୨୦୨୨ ଡିସେମ୍ବର ସୁଦ୍ଧା ହରିଶଙ୍କର, ନୃସିଂହନାଥ କ୍ଷେତ୍ରର ବିକାଶ

ଭୁବନେଶ୍ୱର: ଗଦ୍ଧମାର୍ଦ୍ଧନ ପର୍ବତାଞ୍ଚଳରେ ଥିବା ଦୁଇ ପ୍ରସିଦ୍ଧ ମନ୍ଦିର ହରିଶଙ୍କର ଓ ନୃସିଂହନାଥ ବିକାଶ ଯୋଜନାର ରୂପରେଖ ପ୍ରସ୍ତୁତ ହୋଇଛି । ୨୦୨୨ ଡିସେମ୍ବର ସୁଦ୍ଧା ବିକାଶମୂଳକ କାର୍ଯ୍ୟ ଶେଷ କରିବାକୁ ଲକ୍ଷ୍ୟ ରଖାଯାଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିକଟରେ ଆଜି ଏହାର ମାଷ୍ଟର୍ ପ୍ଲାନ୍ ଉପସ୍ଥାପିତ କରାଯାଇଛି ।

ଅଧିକ ଦର୍ଶକ ଓ ଶ୍ରଦ୍ଧାଳୁଙ୍କୁ ଆକୃଷ୍ଟ କରିବା ଲକ୍ଷ୍ୟରେ ଏହି ଯୋଜନା ପ୍ରସ୍ତୁତ ହୋଇଛି । ଏଥିରେ ସାଂସ୍କୃତିକ, ଧାର୍ମିକ, ପ୍ରାକୃତିକ ପରିବେଶ ଓ ଦୁଃସାହସିକ ପର୍ଯ୍ୟଟନକୁ ଗୁରୁତ୍ୱ ଦିଆଯାଇଛି ।

ମାଷ୍ଟରପ୍ଲାନ୍ ଅନୁଯାୟୀ, ହରିଶଙ୍କର ଓ ନୃସିଂହନାଥରେ ପର୍ଯ୍ୟଟକଙ୍କ ସୁବିଧା ପାଇଁ ପ୍ରଶସ୍ତ ରାସ୍ତା ଓ ଏହାର ସୌନ୍ଦର୍ଯ୍ୟକରଣ ହେବ । ସେଠାରେ ପାର୍କିଂ ଜୋନ୍ ହେବ । ଭେଣ୍ଡିଂ ଜୋନ୍, ରିଲିଜିୟସ୍ ଷ୍ଟ୍ରିଟ୍, କଲଚରାଲ୍ ପ୍ଲାଜାର ସୁବିଧା ହେବ । ପାରମ୍ପରିକ ହର୍ବାଲ୍ ସେଣ୍ଟର କରାଯିବ । ଉଦ୍ୟାନ, ପିକନିକ ଜୋନ୍, କିଡ୍ସ ଜୋନ୍, ଆମ୍ପିଥିଏଟର ରହିବ । ମନ୍ଦିରର ଆଲୋକୀକରଣ, ଧର୍ମଶାଳାର ପୁନରୁଦ୍ଧାର କରାଯିବ । ଭୋଗ ମଣ୍ଡପ ଓ ରୋଷଶାଳାର ପୁନରୁଦ୍ଧାର କରାଯିବ । ୧୮ କିମିର ଟ୍ରେକିଂ ଟ୍ରାକ୍, କାଫେ, ୱାଚ୍ ଟାୱାର୍ ନିର୍ମାଣ କରାଯିବ ।

ହରିଶଙ୍କର ଓ ନୃସିଂହନାଥ ବିକାଶ ସମ୍ପର୍କିତ ଆଜି ଥିଲା ଏହା ତୃତୀୟ ବୈଠକ । ମୁଖ୍ୟମନ୍ତ୍ରୀଙ୍କ ସଚିବ(୫-ଟି) ଭି.କେ.ପାଣ୍ଡିଆନ୍ ଏହାକୁ ସଂଚାଳନ କରିଥିଲେ । ରାଜ୍ୟ ପର୍ଯ୍ୟଟନ ଉନ୍ନୟନ ନିଗମ ଅଧ୍ୟକ୍ଷା ଶ୍ରୀମୟୀ ମିଶ୍ର, ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ଉନ୍ନୟନ କମିଶନର ପ୍ରଦୀପ ଜେନା, ଜଙ୍ଗଲ ବିଭାଗର ଅତିରିକ୍ତ ମୁଖ୍ୟ ଶାସଚ ସଚିବ ଶ୍ରୀମତୀ ମୋନା ଶର୍ମା ଏବଂ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।