ଭୁବନେଶ୍ୱର: ଓଡ଼ିଶା ସେତୁ ଓ ନିର୍ମାଣ ନିଗମ(ଓବିସିସି)ର ଅତିରିକ୍ତ ମୁଖ୍ୟଯନ୍ତ୍ରୀ ପ୍ରଦୀପ କୁମାର ରଥଙ୍କୁ ବାନ୍ଧିଛି ଭିଜିଲାନସ୍ । ବିପୁଳ ଆୟ ବହିର୍ଭୂତ ସମ୍ପତ୍ତି ରଖିବା ଅଭିଯୋଗରେ ତାଙ୍କୁ ଆଜି ଗିରଫ କରାଯାଇଛି । ଏହି ବାବୁଙ୍କର ୨ଟି ତିନିମହଲା କୋଠା, ଦୁଇଟି ଫ୍ଲାଟ୍, ୪୫ ଟି ପ୍ଲଟ୍ ଥିବା ବେଳେ ଘରୁ ମିଳିଛି କେଜିଏ ସୁନା ଅଳଙ୍କାର, ୩୦୦ ଗ୍ରାମ ରୂପା, ୧ କୋଟି ୬୨ ଲକ୍ଷ ଟଙ୍କାର ଜମା । ବାବୁଙ୍କର ଚାକିରି ସାଙ୍ଗକୁ ଔଷଧ ଦୋକାନ ଏବଂ କ୍ରସର୍ ବେପାର ବି ରହିଛି ।
ଆୟ ବହିର୍ଭୂତ ସମ୍ପତ୍ତି ରଖିବା ଅଭିଯୋଗରେ ଭିଜିଲାନସ୍ ଗତକାଲି ଭୁବନେଶ୍ୱର, କଟକ, ଭଦ୍ରକ, ଯାଜପୁର ଏବଂ ଖୋର୍ଦ୍ଧାରେ ଥିବା ଶ୍ରୀ ରଥଙ୍କର ଘର, ଅଫିସ ଏହିଭଳି ମୋଟ ୧୨ଟି ଜାଗାରେ ଚଢ଼ଉ କରିଥିଲା । ତାଙ୍କର ବିପୁଳ ସମ୍ପତ୍ତି ଦେଖି ଭିଜିଲାନସ୍ ଅଧିକାରୀମାନେ ତାଜୁବ୍ ହୋଇଯାଇଥିଲେ । ଭୁବନେଶ୍ୱର ପାଣ୍ଡରାସ୍ଥିତ ସତ୍ୟ ବିହାରରେ ଏ ବାବୁଙ୍କର ଏକ ତିନି ମହଲାର ଅତ୍ୟାଧୁନିକ କୋଠା ରହିଛି । ସେଠି ପରିବାର ସହ ରହୁଛନ୍ତି । ଭଦ୍ରକରେ ମଧ୍ୟ ତାଙ୍କର ଆଉ ଏକ ତିନି ମହଲାର ଆବାସିକ କୋଠା ରହିଛି । ଏହାବାଦ୍ ଭୁବନେଶ୍ୱର ଚନ୍ଦ୍ରଶେଖରପୁରସ୍ଥିତ ଓୟଷ୍ଟର୍ ଆପାର୍ଟମେଣ୍ଟରେ ଏକ ଫ୍ଲାଟ୍ ଏବଂ ପାତ୍ରପଡ଼ାରେ ଏକ ଫ୍ଲାଟ୍ ଅଛି । ଢ଼େଙ୍କାନାଳ ଜିଲ୍ଲା ଘଟିପିରିରେ ଏକ କ୍ରସର୍ ୟୁନିଟ୍ ଅଛି । ଭୁବନେଶ୍ୱର ନୟାପଲ୍ଲୀସ୍ଥିତ ଇନ୍ଦ୍ରଧନୁ ମାର୍କେଟ୍ ରେ ଏକ ଔଷଧ ଦୋକାନ ଅଛି ।
ଏହି କରିତକର୍ମା ଯନ୍ତ୍ରୀଙ୍କର ୪୫ଟି ପ୍ଲଟ୍ ଠାବ ହୋଇଛି । ସେଥି ମଧ୍ୟରୁ ଭୁବନେଶ୍ୱରରେ ୮, କଟକରେ ୨, ଭଦ୍ରକରେ ୪, ଢ଼େଙ୍କାନାଳରେ ୨ ଓ ଯାଜପୁର ଜିଲ୍ଲାରେ ୨୯ଟି ପ୍ଲଟ୍ ରହିଛି । ଏହି ସବୁ ପ୍ଲଟ୍ କୁୁ ନିଜ ନାଁରେ, ପତ୍ନୀଙ୍କ ନାଁରେ ଏବଂ ସମ୍ପର୍କୀୟଙ୍କ ନାଁରେ କିଣିଛନ୍ତି । ଠାବ ହୋଇଥିବା ପ୍ଲଟ୍ ର ମୋଟ ମୂଲ୍ୟ ପାଖାପାଖି ଅଢ଼େଇ କୋଟି ହେବ ବୋଲି ଆକଳନ କରାଯାଇଥିଲେ ମଧ୍ୟ ପ୍ରକୃତ ମୂଲ୍ୟ ଯଥେଷ୍ଟ ଅଧିକ ହେବ ବୋଲି କୁହାଯାଉଛି ।
ବାବୁଙ୍କ ଘରୁ ୧ କେଜି ସୁନା ଅଳଙ୍କାର, ୩୦୦ ଗ୍ରାମ ରୂପା, ୧ କୋଟି ୬୨ ଲକ୍ଷ ଟଙ୍କାର ଜମା, ଦୁଇଟି ଚାରିଚକିଆ ଗାଡ଼ି, ଦୁଇଟି ଜେସିବି, ଗୋଟିଏ ଏସ୍କାଭେଟର୍, ଗୋଟିଏ ରକ୍ ବ୍ରେକର୍ ଇତ୍ୟାଦି ଜବତ ହୋଇଛି ।
