ଭୁବନେଶ୍ୱର: ଦଳ ଓ ସରକାର ବିରୋଧୀ ଆଭିମୁଖ୍ୟ ଆପଣାଇଥିବା ଖଣ୍ଡପଡ଼ା ବିଧାୟକ ସୌମ୍ୟରଂଜନ ପଟ୍ଟନାୟକଙ୍କୁ ବିଜେଡିର ବରିଷ୍ଠ ନେତାମାନେ ଘେରିବା ଆରମ୍ଭ କରିଛନ୍ତି । ପୂର୍ବତନ ମନ୍ତ୍ରୀ ତଥା ନୟାଗଡ଼ ବିଧାୟକ ଅରୁଣ ସାହୁ ଗତକାଲି ସୌମ୍ୟଙ୍କ ବିରୋଧରେ ମୁହଁ ଖୋଲିଥିବା ବେଳେ ଆଜି ବରିଷ୍ଠ ମନ୍ତ୍ରୀ ଅତନୁ ସବ୍ୟସାଚୀ ନାୟକ ମୁହଁ ଖୋଲିଛନ୍ତି । ଅରୁଣଙ୍କ ଭଳି ସେ ମଧ୍ୟ ସୌମ୍ୟଙ୍କୁ ବ୍ଲାକମେଲର୍ କହିଛନ୍ତି । ଗୋଟେ ଦଳରେ ରହି ତାକୁ ବ୍ଲାକମେଲିଂ କରିବାର ପ୍ରୟାସ ତାଙ୍କର ସଫଳ ହେବ ନାହିଁ ବୋଲି ଅତନୁ କହିଛନ୍ତି ।
ଅତନୁ କହିଛନ୍ତି, ସୌମ୍ୟବାବୁଙ୍କର ରାଜନୀତି ଇତିହାସ ସମସ୍ତଙ୍କୁ ଜଣା । ସେ କେତେଥର ଯେ ଦଳ ବଦଳେଇଛନ୍ତି, କେଉଁ ଦଳରୁ କେଉଁଠିକି ଆସିଛନ୍ତି, ଆଗାମୀ ଦିନରେ ପୁଣି କୁଆଡ଼େ ଯିବେ ତାହାର ହିସାବ ପାଇବା କଷ୍ଟ । ଗୋଟେ ଦଳରେ ରହି ଦଳକୁ ବ୍ଲାକମେଲିଂ କରିବା ହେଉଛି ତାଙ୍କର ପୁରୁଣା ଅଭ୍ୟାସ । ମାତ୍ର ଏହାକୁ ଆୟୁଧ କରି ଲକ୍ଷ୍ୟସ୍ଥଳରେ ପହଞ୍ଚିବା ତାଙ୍କର ଉଦ୍ୟମ ସଫଳ ହେବ ନାହିଁ ।
ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ମୁଖ୍ୟମନ୍ତ୍ରୀଙ୍କ ଦପ୍ତର ସାରା ରାଜ୍ୟକୁ ଗସ୍ତ କରି ଯଦି ଲୋକଙ୍କଠାରୁ ଅଭିଯୋଗ ଆଣିଲେ ଏବଂ ତାହାର ସମାଧନ ହେଉଛି, ସେଥିରେ ଭୁଲ୍ କେଉଁଠି ରହିଲା ବୋଲି ଅତନୁ ପ୍ରଶ୍ନ କରିଛନ୍ତି । ନିଜର ଖବରକାଗଜରେ ଦଳ ଓ ସରକାର ବିରୋଧରେ ମିଥ୍ୟା ପ୍ରଚାର କଲେ ଲୋକେ ତାହାକୁ ଗ୍ରହଣ କରିବେ ନାହିଁ । ପଥରକୁ ଢ଼େଲା ମାରିଲେ ସେ ପଥର ଫେରିଆସି ତାଙ୍କ ଉପରେ ପଡ଼ିବ ବୋଲି ସତର୍କ କରାଇଛନ୍ତି ଅତନୁ ।
ଅନ୍ୟପକ୍ଷରେ ଅରୁଣ ଓ ଅତନୁଙ୍କ ସମାଲୋଚନାର ଜବାବ ଦେଇଛନ୍ତି ସୌମ୍ୟ । କହିଛନ୍ତି, ସେମାନେ ମନରୁ ଏସବୁ କଥା କହୁଥିବା ମୋର ବିଶ୍ୱାସ ହେଉନାହିଁ । ଏସବୁ କହିବାକୁ ଚାପ ପଡୁଥିବାରୁ ସେମାନେ କହିବାକୁ ବାଧ୍ୟ ହେଉଛନ୍ତି । ବ୍ଲାକମେଲିଂ ସମ୍ପର୍କିତ ସାମ୍ବାଦିକଙ୍କ ପ୍ରଶ୍ନକୁ ସେ ତାତ୍ସଲ୍ୟ କରିଥିବା ବେଳେ ଦଳବଦଳ ଆଚରଣ ସମ୍ପର୍କିତ ପ୍ରଶ୍ନର ଉତ୍ତରରେ ଓଲଟା ମୁଖ୍ୟମନ୍ତ୍ରୀଙ୍କୁ ନିଶାନା କରିଥିଲେ । ମୁଖ୍ୟମନ୍ତ୍ରୀ ମଧ୍ୟ ୧୫ ଦିନରେ ନିଷ୍ପତ୍ତି ବଦଳାଉଥିବା ସେ କହିବା ସହ ପରିବର୍ତ୍ତିତ ସମୟ ସହ ତାଳ ଦେଇ ନିଷ୍ପତ୍ତି ବଦଳାଇବାରେ ଅସୁବିଧା ନାହିଁ ବୋଲି ସଫେଇ ଦେଇଥିଲେ ।
