ଭୁୁବନେଶ୍ୱର: ସମସ୍ତେ କୋଭିଡ୍ ନିୟମକୁ କଡ଼ାକଡ଼ି ପାଳନ କରନ୍ତୁ । ବାକି କୋଭିଡ୍ ଆକ୍ରାନ୍ତଙ୍କ ଦାୟିତ୍ୱ ସରକାରଙ୍କର । ହସ୍ପିଟାଲ୍ ରେ ବେଡ୍ ର ସମସ୍ୟା ନାହିଁ କି ଔଷଧ, ଅକ୍ସିଜେନ୍ ର ଅଭାବ ନାହିଁ । ସବୁଠାରୁ ଖରାପ ସ୍ଥିତିର ସାମନା କରିବା ପାଇଁ ରାଜ୍ୟ ସରକାର ପ୍ରସ୍ତୁତ । ସ୍ୱାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ ମହାପାତ୍ର ଆଜି ରାଜ୍ୟବାସୀଙ୍କୁ ଏହି ଆଶ୍ୱାସନା ଦେଇଛନ୍ତି ।
ଶ୍ରୀ ମହାପାତ୍ର ତିନୋଟିି ବିଷୟକୁ ଗୁରୁତ୍ୱ ଦେଇଛନ୍ତି । ପ୍ରଥମତଃ କୋଭିଡ୍ ସଂକ୍ରମଣରୁ ନିଜକୁ ଦୂରେଇ ରଖିବା ପାଇଁ ଆବଶ୍ୟକ ସତର୍କତା ପାଳନ । ଏଥିରେ କେହି ସାମାନ୍ୟତମ ଅବହେଳା କରନ୍ତୁ ନାହିଁ । ଏହାଦ୍ୱାରା ନିଜେ ସୁରକ୍ଷିତ ରହିପାରିବେ ଏବଂ ସରକାରଙ୍କ ଉପରେ ବୋଝ କମିବ ।
ଦ୍ୱିତୀୟରେ, ଗୁରୁତର କୋଭିଡ୍ ରୋଗୀଙ୍କ ପାଇଁ ବିଭିନ୍ନ ହସ୍ପିଟାଲ୍ ରେ ପର୍ଯ୍ୟାପ୍ତ ବେଡ୍ ତିଆରି କରାଯାଇଛି । ସଂକ୍ରମଣ ବୃଦ୍ଧି ପାଇବା ସତ୍ତ୍ୱେ ବର୍ତ୍ତମାନ ବେଡ୍ ସ୍ଥିତି ଭଲ ଅଛି । ଭବିଷ୍ୟତକୁ ଆଖିରେ ରଖି ପ୍ରସ୍ତୁତ ବି କରାଯାଉଛି । ଆଜିର ଦିନରେ ୮,୪୬୩ ସାଧାରଣ ବେଡ୍ ରୁ ୪,୭୯୧ ବେଡ୍ (୪୪%) ରେ ରୋଗୀ ଅଛନ୍ତି । ୨,୦୬୩ ଆଇସିୟୁ ବେଡ୍ ରୁ ୧୪୨୬(୬୯%) ବେଡ୍ ରେ ରୋଗୀ ଅଛନ୍ତି । ୭୦୧ ଭେଣ୍ଟିଲେଟର୍ ରୁ ୨୦୧ ଭେଣ୍ଟିଲେଟର(୬୯%)ରେ ରୋଗୀ ଅଛନ୍ତି । ଏହିଭଳି ଭାବେ ଆଜି ଦିନରେ ହସ୍ପିଟାଲ୍ ରେ ମୋଟ ୫,୨୭୧ କୋଭିଡ୍ ରୋଗୀ ଚିକିତ୍ସିତ ହେଉଛନ୍ତି ।
ପର୍ଯ୍ୟାପ୍ତ ଅକ୍ସିଜେନ୍ ଗଚ୍ଛିତ ଅଛି । ବର୍ତ୍ତମାନ ୪୦ ହଜାର ବେଡ୍ ରେ ଅକ୍ସିଜେନ୍ ସପୋର୍ଟ ଦିଆଯାଇପାରିବ । ଆମ ରାଜ୍ୟରେ ୪୫ ହଜାର ମେଟ୍ରିକ୍ ଟନ୍ ଅକ୍ସିଜେନ୍ ମହଜୁଦ ଅଛି । ୧୩୦ ଟନ୍ ସିଲିଣ୍ଡର ଅଛି । କୌଣସି ପରିସ୍ଥିତିରେ ସିଲିଣ୍ଡର ଖାଲି ରହିବାକୁ ଦିଆଯାଉନାହିଁ । ୭ ଟି ରାଜ୍ୟକୁ ଅକ୍ସିଜେନ୍ ଯୋଗାଇବା ସତ୍ତ୍ୱେ ଆମର ଯଥେଷ୍ଟ ବଳକା ଅଛି । ରାଜ୍ୟରେ ଅକ୍ସିଜେନ୍ ର ଅଭାବ ରହିବ ନାହିଁ ବୋଲି ଶ୍ରୀ ମହାପାତ୍ର କହିଛନ୍ତି ।
ସେହିଭଳି ରେମଡେସିଭିର ଇଂଜେକ୍ସନ୍ ର ବି ଅଭାବ ନାହିଁ । ରାଜ୍ୟରେ ଦୈନିକ ୧୨୦୦ ଦରକାର ରେମଡେିସିଭିର ଦରକାର ହେଉଛି । ଆମ ପାଖରେ ବର୍ତ୍ତମାନ ୪୩ ହଜାର ଗଚ୍ଛିତ ଅଛି । କାଲିସୁଦ୍ଧା ଆଉ ୨୧ ହଜାର ଆସିଯିବ । ସାଢ଼େ ୬ ଲକ୍ଷ ଫାବିଫେରାବି ବଟକା ମହଜୁଦ ଅଛି । ଆଉ ୨୦ ଲକ୍ଷ ଅର୍ଡର ଦିଆଯାଇଛି ।
ପିପିଇ କିଟ୍, ଗ୍ଲୋବସ୍, ମାସ୍କ ୨ ମାସ ପାଇଁ ଷ୍ଟକ୍ ଅଛି ।
ତେବେ ଗୁରୁତ୍ୱପୂର୍ଣ୍ଣ କଥା ହେଲା, ଜରୁରୀ ନ ଥିଲେ ଲୋକମାନେ ହସ୍ପିଟାଲ୍ ନ ଆସିବାକୁ ଶ୍ରୀ ମହାପାତ୍ର ପରାମର୍ଶ ଦେଇଛନ୍ତି । ବିଶେଷଜ୍ଞମାନେ କହୁଛନ୍ତି, ୯୫-୯୭% ଆକ୍ରାନ୍ତ ହୋମ୍ ଆଇସୋଲେସନ୍ ରେ ରହିବାରେ ଅସୁବିଧା ନାହିଁ । ଆମ ରାଜ୍ୟରେ ୮୯% ଆକ୍ରାନ୍ତ ହୋମ୍ ଆଇସୋଲେସନ୍ ରେ ଅଛନ୍ତି । ହସ୍ପିଟାଲ୍ ଯିବା ଜରୁରୀ ହେଲେ ପର୍ଯ୍ୟାପ୍ତ ଆମ୍ବୁଲାନସ୍ ସୁବିଧା ଅଛି । ଗୁରୁତର ରୋଗୀଙ୍କୁ ହସ୍ପିଟାଲ୍ ରେ ପହଞ୍ଚାଇବାର ଦାୟିତ୍ୱ ସରକାରଙ୍କର । ତେଣୁ ପଜିଟିଭ୍ ବାହାରିଲା ମାତ୍ରେ ଛାନିଆଁ ହୋଇ ହସ୍ପିଟାଲ୍ ଆସିବା ଆବଶ୍ୟକ ନାହିଁ । ଏହାଦ୍ୱାରା ହସ୍ପିଟଲ୍ ବେଡ୍ ଉପରେ ଚାପ ବଢ଼ିବ ଏବଂ ଗୁରୁତର ରୋଗୀ ବେଡ୍ ସୁବିଧାରୁ ବଞ୍ଚିତ ହେବାର ଆଶଙ୍କା ଅଛି ବୋଲି ଶ୍ରୀ ମହାପାତ୍ର କହିଛନ୍ତି ।
ତୃତୀୟରେ, ଟିକାକରଣ ଉପରେ ସୂଚନା ଦେଇ ଅତିରିିିକ୍ତ ମୁଖ୍ୟ ଶାସନ ସଚିବ କହିଛନ୍ତି, ୧୮ ବର୍ଷରୁ ଅଧିକ ଟିକାକରଣ କାର୍ଯ୍ୟକ୍ରମ କେବେ ହେବ ତାହା ଟିକା ମିଳିଲା ପରେ ଜଣାଇ ଦିଆଯିବ । ତେବେ ବର୍ତ୍ତମାନ ସୁଦ୍ଧା ରାଜ୍ୟର ୫୭ ଲକ୍ଷ ୭୬ ହଜାର ଡୋଜ୍ ଟିକା ଦିଆସରିଛି । ଯେଉଁଥିରେ ନଷ୍ଟ ଟିକା ହାର -୨.୭% । ଆମେ ଦୈନିକ ୩ ରୁ ୪ ଲକ୍ଷ ଟିକା ଦେବାର କ୍ଷମତା ରଖିଛୁ । ତେଣୁ ଟିକା ଆସିଲା ପରେ କୌଣସି ଅସୁବିଧା ହେବନି । ଯେଉଁମାନେ ଦ୍ୱିତୀୟ ଡୋଜ୍ ନେବା ଅପେକ୍ଷାରେ ଅଛନ୍ତି ସେମାନଙ୍କୁ ଆଗ ସୁଯୋଗ ଦେବାକୁ ଶ୍ରୀ ମହାପାତ୍ର ସମସ୍ତଙ୍କୁ ଅନୁରୋଧ କରିଛନ୍ତି ।
ଶ୍ରୀ ମହାପାତ୍ର କହିଛନ୍ତି, କରୋନା ଦ୍ୱିତୀୟ ଲହରୀ ଏତେ ଭୟାନକ ହେବ ବୋଲି ଆଶା କରି ନ ଥିଲୁ । ଜାତୀୟସ୍ତରରେ ଓଡ଼ିଶା ସଂକ୍ରମଣ ହାର ୧.୮% ଥିଲେ ମଧ୍ୟ ଆଗକୁ କ’ଣ ହେବ ଆକଳନ କରାଯାଇପାରୁନାହିଁ । ଦେଶରେ ଦୈନିକ ୫ ଲକ୍ଷ ସଂକ୍ରମଣ ଓ ୫ ହଜାର ମୃତୁ୍ୟ ହୋଇପାରେ ବୋଲି ମଧ୍ୟ ଆକଳନ କରାଯାଉଛି । ତେଣୁ ନିଜକୁ ନିରାପଦରେ ରଖିବାର ଏକମାତ୍ର ବାଟ ହେଉଛି କୋଭିଡ୍ ସଚେତନତା । ସରକାର ତାଙ୍କ ଦାୟିତ୍ୱ କରୁଛନ୍ତି । ଜନସାଧାରଣ ଏଥିପ୍ରତି ସମ୍ପୂର୍ଣ୍ଣ ସଚେତନ ରହିବାକୁ ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ମହାପାତ୍ର ନିବେଦନ କରିଛନ୍ତି ।
