ଜଗନ୍ନାଥ ଦର୍ଶନ କରି ମନ ବୁଝାଇବେ

ଭୁୁବନେଶ୍ୱର: ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ଦମ୍ଭ ରହିଲାନି । ଆସନ୍ତାକାଲି ଡାକରା ଦିଆଯାଇଥିବା ଶ୍ରୀମନ୍ଦିର ବଞ୍ଚାଅ ଆନ୍ଦୋଳନରେ ବ୍ରେକ୍ ଲାଗିଗଲା । ପଦଯାତ୍ରା ପାଇଁ ପ୍ରଶାସନର ଅନୁମତି ନ ମିଳିବାରୁ ଏବଂ ନେପଥ୍ୟରେ ସମର୍ଥକ ଯୋଗାଡ଼ ହୋଇ ନ ପାରିବାରୁ ଏହାକୁ ସ୍ଥଗିତ ଘୋଷଣା କରିଛନ୍ତି ଆୟୋଜକ ସଂଗଠନ । ଫଳରେ ଆନ୍ଦୋଳନ ପାଇଁ ପଦାକୁ ଡେଇଁଥିବା ସମାଜ ସଂସ୍କାରକମାନେ କାନମୁଣ୍ଡା ଆଉଁଷି ଯେଝା ଘରକୁ ପେଡି ପୁଟୁଳି ବାନ୍ଧିଛନ୍ତି ।

ତେବେ ଏହି ଆନ୍ଦୋଳନ ଫସର ଫାଟିବାଟା ବେଶୀ କଷ୍ଟ ଦେଇଛି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କୁ । ପ୍ରସ୍ତାବିତ ଆନ୍ଦୋଳନର ସେ କୁଆଡ଼େ ମୁଖ୍ୟ କାର୍ପଟଦାର ଥିଲେ । ୨୭ ତାରିଖ ପୁରୀ ପଦଯାତ୍ରା ସଫଳ କରିବା ପାଇଁ ସବୁ କୌଶଳ କଟାଇଥିଲେ । ମାତ୍ର ସେଥିରେ ହାରି ଯାଇଥିବାରୁ ତାଙ୍କ ପାଇଁ ଅସହ୍ୟ ହୋଇଛି । ଧିସେଁଇ ହୋଇ ଆସନ୍ତାକାଲି ପୁରୀ ଯାଉଛନ୍ତି । ଜଗନ୍ନାଥଙ୍କୁ ଦର୍ଶନ କରି ମନ ବୁଝାଇବେ । ଧିସେଁଇ ହେବା କଥା ଏଇଥିପାଇଁ କହୁଛୁ ଯେ ମହାପ୍ରଭୁଙ୍କ ଦର୍ଶନ ପାଇଁ ଆସନ୍ତାକାଲି ପୁରୀ ଯାଉଥିବା ଟୁଇଟ୍ କରିବାକୁ ତାଙ୍କୁ ପଡ଼ିଛି । ଖାଲି ସେତିକି ନୁହେଁ, ଜଗନ୍ନାଥଙ୍କୁ ଦର୍ଶନ ପାଇଁ ଯାଉଥିବା ପୁରୀ ଜିଲ୍ଲାପାଳଙ୍କୁ ମଧ୍ୟ ଚିଠି ଲେଖିଛନ୍ତି ।

ଆହୁରି କୌତୁହଳର କଥା ହେଉଛି, ସାଂସଦ ତାଙ୍କର ଏହି ଟୁଇଟ୍ କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ରାଷ୍ଟ୍ରୀୟ ସଭାପତି ଜେ.ପି.ନଡ୍ଡା, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଓଡ଼ିଶା ବିଜେପି ଏବଂ ରାଷ୍ଟ୍ରୀୟ ବିଜେପିକୁ ଟ୍ୟାଗ୍ କରିଛନ୍ତି । ମହାପ୍ରଭୁଙ୍କୁ ଦର୍ଶନ କରିବା ପାଇଁ ଜଣେ ସାଂସଦଙ୍କୁ ଟୁଇଟ୍ କରି ଆଗୁଆ ଜଣାଇବାକୁ ପଡ଼େ ଏବଂ ଏହାକୁ ହାଇକମାଣ୍ଡଙ୍କୁ ଟ୍ୟାଗ୍ କରିବାକୁ ପଡ଼େ ତାହା ପ୍ରଥମ ଥର ପାଇଁ ଅପରାଜିତା ଷଡ଼ଙ୍ଗୀଙ୍କ କ୍ଷେତ୍ରରେ ଏବେ ଦେଖିବାକୁ ମିଳୁଛି ।

ତାଙ୍କର ଏହି ଆଭିମୁଖ୍ୟକୁ ଖୋଦ୍ ପ୍ରଂଶସକମାନେ କଟାକ୍ଷ କରି ରିଟୁଇଟ୍ କରିଛନ୍ତି । ପ୍ରଧାନମନ୍ତ୍ରୀ ମୋଦି, ସଭାପତି ନଡ୍ଡା ଏବଂ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ରଙ୍କୁ ଟ୍ୟାଗ୍ କରିବା କ’ଣ ନିହାତି ଆବଶ୍ୟକ ଥିଲା? ଜଗନ୍ନାଥଙ୍କ ଦର୍ଶନ କ’ଣ ଏକ ପଲିଟିକାଲ୍ ଟୁର୍ ବୋଲି ପ୍ରଶ୍ନ କରିଛନ୍ତି ।

ତେବେ ସେ ଯାହା ହେଉ, ପଦଯାତ୍ରା ସ୍ଥଗିତର ଅସଲ କାରଣ ଅତି ସ୍ପଷ୍ଟ । ଆୟୋଜକମାନେ ସମର୍ଥନ ଯୋଗାଡ଼ କରିବାରେ ସମର୍ଥ ହୋଇପାରିଲେ ନାହିଁ । ଆନ୍ଦୋଳନରେ ଅପରାଜିତା ଷଡ଼ଙ୍ଗୀଙ୍କ ନାଁ ଆଗରେ ଥିଲେ ମଧ୍ୟ ତାଙ୍କ ଦଳ ବିଜେପି ସମର୍ଥନ କଲା ନାହିଁ ।

ଦଳର ରାଜ୍ୟ ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ ଆଜି ରୋକଠୋକ୍ କହିଥିଲେ ଯେ ଆୟୋଜକମାନେ ବିଜେପିକୁ ଆମନ୍ତ୍ରଣ କରିନାହାନ୍ତି କି ବିଜେପି ଏଥିରେ ସାମିଲ ହେବାର ପ୍ରଶ୍ନ ଉଠୁନି । ପୁରୀ ବିଧାୟକ ଜୟନ୍ତ ଷଡ଼ଙ୍ଗୀ ତାଙ୍କ ଆଭିମୁଖ୍ୟରେ ଅଟଳ ରହିଛନ୍ତି । ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ବିରୋଧ କରିବା ଅର୍ଥ ପୁରୀର ବିକାଶକୁ ବିରୋଧ କରିବା ବୋଲି ତାଙ୍କର ଯୁକ୍ତି । ଦଳର ରାଷ୍ଟ୍ରୀୟ ମୁଖପାତ୍ର ସମ୍ବିତ୍ ପାତ୍ର ଟୁଇଟ୍ କରି ହାଇକୋର୍ଟଙ୍କ ଆଦେଶକୁ ଅପେକ୍ଷା କରିବାକୁ ସମସ୍ତଙ୍କୁ ନିବେଦନ କରିଛନ୍ତି । ଏହାକୁ ନେଇ ରାଜନୀତି ନ କରିବା ପାଇଁ ପରାମର୍ଶ ଦେଇଛନ୍ତି ।

ସବୁଠାରୁ ବଡ଼କଥା ହେଲା ପ୍ରକଳ୍ପକୁ ବିରୋଧ ନ କରିବା ପାଇଁ ପୁରୀ ଗଜପତି ମହାରାଜା ଶ୍ରୀ ଦିବ୍ୟସିଂହ ଦେବ ସମସ୍ତଙ୍କୁ ନିବେଦନ କରିଥିଲେ । ମହାପ୍ରଭୁଙ୍କ କାର୍ଯ୍ୟ ସମସ୍ତଙ୍କର । ଏଥିରେ ବାଧା ଦେବା ଅନୁଚିତ୍ । ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାର୍ଯ୍ୟ ଚାଲୁ ରହିବା ଆବଶ୍ୟକ । ଯେଉଁଭଳି ଢ଼ଙ୍ଗରେ ଖନନ ଚାଲିଛି ଶ୍ରୀମନ୍ଦିର ସମ୍ପୂର୍ଣ୍ଣ ସୁରକ୍ଷିତ ବୋଲି ସେ କହିଥିଲେ । ଗଜପତିଙ୍କ ସହ ଶ୍ରୀମନ୍ଦିରର ବରିଷ୍ଠ ସେବାୟତ, ବୁଦ୍ଧିଜୀବୀ ମଧ୍ୟ ପ୍ରକଳ୍ପ ସମର୍ଥନରେ ବାହାରିଥିଲେ ।