ଭୁବନେଶ୍ୱର: ବାଲେଶ୍ୱର ଏଫଏମ କଲେଜ ଛାତ୍ରୀ ସୌମ୍ୟାଶ୍ରୀ ଆତ୍ମାହୁତି ଘଟଣାକୁ ନେଇ ସାରା ରାଜ୍ୟ ହୁଲସ୍ତୁଲ ହେଉଥିବା ବେଳେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ାଙ୍କ ନିର୍ବାଚନମଣ୍ଡଳୀ ପୁରୀ ଜିଲ୍ଲା ବଳଙ୍ଗା ଅଞ୍ଚଳରେ ଆଜି ଏକ ଜଘନ୍ୟ ଓ ଭୟଙ୍କର କାଣ୍ଡ ଘଟିଛି । ଯୁକ୍ତ ଦୁଇ ପାଠ ପଢ଼ୁଥିବା ଜଣେ ୧୫ ବର୍ଷୀୟା ନାବାଳିକାଙ୍କୁ କିଛି ଦୁର୍ବୃତ୍ତ କିରୋସିନୀ ଢ଼ାଳି ଜାଳି ଦେଇଛନ୍ତି । ଏଥିରେ ତାଙ୍କ ଶରୀରର ୭୦ ପ୍ରତିଶତ ଅଂଶ ପୋଡ଼ିଯାଇଛି । ଗୁରୁତର ଅବସ୍ଥାରେ ତାଙ୍କୁ ଭୁବନେଶ୍ୱର ଏମସ୍ ରେ ଭର୍ତ୍ତି କରାଯାଇଛି । ତାଙ୍କ ଅବସ୍ଥା ସଙ୍କଟାପନ୍ନ ଥିବା ଏମସ ପକ୍ଷରୁ କୁହାଯାଇଛି । ପାରିପାଶ୍ୱିର୍କ ଅବସ୍ଥାରୁ ତାଙ୍କୁ ପ୍ରଥମେ ବଳାତ୍କାର ଉଦ୍ୟମ କରାଯାଇଥିବା ସନ୍ଦେହ କରାଯାଉଛି । ଏହି ଜଘନ୍ୟ ଘଟଣାଟି ସାରା ରାଜ୍ୟରେ ପୁଣି ଆଲୋଡ଼ନ ସୃଷ୍ଟି କରିଛି ।
ଆଜି ସକାଳ ସାଢ଼େ ୮ଟା ବେଳେ ଏହି ଅଘଟଣ ଘଟିଛି । ନିମାପଡ଼ା ବିଧାନସଭା ନିର୍ବାଚନମଣ୍ଡଳୀର ବଳଙ୍ଗା ଥାନା ଏବଂ ଗୋପୀନାଥପୁର ପଞ୍ଚାୟତ ଅନ୍ତର୍ଗତ ନୂଆ ଗୋପାଳପୁର ମୁସଲିମ୍ ସାହିର ଜଣେ ଯୁକ୍ତ ଦୁଇ ଛାତ୍ରୀ ତାଙ୍କର ଜଣେ ସାଙ୍ଗକୁ ବହି ଫେରାଇବାକୁ ଯାଉଛନ୍ତି କହି ଘରୁ ବାହାରକୁ ଯାଇଥିଲେ । ତେବେ ଘରଠାରୁ ମାତ୍ର ୧୦୦ ମିଟର ଦୂରରେ ପହଞ୍ଚିଥିଲା ବେଳେ ହଠାତ୍ ଏକ ମଟରସାଇକେଲରୁ ୩ ଜଣ ଦୁର୍ବୃତ୍ତ ନାବାଳିକାଙ୍କ ମୁହଁରେ ରୁମାଲ୍ ବାନ୍ଧି ଟେକି ନେଇଥିଲେ । ଅନତି ଦୂରରେ ଥିବା ବାୟାବର ଗ୍ରାମ ନିକଟବର୍ତ୍ତୀ ଭାର୍ଗବୀ ନଦୀପଠାର ଏକ ନିକାଞ୍ଚନ ଜାଗାକୁ ସେମାନେ ତାଙ୍କୁ ଆଣିଥିଲେ । ସେଠାରେ ଝିଅଟିକୁ ସେମାନେ କ’ଣ କରିଥିଲେ ତାହା ସ୍ପଷ୍ଟ ହୋଇ ନ ଥିଲା ବେଳେ ଦୁର୍ବୃତ୍ତମାନେ ତାଙ୍କ ଉପରେ କିରୋସିନୀ ଢ଼ାଳି ନିଆଁ ଲଗାଇ ଘଟଣାସ୍ଥଳରୁ ଚମ୍ପଟ୍ ମାରିଥିଲେ ।
ଝିଅଟି ହୁତୁ ହୁତୁ ଜଳୁଥିବା ବେଳେ ବଞ୍ଚାଅ ବଞ୍ଚାଅ ଚିତ୍କାର କରି ଗାଁ ଆଡକୁ ଦୌଡ଼ି ଦୁଃଖିଶ୍ୟାମ ସେନାପତି ନାମକ ଜନୈକ ବ୍ୟକ୍ତିଙ୍କ ଘରେ ପଶି ଯାଇଥିଲେ । ସେତେବେଳେ ତାଙ୍କ ଦେହରେ କିଛି ପୋଷାକ ନ ଥିଲା । ତାଙ୍କୁ ଏଭଳି ଅବସ୍ଥାରେ ଦେଖି ଦୁଃଖିଶ୍ୟାମ ଚମକି ଯାଇଥିଲେ ମଧ୍ୟ ସାହାସର ସହ ତାଙ୍କର ଜୀବନ ବଞ୍ଚାଇବାକୁ ଲାଗି ପଡ଼ିଥିଲେ । ଝିଅଟିର ଦେହରୁ ନିଆଁ ଲିଭାଇ ଫ୍ୟାନ୍ ତଳେ ଶୁଆଇ ତାଙ୍କୁ ପୋଷାକ ପିନ୍ଧାଇ ଦେଇଥିଲେ । ଅନ୍ୟମାନଙ୍କ ସହାୟତାରେ ଝିଅଟିର ଚିକିତ୍ସା ପାଇଁ ପ୍ରଥମେ ବଳଙ୍ଗା ଡାକ୍ତରଖାନା ଏବଂ ସେଠାରୁ ଏମସ୍ ଅଣାଯାଇଥିଲା ।
ଝିଅଟିକୁ ଉଦ୍ଧାର କରିଥିବା ଦୁଃଖିଶ୍ୟାମଙ୍କ କହିବାନୁଯାୟୀ, ଘଟଣା ସମ୍ପର୍କରେ ସେ ଝିଅ ବିଶେଷ କିଛି କହିନାହିଁ । କେବଳ ଘରୁ ବହି ଫେରାଇବାକୁ ଜଣେ ସାଙ୍ଗଙ୍କ ପାଖକୁ ଯାଉଥିବା ବେଳେ ମଟରସାଇକେଲରେ ୩ ଜଣ ଦୁର୍ବୃତ୍ତ ତାଙ୍କୁ ନଦୀପଠାକୁ ଟେକି ନେଇଥିଲେ ଏବଂ କିରୋସିନୀ ଢ଼ାଳି ନିଆଁ ଲଗାଇଥିବା କହିଛନ୍ତି । ସେମାନେ କିଏ ବୋଲି ପଚାରିବାରୁ ତାଙ୍କୁ ଚିହ୍ନିନାହାନ୍ତି ବୋଲି କହିଛନ୍ତି । ତାଙ୍କ ପ୍ରତି ଆଉ କ’ଣ ହୋଇଛି କି କ’ଣ ଅଧିକ କହିପାରିନାହାନ୍ତି ।
ଘଟଣାସ୍ଥଳରେ ପୀଡ଼ିତାଙ୍କ ପୋଷାକ, ଚପଲ, ଚୁଡି, କାନ ରିଙ୍ଗ୍ ପଡ଼ିଥିଲା । ପୁଲିସ ତାହାକୁ ଜବତ କରିବା ପରେ ସାଇଣ୍ଟିଫିକ୍ ଟିମ୍ ଦ୍ୱାରା ଅନୁସନ୍ଧାନ ଆରମ୍ଭ ହୋଇଛି । ପୁରୀ ଏସପି ପିନାକ ମିଶ୍ର ଏବଂ ଅନ୍ୟ ଅଧିକାରୀମାନେ ଘଟଣାସ୍ଥଳରେ ଛାନଭିନ୍ କରୁଛନ୍ତି । ତେବେ ଝିଅର ଦେହରୁ ପୋଷାକ, ଚୁଡ଼ି, କାନ ରିଙ୍ଗ୍ କେମିତି ବାହାରିଲା ତାହାର ଅନୁସନ୍ଧାନକୁ ସମସ୍ତଙ୍କର ଅପେକ୍ଷା ଅଛି । କାରଣ ପାରିପାଶ୍ୱିର୍କ ଅବସ୍ଥାରୁ ତାଙ୍କୁ ଅପହରଣ କରାଯାଇ ବଳାତ୍କାର ଉଦ୍ୟମ ହୋଇଥିବା ସନ୍ଦେହ କରାଯାଉଛି ।
ଘଟଣାଟି ସାରା ରାଜ୍ୟରେ ଆଲୋଡ଼ନ ସୃଷ୍ଟି କରିଥିବା ବେଳେ ରାଜ୍ୟରେ ମହିଳା ହିଂସା ତଥା ଆଇନଶୃଙ୍ଖଳା ପରିସ୍ଥିତିକୁ ନେଇ ବିରୋଧୀ ଦଳ ରଣହୁଙ୍କାର ଦେଇଛନ୍ତି । ଏମସ୍ ରେ ପୀଡ଼ିତାଙ୍କ ସ୍ୱାସ୍ଥ୍ୟାବସ୍ଥା ବୁଝିବା ପାଇଁ ବିଜେଡି ଓ କଂଗ୍ରେସ ନେତାଙ୍କ ଭିଡ଼ ଲାଗିଥିବା ବେଳେ ଯୁବ ଓ ଛାତ୍ର କର୍ମୀମାନେ ସରକାରଙ୍କ ଅପାରଗତା ବିରୋଧରେ ରାଗ ଝାଡ଼ିଛନ୍ତି । ଭିତରକୁ ବିରୋଧୀ ଦଳର ନେତାମାନଙ୍କୁ ଛଡ଼ା ଯାଉ ନ ଥିବା ବେଳେ ଶାସକ ଦଳର ଦୁଇ ବିଧାୟକ ବାବୁ ସିଂ ଓ ଆଶ୍ରିତ ପଟ୍ଟନାୟକ ଭିତରକୁ ଯାଉଥିବା ବେଳେ ବିରୋଧୀ ଦଳର ଯୁବ ଓ ଛାତ୍ର କର୍ମୀମାନେ ପ୍ରତିରୋଧ କରିଥିଲେ । ଦୁହିଁଙ୍କୁ ଯିବାକୁ ଦେଇ ନ ଥିଲେ । ଏହାକୁ ନେଇ ପ୍ରବଳ ଉତ୍ତେଜନା ଦେଖିବାକୁ ମିଳିଥିଲା ।
ଅନ୍ୟପକ୍ଷରେ ବଳଙ୍ଗାର ଏହି ବର୍ବର କାଣ୍ଡକୁ ନେଇ ସମସ୍ତଙ୍କ ଟାର୍ଗେଟ୍ କୁ ଆସିଛନ୍ତି ସ୍ଥାନୀୟ ବିଧାୟିକା ତଥା ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା । ଟୁଇଟ୍ କରି ସେ ଏହି ଏଘଟଣ ପାଇଁ ନିଜର ବ୍ୟଥା ଜଣାଇଥିଲେ ମଧ୍ୟ ବିରୋଧୀଙ୍କ ରୋଷର ଶିକାର ହୋଇଛନ୍ତି । ତାଙ୍କର ଇସ୍ତଫା ଦାବିରେ ମହିଳା କଂଗ୍ରେସ କର୍ମୀମାନେ ତାଙ୍କ ବାସଭବନ ଘେରାଉ କରିଛନ୍ତି ।
ବିଜେଡି ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ଏହି ଘଟଣାର ତୀବ୍ର ନିନ୍ଦା କରିବା ସହ ସରକାରଙ୍କ ନିଷ୍କ୍ରିୟତାର ସମାଲୋଚନା କରିଛନ୍ତି । ସରକାରଙ୍କ ନିଷ୍କ୍ରିୟତା ଏବଂ ରାଜନୈତିକ ପୃଷ୍ଠପୋଷକତା ଯୋଗୁଁ ରାଜ୍ୟରେ ମହିଳାମାନେ ସମ୍ପୂର୍ଣ୍ଣ ଅସୁରକ୍ଷିତ ହୋଇପଡ଼ିଥିବା ସେ କହିଛନ୍ତି । ଅପରାଧୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ସହ ଏଭଳି ଘଟଣାର ପୁନରାବୃତ୍ତି ନ ହେବା ପାଇଁ ଓଡ଼ିଶାର ଛାତ୍ରୀ ଏବଂ ମହିଳାମାନଙ୍କୁ ସରକାର ନିର୍ଭର ପ୍ରତିଶ୍ରୁତି ଦେବେ କି ବୋଲି ଶ୍ରୀ ପଟ୍ଟନାୟକ ପଚାରିଛନ୍ତି ।
ପିସିସି ସଭାପତି ଭକ୍ତଚରଣ ଦାସ ମଧ୍ୟ ଏହି ଘଟଣାରେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । ସରକାର, ପ୍ରଶାସନ ଓ ପୁଲିସ ପ୍ରତି ଅପରାଧୀମାନଙ୍କର ଆଉ ଭୟ ନାହିଁ । ଛାତ୍ରୀ ଓ ମହିଳାମାନେ ଅସୁରକ୍ଷିତ । ଏତିକିବେଳେ ବିଜେପି ସରକାର ଅତ୍ୟନ୍ତ ସମ୍ବେଦନଶୂନ୍ୟ ହୋଇ ନିଜର ଡିଣ୍ଡିମ ପିଟି ଚାଲିବା ଦୁର୍ଭାଗ୍ୟଜନକ ବୋଲି ସେ କହିଛନ୍ତି ।
