ପାଣ୍ଡିଆନଙ୍କ ସମର୍ଥନରେ ବାହାରିଲେ ନବୀନ

ଭୁବନେଶ୍ୱର: ଭିକେ ପାଣ୍ଡିଆନଙ୍କ ସମର୍ଥନରେ ପୁଣି ଥରେ ମୁହଁ ଖୋଲିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ୱକଫ୍ ବିଲ୍ କୁ ନେଇ ରାଜ୍ୟସଭାରେ ବିଜେଡି ଆଭିମୁଖ୍ୟରେ ୟୁ ଟର୍ଣ୍ଣ ପାଇଁ ପାଣ୍ଡିଆନଙ୍କୁ ଦାୟୀ କରି ଦଳରେ ବିଦ୍ରୋହ ଦାନା ବାନ୍ଧୁଥିବା ବେଳେ ନବୀନ ତାଙ୍କର ନିରବତା ଭାଙ୍ଗିଛନ୍ତି । ଆଜି ଦୁଇଟି ଜାତୀୟ ଖବର ସରବରାହ ସଂସ୍ଥାର ପ୍ରତିନିଧିଙ୍କୁ ନବୀନ ନିବାସ ଡାକି ପାଣ୍ଡିଆନଙ୍କ ପ୍ରଶଂସା କରିଛନ୍ତି । କାର୍ତ୍ତିକେୟନ୍ ପାଣ୍ଡିଆନ୍ ଅତୀତରେ କେବଳ ରାଜ୍ୟ ପାଇଁ ନୁହେଁ, ଦଳ ପାଇଁ ମଧ୍ୟ ବହୁତ ଭଲ କାମ କରିଛନ୍ତି । ତେଣୁ କୌଣସି କାର୍ଯ୍ୟ ପାଇଁ ତାଙ୍କୁ ଦୋଷ ଦେବା କିମ୍ବା ସମାଲୋଚନା କରାଯିବା ଉଚିତ୍ ନୁହେଁ । ଏଥିସହ ସେ ୧୦ ମାସରୁ ଅଧିକ ସମୟ ପୂର୍ବରୁ ଦଳ ଛାଡ଼ି ସାରିଛନ୍ତି । କୌଣସି ଦଳୀୟ କାର୍ଯ୍ୟରେ ସେ ସଂଶ୍ଲିଷ୍ଟ ନାହାନ୍ତି ବୋଲି ନବୀନ ସ୍ପଷ୍ଟୀକରଣ ଦେଇଛନ୍ତି ।

ଗଣମାଧ୍ୟମରେ ପାଣ୍ଡିଆନଙ୍କୁ କଡ଼ା ସମାଲୋଚନା କରିଥିବା ବରିଷ୍ଠ ନେତା ପ୍ରଭାତ ତ୍ରିପାଠୀଙ୍କୁ ସେ ମୁହଁ ମୋଡ଼ି ଦେଇଛନ୍ତି । କହିଛନ୍ତି, ପୂର୍ବତନ ବିଧାୟକ ପ୍ରଭାତ ତ୍ରିପାଠୀ କିଛି ବର୍ଷ ତଳେ ବିଜେଡିରୁ ବହିଷ୍କୃତ ହୋଇଛନ୍ତି । କାରଣ ସେ ଚିଟଫଣ୍ଡ କେସ୍ ରେ ସଂପୃକ୍ତ ଥିଲେ ଏବଂ ସେଥିପାଇଁ ଜେଲ୍ ଯାଇଥିଲେ । ସେ ଦଳର କେହି ନୁହଁନ୍ତି ବୋଲି ନବୀନ ସଫା ସଫା ଶୁଣାଇ ଦେଇଛନ୍ତି ।

ପାଣ୍ଡିଆନ କିମ୍ବା ଦଳୀୟ ନିଷ୍ପତ୍ତି ବିରୋଧରେ ବିଭିନ୍ନ ଜାଗାରେ ମେଳି କରୁଥିବା ନେତାଙ୍କ ଉଦ୍ଦେଶ୍ୟରେ ନବୀନ କଡ଼ା ବାର୍ତ୍ତା ଦେଇଛନ୍ତି । ଦଳର ସଦସ୍ୟମାନେ କୌଣସି ହୋଟେଲରେ ବସି ବଡ଼ ମିଟିଂ କରିବାକୁ ନାପସନ୍ଦ କରି ନବୀନ କହିଛନ୍ତି, ମିଟିଂ କରିବା ପାଇଁ ଦଳୀୟ କାର୍ଯ୍ୟାଳୟ ଶଙ୍ଖ ଭବନ ଅଛି । ଏହା ଏକ ବୃହତ୍ତ ବିଲଡିଂ ହୋଇଥିବାରୁ ମିଟିଂ କରିବାରେ ଅସୁବିଧା ନାହିଁ । କୌଣସି ମିଟିଂ ଥିଲେ ସେଠାରେ ବସନ୍ତୁ ବୋଲି ନବୀନ କହିଛନ୍ତି ।

ତେବେ ୱକଫ୍ ବିଲ୍ ନେଇ ବିଜେଡିର ୟୁ ଟର୍ଣ୍ଣ ଉପରେ ନବୀନ କିଛି କହି ନ ଥିଲେ ମଧ୍ୟ ଯାହା ହୋଇଛି ତାଙ୍କ ନିର୍ଦ୍ଦେଶରେ ହିଁ ହୋଇଛି ବୋଲି ସେ ଜଣାଇ ଦେଇଛନ୍ତି ।