ଭୁବନେଶ୍ୱର: ଦକ୍ଷିଣ-ପଶ୍ଚିମ ମୌସୁମୀ ବାୟୁ ଆଜି ଓଡ଼ିଶାରେ ପ୍ରବେଶ କରିଛି । ମାଲକାନଗିରି, କୋରାପୁଟ ଏବଂ ଗଜପତି ଜିଲ୍ଲାକୁ ଏହା ଛୁଇଁଥିବା ବେଳେ ଆଗାମୀ ୨ ଦିନ ମଧ୍ୟରେ ସାରା ରାଜ୍ୟକୁ ଅଗ୍ରସର ହେବ ବୋଲି ଭୁବନେଶ୍ୱର ପାଣିପାଗ ବିଭାଗ ପକ୍ଷରୁ ଆକଳନ କରାଯାଇଛି । ଏହାର ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ବର୍ଷା ଆରମ୍ଭ ହୋଇଛି । ଆଜି ଅଢ଼େଇ ଘଣ୍ଟାରେ ଭୁବନେଶ୍ୱରରେ ୯୦.୪ ମିଲିମିଟର ବର୍ଷା ରେକର୍ଡ କରାଯାଇଛି ।
ମୌସୁମୀ ପ୍ରବେଶ ଯୋଗୁଁ ଦକ୍ଷିଣ ଓଡ଼ିଶାର ବିଭିନ୍ନ ଜିଲ୍ଲାରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହୋଇଛି । କଟକ, ଭୁବନେଶ୍ୱର ସମେତ ଉପକୂଳ ଓ ଆଭ୍ୟନ୍ତରୀଣ ଜିଲ୍ଲାରେ ପ୍ରାକ୍ ମୋ÷ସୁମୀ ବର୍ଷା ମଧ୍ୟ ଆରମ୍ଭ ହୋଇଛି । ମାଲକାନଗିରି, କୋରାପୁଟ, ଗଜପତି ସମେତ ଆଜି ନବରଙ୍ଗପୁର, କଳାହାଣ୍ଡି, ରାୟଗଡ଼ା ଜିଲ୍ଲାରେ ଆଜି ପ୍ରବଳ ବର୍ଷା ସମ୍ଭାବନା ରହିଛି । ବରଗଡ଼, ସମ୍ବଲପୁର, ଅନୁଗୁଳ, ଢ଼େଙ୍କାନାଳ, ଭଦ୍ରକ ଓ ବାଲେଶ୍ୱର ଜିଲ୍ଲାରେ ମଧ୍ୟ ଘଡ଼ଘଡ଼ି ସହ ବର୍ଷା ସମ୍ଭାବନା ରହିଛି । ଏ ସମସ୍ତ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି ହୋଇଛି ।
ପ୍ରାକ୍ ମୌସୁମୀ ପ୍ରଥମ ବର୍ଷାରେ ରାଜଧାନୀ ଭୁବନେଶ୍ୱରର ଅବସ୍ଥା ବେହାଲ ହୋଇଯାଇଛି । ଇସକନ୍ ମନ୍ଦିର ସାମନା ରାସ୍ତାରେ ଯଥା ପୂର୍ବଂ ତଥା ପରଂ ଅବସ୍ଥା ଦେଖିବାକୁ ମିଳିଥିବା ବେଳେ ମାଉସୀମାରୁ ଲିଙ୍ଗରାଜ ମନ୍ଦିର ପର୍ଯ୍ୟନ୍ତ ଯାଇଥିବା ରଥରୋଡ୍ ରେ ଆଣ୍ଠୁଏ ଉଚ୍ଚରେ ପାଣିର ସୁଅ ଛୁଟିଥିଲା । ଜାଗମରା, ଖଣ୍ଡଗିରି, ରସୁଲଗଡ଼ ପ୍ରଭୃତି ଅଞ୍ଚଳରେ ମଧ୍ୟ ରାସ୍ତା ଉପରେ ବର୍ଷାପାଣିର ସୁଅ ଛୁଟିଥିଲା । ରାସ୍ତାର ବିଭିନ୍ନ ଜାଗାରେ ନିର୍ମାଣ କାର୍ଯ୍ୟ ଚାଲୁଥିବାରୁ ପାଣି ନିଷ୍କାସନ ସମସ୍ୟା ସୃଷ୍ଟି ହୋଇ ସଙ୍ଗୀନ ଅବସ୍ଥା ସୃଷ୍ଟି କରିଥିଲା । ଏଥିଯୋଗୁଁ ଲୋକମାନଙ୍କୁ ନାହିଁ ନ ଥିବା ଦୁର୍ଦ୍ଦଶା ଭୋଗିବାକୁ ପଡ଼ିଛି ।
ବିିଏମସି ମେୟର ସୁଲୋଚନା ଦାସ ଏବଂ ଅନ୍ୟ ଅଧିକାରୀଗଣ ଚିରାଚରିତ ଢ଼ଙ୍ଗରେ ଏଥର ମଧ୍ୟ ବର୍ଷା ବିତ୍ପାତ ଜାଗାଗୁଡ଼ିକୁ ଯାଇ ଆଶ୍ୱାସନାର ବାଣୀ ଶୁଣାଇଥିଲେ । ମାତ୍ର ସ୍ଥାନୀୟ ଲୋକମାନଙ୍କୁ ଏହି ଅଧିକ କ୍ଷୁବ୍ଧ କରୁଥିବା ଦେଖିବାକୁ ମିଳିଛି । ଆଗାମୀ ବର୍ଷା ଋତୁରେ ରାଜଧାନୀର ଅବସ୍ଥା କିଭଳି ହେବ ଏବଂ ବିଏମସି ଲୋକଙ୍କ କ୍ରୋଧକୁ କିଭଳି ସାମନା କରିବ ତାହା ଏବେ ବଡ଼ ପ୍ରଶ୍ନ ସୃଷ୍ଟି କରିଛି ।
