ଅଡୁଆରେ ମନ୍ତ୍ରୀ ସମୀର ଦାଶ

ଭୁବନେଶ୍ୱର: ବିଜେଡି ଜିଲ୍ଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁଙ୍କ ଆତ୍ମହତ୍ୟା ଘଟଣାରେ ଗଣଶିକ୍ଷା ମନ୍ତ୍ରୀ ସମୀର ଦାଶଙ୍କ ନାଁ ସାମନାକୁ ଆସିଛି । ଆଜି ଏକ ସାମ୍ବାଦିକ ସମ୍ମିଳନୀରେ ବିଜେପି ନେତ୍ରୀ ପ୍ରଭାତୀ ପରିଡ଼ା ଧର୍ମେନ୍ଦ୍ରଙ୍କ ଶେଷ ଅଡିଓ କଲ୍ ଖୁଲାସା କରିଛନ୍ତି । ଆତ୍ମହତ୍ୟା ପୂର୍ବରୁ ଧର୍ମେନ୍ଦ୍ର ତାଙ୍କର ବନ୍ଧୁ ସାମ୍ବାଦିକ ଅକ୍ଷୟ ନାୟକଙ୍କୁ ଏହି କଲ୍ କରିଛନ୍ତି । ରାଜନୈତିକ ଓ ପାରିବାରିକ ଅଶାନ୍ତି କାରଣରୁ ସେ କଠୋର ନିଷ୍ପତ୍ତି ନେବାକୁ ଯାଉଛନ୍ତି ଏବଂ ସେଥିପାଇଁ ମନ୍ତ୍ରୀ ଶ୍ରୀ ଦାଶଙ୍କ ସହ ତାଙ୍କର ପତ୍ନୀ, ଶ୍ୱଶୁର ଏମିତି ୭ ଜଣଙ୍କୁ ଦାୟୀ କରିଛନ୍ତି । ସାମ୍ବାଦିକ ସମ୍ମିଳନୀରେ ନିଜେ ସାମ୍ବାଦିକ ଅକ୍ଷୟ ନାୟକ ଉପସ୍ଥିତ ରହି ଧର୍ମେନ୍ଦ୍ର ତାଙ୍କ ସହ କରିଥିବା କଥାବାର୍ତ୍ତା ବଖାଣିଥିଲେ ।

ଅକ୍ଷୟଙ୍କ କହିବାନୁଯାୟୀ, ଆତ୍ମହତ୍ୟା କରିବା ରାତିରେ ହିଁ ରାତି ୧୧ଟାରୁ ୧୨ଟା ଭିତରେ ଧର୍ମେନ୍ଦ୍ର ତାଙ୍କୁ ଫୋନ୍ କରି ପ୍ରାୟ ଘଣ୍ଟାଏ କାଳ କଥାବାର୍ତ୍ତା କରିଥିଲେ । ତାଙ୍କୁ ଅତି ଆତ୍ମୀୟ ବନ୍ଧୁ ଭାବୁଥିବାରୁ ମନର କଷ୍ଟ କହୁଛନ୍ତି ଏବଂ ଏହା ଶେଷ କଲ୍ ହୋଇପାରେ ବୋଲି ଜଣାଇ ଦେଇଥିଲେ । ଏହାକୁ ରେକର୍ଡ କରି ପଛରେ ସାର୍ବଜନୀନ କରିବାକୁ ମଧ୍ୟ କହିଥିଲେ ।

ରାଜନୈତିକ, ପାରିବାରିକ ଏବଂ ଆର୍ଥିକ ସମସ୍ୟାରେ ସେ ଭାରାକ୍ରାନ୍ତ ହୋଇଥିଲେ ଏବଂ ଏଥିପାଇଁ ମନ୍ତ୍ରୀ ସମୀର ଦାଶ, ପତ୍ନୀ, ଶ୍ୱଶୁରଙ୍କ ସମେତ ମୋଟ ୭ ଜଣଙ୍କ ନାଁ ନେଇ ସେମାନଙ୍କୁ ଦାୟୀ କରିଥିଲେ । ବିଭିନ୍ନ ସମୟରେ ସମୀର ଦାଶ ତାଙ୍କୁ ଅକଥନୀୟ ନିର୍ଯ୍ୟାତନା ଦେଉଥିଲେ । ଗାଳିମନ୍ଦ କରି କୁତ୍ସାରଟନା କରୁଥିବା ଧର୍ମେନ୍ଦ୍ର କହିଥିଲେ ।

ଧର୍ମେନ୍ଦ୍ରଙ୍କ ଆତ୍ମହତ୍ୟା ଘଟଣାରେ ମନ୍ତ୍ରୀ ଶ୍ରୀ ଦାଶଙ୍କୁ ପୂର୍ବରୁ ସିଧାସଳଖ ଦାୟୀ କରିଥିଲେ ପ୍ରଭାତୀ ପରିଡ଼ା । ଘଟଣାର ନିରପେକ୍ଷ ତଦନ୍ତ ପାଇଁ ଗତକାଲି ବିଜେପିର ଏକ ପ୍ରତିନିଧି ଦଳ ପୁଲିସ କମିସନରଙ୍କୁ ଭେଟିଥିଲେ । ଆଜି ସାମ୍ବାଦିକ ସମ୍ମିଳନୀ କରି ସେହି ଚର୍ଚ୍ଚିତ ଅଡିଓ କଲ୍ ଖୁଲାସା କରିଛନ୍ତି ।

ପ୍ରଭାତୀ ଏବଂ ଅକ୍ଷୟଙ୍କ ସହ ବ୍ରହ୍ମଗିରି ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର, ପୁରୀ ଜିଲ୍ଲା ବିଜେପି ସଭାପତି ଆଶ୍ରିତ ପଟ୍ଟନାୟକ, ବିଜେପି ଗଣମାଧ୍ୟମ ମୁଖ୍ୟ ଦିଲ୍ଲୀପ ମଲ୍ଲିକ ସାମ୍ବାଦିକ ସମ୍ମିଳନୀରେ ଉପସ୍ଥିତ ଥିଲେ । ମନ୍ତ୍ରୀ ସମୀର ଦାଶଙ୍କୁ ବହିଷ୍କାର କରାଯିବା ସହ ତାଙ୍କ ବିରୋଧରେ ହତ୍ୟା ମାମଲା ରୁଜୁ ପାଇଁ ସେମାନେ ଦାବି କରିଛନ୍ତି ।

ତେବେ ଏହା ଉପରେ ମନ୍ତ୍ରୀଙ୍କ ପ୍ରତିକ୍ରିୟା ମିଳିନାହିଁ ।