ପାର୍ଲିଆମେଣ୍ଟ ପରିସରରେ ନବୀନ

ନୂଆଦିଲ୍ଲୀ/ଭୁବନେଶ୍ୱର: ନୂଆଦିଲ୍ଲୀଗସ୍ତରେ ଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ପାର୍ଲିଆମେଣ୍ଟ ପରିସର ଯାଇ ଦଳୀୟ ସାଂସଦମାନଙ୍କ ସହ ଆଲୋଚନା କରିଥିଲେ । ଏହି ଅବସରରେ ପାର୍ଲିଆମେଣ୍ଟରେ ଓଡ଼ିଶାର ସ୍ୱାର୍ଥ ସମ୍ବଳିତ ପ୍ରସଙ୍ଗ ଉଠାଇବାକୁ ସେ ପରାମର୍ଶ ଦେଇଥିଲେ । ସେଣ୍ଟ୍ରାଲ୍ ହଲ୍ ରେ ଏକାଧିକ ମନ୍ତ୍ରୀ ଏବଂ ଅନ୍ୟ ଦଳର ସାଂସଦଙ୍କ ସହ ମଧ୍ୟ ମୁଖ୍ୟମନ୍ତ୍ରୀଙ୍କର ଭେଟ ହୋଇଥିଲା ।

ଲମ୍ବା ସମୟ ବ୍ୟବଧାନରେ ମୁଖ୍ୟମନ୍ତ୍ରୀ ଆଜି ପାର୍ଲିଆମେଣ୍ଟ ପରିସରକୁ ଆସିଥିଲେ । ନିଜ ନେତାଙ୍କୁ ସ୍ୱାଗତ କରିବା ପାଇଁ ଦଳୀୟ ସାଂସଦମାନଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଥିଲା । ମୁଖ୍ୟମନ୍ତ୍ରୀ ପହଞ୍ଚିଲା ମାତ୍ରେ ପିନାକୀ ମିଶ୍ରଙ୍କ ନେତୃତ୍ୱରେ ସାଂସଦମାନେ ତାଙ୍କୁ ଫୁଲତୋଡ଼ା ଦେଇ ସ୍ୱାଗତ କରିବା ସହ ଭିତରକୁ ପାଛୋଟି ନେଇଥିଲେ । ମୁଖ୍ୟମନ୍ତ୍ରୀଙ୍କୁ ପାଖରେ ପାଇ ଆସିକା ସାଂସଦ ପ୍ରମିଳା ବିଶୋୟୀ ଅତ୍ୟଧିକ ଆନନ୍ଦିତ ହୋଇପଡ଼ିଥିଲେ । ଖୁସିରେ ମୁଖ୍ୟମନ୍ତ୍ରୀଙ୍କୁ ଗେଲ କରୁଥିବା ଦେଖିବାକୁ ମିଳିଥିଲା । ଏହାର ଫଟୋ ଏବେ ସୋସିଆଲ୍ ମିଡ଼ିଆରେ ଭାଇରାଲ୍ ହୋଇଛି ।

ବିଜେଡ଼ି ସାଂସଦମାନଙ୍କ ପାଇଁ ଉଦ୍ଦିଷ୍ଟ କାର୍ଯ୍ୟାଳୟରେ ମୁଖ୍ୟମନ୍ତ୍ରୀ ସେମାନଙ୍କର ବୈଠକ ନେଇଥିଲେ । ଓଡ଼ିଶାର ବିକାଶ ପାଇଁ ଭରପୂର ପ୍ରୟାସ ଜାରି ରଖିବା ସହ ରାଜ୍ୟର ସ୍ୱାର୍ଥ ସମ୍ବଳିତ ପ୍ରସଙ୍ଗଗୁଡ଼ିକ ପାର୍ଲିଆମେଣ୍ଟରେ ଉଠାଇବାକୁ ସେ ସମସ୍ତଙ୍କୁ ପରାମର୍ଶ ଦେଇଥିଲେ । ଏହାପରେ ମୁଖ୍ୟମନ୍ତ୍ରୀ ସେଣ୍ଟ୍ରାଲ୍ ହଲ୍ ଯାଇଥିଲେ । ସେଠାରେ କିଛି ମନ୍ତ୍ରୀ ଏବଂ ବରିଷ୍ଠ ସାଂସଦଙ୍କ ସହ ମୁଖ୍ୟମନ୍ତ୍ରୀଙ୍କର ଅନଔପଚାରିକ ସାକ୍ଷାତ ଆଲୋଚନା ହୋଇଥିବା ଜଣାପଡ଼ିଛି ।

ସେଠାରୁ ଫେରିଲା ବେଳେ ମୁଖ୍ୟମନ୍ତ୍ରୀ ସାମ୍ବାଦିକମାନଙ୍କର ବିଭିନ୍ନ ପ୍ରଶ୍ନର ଉତ୍ତର ଦେଇଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଗୃହମନ୍ତ୍ରୀ ଅମିତ୍ ଶାହାଙ୍କୁ ଭେଟିବାର କାର୍ଯ୍ୟକ୍ରମ ନାହିଁ କି ରାଷ୍ଟ୍ରପତି ନିର୍ବାଚନ ସଂକ୍ରାନ୍ତରେ ଏ ପର୍ଯ୍ୟନ୍ତ କିଛି ଚିନ୍ତା କରାଯାଇନାହିଁ ବୋଲି ମୁଖ୍ୟମନ୍ତ୍ରୀ କହିଥିଲେ । ଏକ ଅଣ ବିଜେପି ସାମ୍ମୁଖ୍ୟ ଗଠନ ପାଇଁ ଅଣ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀମାନଙ୍କୁ ତେଲେଙ୍ଗାନା ମୁଖ୍ୟମନ୍ତ୍ରୀଙ୍କ ଚିଠି ସମ୍ପର୍କରେ ମୁଖ୍ୟମନ୍ତ୍ରୀଙ୍କୁ ପଚାରିବାରୁ ସେ ଚିଠି ପାଇନାହାନ୍ତି ବୋଲି କହିଥିଲେ ।