ମୁଖ୍ୟମନ୍ତ୍ରୀଙ୍କୁ ଭେଟିବାକୁ ନାକେଦମ୍ କଲେ

ଭୁବନେଶ୍ୱର: ୫୦ ଫୁଟରୁ ଅଧିକ ଉଚ୍ଚତାର ବିଜ୍ଞାପନ ହୋର୍ଡିଂ । ତା’ ଉପରେ ଅତ୍ୟନ୍ତ ବିପଜ୍ଜନକ ଅବସ୍ଥାରେ ବସିଥିଲେ ଯୁବକ ଜଣଙ୍କ । ଗୋଟେ ହାତରେ ଧରିଥିଲେ ଏକ ବୋତଲ । ଯେଉଁଥିରେ ଥିଲା କିଛି ତରଳ ପଦାର୍ଥ । ଅନ୍ୟ ହାତରେ ଥିଲା ଏକ ଲାଇଟର୍ । ତଳକୁ ଓହ୍ଲାଇ ଆସିବା ପାଇଁ କାହାରି ଅନୁରୋଧକୁ ଶୁଣୁ ନ ଥିଲେ । କିଏ ଡାକିଲେ, ସେଇ ବୋତଲ ଓ ଲାଇଟର ଦେଖାଇ ଆତ୍ମାହୂତିର ଧମକ ଦେଉଥିଲେ । ଦୀର୍ଘ ସାଢ଼େ ୪ ଘଣ୍ଟା ପରେ ତାଙ୍କୁ ସୁରକ୍ଷିତ ଅବସ୍ଥାରେ ଉଦ୍ଧାର କରିଛନ୍ତି ଅଗ୍ନିଶମ ବାହିନୀ ।

ଭୁବନେଶ୍ୱର ଶିଶୁଭବନ ଛକରେ ଥିବା ବିଜ୍ଞାପନ ହୋର୍ଡିଂ ଉପରକୁ ଚଢ଼ିଥିବା ଏହି ଯୁବକ ହେଉଛନ୍ତି ରାଉରକେଲାର ସାମାଜିକ କର୍ମୀ ମୁକ୍ତିକାନ୍ତ ବିଶ୍ୱାଳ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟି ରାଉରକେଲାର ଦାବି ଜଣାଇବା ପାଇଁ ଆସିଥିଲେ । ମାତ୍ର ପୁଲିସ ତାଙ୍କୁ ନବୀନ ନିବାସ ଯିବାକୁ ଦେଇ ନ ଥିଲା । ୬ ଦିନର ଅପେକ୍ଷା ପରେ ପ୍ରତିବାଦ ଜଣାଇବାକୁ ଯାଇ ଆଜି ଦିନ ୧୧ଟାରେ ଶିଶୁଭବନ ଛକରେ ଲାଗିଥିବା ବିଜ୍ଞାପନ ହୋର୍ଡିଂ ଉପରକୁ ଚଢ଼ି ଯାଇଥିଲେ । ସେତେବେଳକୁ ଛକ ବେଶ୍ ଗହଳି ଥିଲା । ଟ୍ରାଫିକ୍ ନିୟନ୍ତ୍ରଣ ପାଇଁ ପୁଲିସ କର୍ମଚାରୀମାନେ ମଧ୍ୟ ଉପସ୍ଥିତ ଥିଲେ । ମାତ୍ର ନିମିଷକ ମଧ୍ୟରେ ସବୁ କିଛି ଘଟି ଯାଇଥିଲା ।

ବିଜ୍ଞାପନ ହୋର୍ଡିଂ ଉପରେ ଚଢ଼ିଥିବା ମୁକ୍ତିକାନ୍ତଙ୍କର ଜିଦ୍ ଥିଲା ମୁଖ୍ୟମନ୍ତ୍ରୀ ତାଙ୍କୁ ଭେଟିବାକୁ ସମୟ ଦିଅନ୍ତୁ । ନଚେତ୍ ତଳକୁ ଓହ୍ଲାଇବେ ନାହିଁ । ମୁଖ୍ୟମନ୍ତ୍ରୀ ତାଙ୍କ ଗୁହାରୀ ନ ଶୁଣିଲେ ଦେହରେ ଡିଜେଲ୍ ଢ଼ାଳି ଆତ୍ମହତ୍ୟା କରିଦେବେ ବୋଲିଧମକ ଦେଇଥିଲେ । ଏଥିପାଇଁ ସାଢ଼େ ତିନିଟା ଡେଡଲାଇନ୍ ବି ଦେଇଥିଲେ । ଅତ୍ୟନ୍ତ ବିପଜ୍ଜନକ ଅବସ୍ଥାରେ ଉପରେ ଥିବା ମୁକ୍ତିକାନ୍ତଙ୍କୁ ତଳକୁ ଓହ୍ଲାଇ ଆସିବା ପାଇଁ ତାଙ୍କର କିଛି ସହଯୋଗୀ ପରାମର୍ଶ ଦେଇଥିଲେ । ରାଉରକେଲାରେ ଥିବା ତାଙ୍କ ପରିବାର ସଦସ୍ୟମାନେ ମଧ୍ୟ ମୁକ୍ତିକାନ୍ତଙ୍କୁ ଫୋନ୍ କରି ଓହ୍ଲାଇ ଆସିବା ପାଇଁ ନେହୁରା ହୋଇଥିଲେ । ମାତ୍ର ସେ କାହାରି କଥା ଶୁଣି ନ ଥିଲେ ।

ତାଙ୍କୁ ସୁରକ୍ଷିତ ଭାବେ ଉଦ୍ଧାର କରିବା ପାଇଁ ଅଗ୍ନିଶମ ବାହିନୀର ତିନୋଟି ଗାଡ଼ି ପହଞ୍ଚିଥିଲା । ଉଦ୍ଧାର ସରଞ୍ଜାମ ଧରି କର୍ମଚାରୀମାନେ ପ୍ରସ୍ତୁତ ହୋଇଥିଲେ ମଧ୍ୟ ମୁକ୍ତିକାନ୍ତଙ୍କ ପାଖରେ ପହଞ୍ଚବା ସହଜ ନ ଥିଲା । କାରଣ ସେଠାରେ ପାଦ ପାଦରେ ବିପଦ ଥିଲା । ହାତରେ ବୋତଲ ଧରିଥିବା ମୁକ୍ତିକାନ୍ତ ବାରମ୍ବାର ଆତ୍ମାହୂତିର ଧମକ ଦେଉଥିଲେ । ସେ ତଳକୁ ଡେଇଁପଡ଼ିବାର ବି ଆଶଙ୍କା ଥିଲା ।

ଅଗ୍ନିଶମ ବାହିନୀ କର୍ମଚାରୀମାନେ ଦୀର୍ଘ ୩ ଘଣ୍ଟା ଧରି ନାଚାର ଅବସ୍ଥାରେ ରହିବା ପରେ ଅତି ସନ୍ତର୍ପଣରେ ଉଦ୍ଧାର ଯୋଜନା କାର୍ଯ୍ୟକାରୀ କରିଥିଲେ । ଡେଡଲାଇନ୍ ପାଖେଇ ଆସୁଥିଲା ବେଳେ ଅଗ୍ନିଶମ ବାହିନୀର ଏକ ଟିମ୍ ପଛପଟୁ ସେଇ ହୋର୍ଡିଂ ଟାୱାରରେ ଚଢ଼ିବା ଆରମ୍ଭ କରିଥିଲେ । ଆଗପଟୁ ଅଗ୍ନିଶମ ବାହିନୀର ହାଇଡ୍ରୋଲିକ୍ ମେସିନ୍ ନିୟୋଜିତ କରାଯାଇଥିଲା ।

ଉଭୟ ପଟୁ ଉଦ୍ଧାରକାରୀ ଦଳକୁ ପାଖକୁ ଆସୁଥିବା ଦେଖି ମୁକ୍ତିକାନ୍ତ ନିଜ ଦେହରେ ନିଆଁ ଲଗାଇବାକୁ ଉଦ୍ୟମ କରିଥିଲେ । ମାତ୍ର ଅଗ୍ନିଶମ ବାହିନୀ ପକ୍ଷରୁ ତାଙ୍କ ଉପରକୁ ପାଣି ମାଡ଼ କରାଯାଇଥିଲା । ଗୋଟେ ଟିମ୍ ଆସ୍ତେ ଆସ୍ତେ ଉପରକୁ ଚଢ଼ିଥିଲେ । ଆଗପଟୁ ହାଇଡ୍ରୋଲିକ୍ ମେସିନ ନେଇ ଅନ୍ୟ ଟିମ୍ ବି ପହଞ୍ଚି ଯାଇଥିଲେ । ତା’ ପରେ ତାଙ୍କୁ ସେଠାରେ କାବୁ କରି ତଳକୁ ଅଣାଯାଇଥିଲା । ମାତ୍ର ୭ ମିନିଟ୍ ର ଏହି ଅପରେସନ୍ ଥିଲା ।

ତଳକୁ ଆଣିବା ପରେ ସ୍ୱାସ୍ଥ୍ୟ ପରୀକ୍ଷା ପାଇଁ ତାଙ୍କୁ ଏକ ଆମ୍ବୁଲାନସ୍ ରେ କ୍ୟାପିଟାଲ୍ ହସ୍ପିଟାଲ୍ ନିଆଯାଇଥିଲା । ତାଙ୍କର ଏ ଲଢ଼େଇ ଜାରି ରହିବ ବୋଲି ଗଣମାଧ୍ୟମ କ୍ୟାମେରା ଆଗରେ ଚିଲ୍ଲାଇଥିଲେ ମୁକ୍ତିକାନ୍ତ । ତାଙ୍କୁ ଗିରଫ କଲେ ସେ ଅନଶନ କରିବେ ବୋଲି ମଧ୍ୟ ଧମକ ଦେଇଥିଲେ ।

ସୂଚନାଯୋଗ୍ୟ, ଗତ ନଭେମ୍ବର ୧୬ ତାରିଖରେ ମୁକ୍ତିକାନ୍ତ ରାଉରକେଲାରୁ ବାହାରିଥିଲେ । ଦୀର୍ଘ ୫୩୦ କିମି ରାସ୍ତାକୁ ସେ କାନ୍ଧରେ ଏକ ୩୦ କେଜିଆ ଭାର ଧରି ପଦଯାତ୍ରାରେ ଆସିଥିଲେ । ଡିସେମ୍ବର ୧୬ ତାରିଖରେ ଭୁବନେଶ୍ୱରରେ ପହଞ୍ଚିଥିଲେ ।

ପୂର୍ବରୁ ୨୦୧୮ ମସିହା ଅଗଷ୍ଟ ମାସରେ ମୁକ୍ତିକାନ୍ତ ମୁଖ୍ୟମନ୍ତ୍ରୀଙ୍କୁ ନବୀନ ନିବାସରେ ଭେଟିଥିଲେ । ୨୦୧୩ ମସିହାରେ ମୁଖ୍ୟମନ୍ତ୍ରୀ ରାଉରକେଲାବାସୀଙ୍କୁ ଦେଇଥିବା ପ୍ରତିଶ୍ରୁତି କଥାକୁ ସେ ଏକ ସ୍ମାରକପତ୍ର ଜରିଆରେ ଦୃଷ୍ଟି ଆକର୍ଷଣ କରିଥିଲେ । ରାଉରକେଲା ଇସ୍ପାତ ଜେନେରାଲ୍ ହସ୍ପିଟାଲ୍ କୁ ସୁପର ସ୍ପେଶାଲିଷ୍ଟ ହସ୍ପିଟାଲ୍ କରିବା, ବ୍ରାହ୍ମଣୀ ନଦୀରେ ଦ୍ୱିତୀୟ ସେତୁ ନିର୍ମାଣ, କୋଏଲ୍ ନଦୀରେ ବ୍ୟାରେଜ୍ ନିର୍ମାଣ ପାଇଁ ଏଥିରେ ଉଲ୍ଲେଖ ଥିଲା ।

ଏହାପୂର୍ବରୁ ୨୦୧୮ ଏପ୍ରିଲ୍ ୧୬ ରେ ମୁକ୍ତିକାନ୍ତ ରାଉରକେଲାରୁ ୧୩୫୦ କିମି ପଦଯାତ୍ରାରେ ଦିଲ୍ଲୀ ଯାଇଥିଲେ । ୨୦୧୫ ଏପ୍ରିଲ୍ ପହିଲାରେ ରାଉରକେଲା ଆସିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଇସ୍ପାତ ଜେନେରାଲ୍ ହସ୍ପିଟାଲ୍ ର ଅପଗ୍ରେଡସନ୍ ପାଇଁ ପ୍ରତିଶ୍ରୁତି ଦେଇଥିଲେ । ମାତ୍ର ତାହା କାର୍ଯ୍ୟକାରୀ ହୋଇ ନ ଥିବାରୁ ଦିଲ୍ଲୀରେ ପ୍ରଧାନମନ୍ତ୍ରୀଙ୍କୁ ଭେଟି ମନେ ପକାଇବା ପାଇଁ ଚାହିଁଥିଲେ । ମାତ୍ର ପ୍ରଧାନମନ୍ତ୍ରୀଙ୍କ ସହ ଭେଟ କରାଇ ଦେଇ ନ ଥିଲେ ସ୍ଥାନୀୟ ସାଂସଦ ଜୁଏଲ୍ ଓରାମ୍ । ଏହାକୁ କଂଗ୍ରେସ ପ୍ରାୟୋଜିତ କାର୍ଯ୍ୟକ୍ରମ କହିଥିଲେ ଓରାମ୍ ।