ଭୁବନେଶ୍ୱର: ବିଜେଡି ଛାଡ଼ିଛନ୍ତି ବରିଷ୍ଠ ନେତା ଏନ.ଭାସ୍କର ରାଓ । ତାଙ୍କ ସହ ପୂର୍ବତନ ମନ୍ତ୍ରୀ ଲାଲ ବିହାରୀ ହିମିରିକା ଏବଂ ଶତାଧିକ ସମର୍ଥକ ଆଜି ବିଜେଡିରୁ ଇସ୍ତଫା ଦେଇଛନ୍ତି । ରାୟଗଡ଼ା ଜିଲ୍ଲା ସଭାପତି ଚୟନରେ ମନମୁଖୀ କାର୍ଯ୍ୟର ପ୍ରତିବାଦରେ ସେମାନେ ଦଳ ଛାଡ଼ିଛନ୍ତି । ଏଥିସହ ବିଜୁ ବାବୁଙ୍କ ନାଁରେ ଏକ ନୂଆ ମଞ୍ଚ ଗଠନର ସୂଚନା ଦେଇଛନ୍ତି । ଯାହାର ନାଁ ରହିଛି ବିଜୁ ସ୍ୱାଭିମାନ ମଞ୍ଚ ।
ପୂର୍ବତନ ମନ୍ତ୍ରୀ ଜଗନ୍ନାଥ ସାରକାଙ୍କୁ ରାୟଗଡ଼ା ଜିଲ୍ଲା ବିଜେଡି ସଭାପତି ଭାବେ ନିକଟରେ ନିଯୁକ୍ତି ମିଳିଛି । ମାତ୍ର ଭାସ୍କର ରାଓ, ଲାଲ ବିହାରୀ ହିମିରିକା ଗୋଷ୍ଠୀ ଏହାକୁ ଗ୍ରହଣ କରି ନ ଥିଲେ । ଏହାକୁ ନେଇ ଦଳରେ ପ୍ରବଳ ଅସନ୍ତୋଷ ସୃଷ୍ଟି ହୋଇଥିଲା । ଆଜି ରାୟଗଡ଼ାରେ ସେମାନେ ଏକ ସାମ୍ବାଦିକ ସମ୍ମିଳନୀ ଡାକି ବିଜେଡି ନେତୃତ୍ୱ ଉପରେ ଅସନ୍ତୋଷ ଝାଡ଼ିବା ସହ ଦଳରୁ ଇସ୍ତଫା ଘୋଷଣା କରିବା ସହ ଦଳର ସଭାପତି ନବୀନ ପଟ୍ଟନାୟକଙ୍କ ପାଖକୁ ଇସ୍ତଫା ପତ୍ର ପଠାଇ ଦେଇଥିଲେ ।
ଭାସ୍କର ରାଓଙ୍କ ଇସ୍ତଫା ଦକ୍ଷିଣ ଓଡ଼ିଶାରେ ବିଜେଡି ପାଇଁ ବଡ଼ ଝଟକା ହୋଇଛି । ନବନିଯୁକ୍ତ ଜିଲ୍ଲା ସଭାପତି ଜଗନ୍ନାଥ ସାରକା ଏହାକୁ ହାଲୁକା ଭାବେ ନେବାକୁ ଉଦ୍ୟମ କରିଥିଲେ ମଧ୍ୟ କେବଳ ରାୟଗଡ଼ା ନୁହେଁ ସମଗ୍ର ଦକ୍ଷିଣ ଓଡ଼ିଶାରେ ଏହାର ପ୍ରଭାବ ପଡ଼ିବ ବୋଲି କୁହାଯାଉଛି ।
ସୂଚନାଥାଉକି, ନିର୍ବାଚନ ବିପର୍ଯ୍ୟୟ ସହ ବିଜେଡି ଖରାପ ସ୍ଥିତି ଦେଇ ଗତି କରୁଛି । ତ୍ରୁଟି ସଂଶୋଧନ କରିବା ପରିବର୍ତ୍ତେ ନେତୃତ୍ୱଙ୍କ ତ୍ରୁଟିପୂର୍ଣ୍ଣ କାର୍ଯ୍ୟଧାରା ଜାରି ରହିଛି । ଫଳରେ ଅସନ୍ତୋଷ ବଢ଼ି ବଢ଼ି ଚାଲିଛି । ଦଳରେ ବରିଷ୍ଠ ନେତାମାନଙ୍କୁ ଅଣଦେଖା ଓ ଅପମାନିତ କରାଯାଉଛି । ଏହି ପରିପ୍ରେକ୍ଷୀରେ ଦଳର ଭବିଷ୍ୟତକୁ ନେଇ ଲୋକେ ପ୍ରମାଦ ଗଣିଲେଣି ।
