମୀର ମହାନ୍ତିଙ୍କୁ ହଟାଇ ମନମୋହନ ସାମଲ ସଭାପତି ଦାୟିତ୍ୱ ପାଇଲେ । ତାଙ୍କର ଭାଗ୍ୟ ଯେ ତାଙ୍କ ନେତୃତ୍ୱରେ ବିଜେପି ସଫଳତା ପାଇ ରାଜ୍ୟରେ ଏକାକୀ ସରକାର ଗଢ଼ିବାକୁ ସମର୍ଥ ହେଲା ।
ତେବେ ରାଜ୍ୟ ସଭାପତି ଭାବେ ତାଙ୍କ କାର୍ଯ୍ୟକାଳ ୬ ମାସ ତଳେ ସରିବା ପରେ ଆଉ ଏକ ପାଳି ଦାୟିତ୍ୱ ପାଇବେ ବୋଲି କୁହାଯାଉଥିଲେ ମଧ୍ୟ ତାଙ୍କୁ ନେଇ ଦଳ ଭିତରେ ପ୍ରବଳ ମତଭେଦ ଦେଖାଦେଇଥିଲା । ଭିନ୍ନ ଗୋଷ୍ଠୀ ତାଙ୍କୁ ସମର୍ଥନ କରୁ ନ ଥିଲେ । ଏଭଳି ସ୍ଥିତିରେ ନୂଆ ସଭାପତି ଅଙ୍କ ଜଟିଳ ହୋଇ ପଡ଼ିଥିଲା । ରାଷ୍ଟ୍ରୀୟ ସଭାପତି ନିର୍ବାଚନ ଆଳରେ କେନ୍ଦ୍ରୀୟ ନେତୃତ୍ୱ ସମୟ ଗଡ଼େଇ ଚାଲିଥିଲେ । ମାତ୍ର ଶେଷରେ ଦଳର ସେହି ଭିନ୍ନ ଗୋଷ୍ଠୀଙ୍କୁ ମନାଇବାରେ ସଫଳ ହୋଇଛନ୍ତି ନେତୃତ୍ୱ ।
ମନମୋହନ ସାମଲ ୧୯୯୮ ମସିହାରେ ପ୍ରଥମ ଥର ପାଇଁ ରାଜ୍ୟ ବିଜେପି ସଭାପତି ଆସନ ଅଳଙ୍କୃତ କରିଥିଲେ । ଦ୍ୱିତୀୟ ଥର ପାଇଁ ୨୦୦୦ ମସିହାରେ ସଭାପତି ହୋଇଥିଲେ । ତାଙ୍କ ସଭାପତିତ୍ୱ କାଳରେ ବିଜେଡି-ବିଜେପି ମଧ୍ୟରେ ମେଣ୍ଟ ସରକାର ଗଠନ ହୋଇଥିଲା । ମନମୋହନ ରାଜ୍ୟସଭାକୁ ଯାଇଥିଲେ । ୨୦୦୪ ନିର୍ବାଚନରେ ଧାମନଗର ବିଧାନସଭା ଆସନରୁ ପ୍ରଥମ ଥର ନିର୍ବାଚନ ଜିତିବା ପରେ ନବୀନଙ୍କ ନେତୃତ୍ୱାଧୀନ ମେଣ୍ଟ ସରକାରରେ ରାଜସ୍ୱ ଭଳି ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ପଦ ପାଇଥିଲେ । ତେବେ ୨୦୦୮ ମସିହାରେ ଦିଲ୍ଲୀ ଓଡ଼ିଶା ନିବାସରେ ଏକ ଯୌନ କେଳେଙ୍କାରୀ ମାମଲାରେ ଅଭିଯୁକ୍ତ ହୋଇ ମନ୍ତ୍ରୀ ପଦ ହରାଇଥିଲେ ।
ବିଜେଡି-ବିଜେପି ମେଣ୍ଟ ଭାଙ୍ଗିଲା ପରେ ୨୦୦୯ ନିର୍ବାଚନରେ ସେ ଭଣ୍ଡାରୀପୋଖରୀ ଏବଂ ୨୦୧୪ ରେ ଚାନ୍ଦବାଲି ଆସନରୁ ନିର୍ବାଚନ ଲଢ଼ି ପରାସ୍ତ ହୋଇଥିଲେ । ଚାନ୍ଦବାଲିରେ ସେ ତୃତୀୟ ସ୍ଥାନରେ ଥିଲେ । ନିର୍ବାଚନ ରାଜନୀତିରେ ବିଫଳ ଶ୍ରୀ ସାମଲ ରାଜ୍ୟ ରାଜନୀତିରୁ ଏକ ପ୍ରକାର ଉଭାନ ହୋଇଗଲେ । ତାଙ୍କର ସାଂଗଠନିକ ଦକ୍ଷତା ଓ ଅଭିଜ୍ଞତା ଦଳ ପାଇଁ ଅଲୋଡ଼ା ହୋଇଯାଇଥିଲା । ମାତ୍ର ଧାମନଗର ଉପନିର୍ବାଚନ ତାଙ୍କ ଭାଗ୍ୟକୁ ପୁଣି ଖୋଲିଦେଲା ।
