ଭୁବନେଶ୍ୱର: ରାଜ୍ୟପାଳ ରଘୁବର ଦାସଙ୍କ ଅଭିଭାଷଣ ସହ ଜୁଲାଇ ୨୨ରୁ ଆରମ୍ଭ ହେଲା ସପ୍ତଦଶ ବିଧାନସଭାର ପ୍ରଥମ ଅଧିବେଶନ । ଆରମ୍ଭରୁ ହିଁ ଗୃହ ଅଶାନ୍ତ ହୋଇପଡ଼ିଲା । ରାଜ୍ୟପାଳଙ୍କ ପୁଅ ଜଣେ ଓଡିଆ ଅଧିକାରୀଙ୍କୁ ମାଡ଼ ମାରି ଲହୁ ଲୁହାଣ କରିଥିବା ବେଳେ ସରକାର ତାଙ୍କୁ ସୁରକ୍ଷା ଦେଉଛନ୍ତି ବୋଲି ବିଜେଡି ଓ କଂଗ୍ରେସ ଅଭିଯୋଗ ଆଣିଲେ । ପ୍ରତିବାଦରେ ରାଜ୍ୟପାଳଙ୍କ ଭାଷଣକୁ ବର୍ଜନ କରି କକ୍ଷତ୍ୟାଗ କଲେ । ବିରୋଧୀ ଦଳ ନେତା ନବୀନ ପଟ୍ଟନାୟକ ଏ ପ୍ରସଙ୍ଗରେ ନିଜର କଠୋର ଆଭିମୁଖ୍ୟ ଗଣମାଧ୍ୟମରେ ରଖିଲେ । ଜବାବରେ ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଲେ ଯେ ରାଜ୍ୟପାଳଙ୍କ ପୁଅ ବିରୋଧରେ ଆସିଥିବା ଅଭିଯୋଗ ଉପରେ ପୁରୀ ଜିଲ୍ଲାପାଳ ତଦନ୍ତ କରି ୧୫ ଦିନ ଭିତରେ ରିପୋର୍ଟ ଦେବେ । ରିପୋର୍ଟ ଆସିଲା ପରେ ଦୋଷୀ ଯିଏ ହୁଅନ୍ତୁ ନା କାହିଁକି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ବିରୋଧୀ ଦଳ ଧୈର୍ଯ୍ୟ ରଖନ୍ତୁ ବୋଲି ମଧ୍ୟ ସେ କଟାକ୍ଷ କଲେ ।
ଆଇନମନ୍ତ୍ରୀଙ୍କ ଏହି ପ୍ରତିଶ୍ରୁତି ଆଜିକୁ ୧୫ ଦିନ ପୂରିଗଲା । ମାତ୍ର ଜିଲ୍ଲାପାଳଙ୍କ ରିପୋର୍ଟ ସମ୍ପର୍କରେ କାହାରି ପାଟିରୁ ଉଁ ଚୁଁ ଶୁଭୁନାହିଁ । ରାଜ୍ୟ ସରକାରଙ୍କ ପକ୍ଷରୁ ମଧ୍ୟ ଏଥିନେଇ କୌଣସି ତତ୍ପରତା ଦେଖିବାକୁ ମିଳୁନାହିଁ । ଦଳେ ଝାଡ଼ଖଣ୍ଡୀ ଯୁବକଙ୍କ ଦ୍ୱାରା କାର୍ଯ୍ୟରତ ଜଣେ ଓଡିଆ ଅଧିକାରୀ ମାଡ଼, ଗାଳି, ନିର୍ଯ୍ୟାତନା ପାଇଥିଲେ ମଧ୍ୟ ଓଡ଼ିଆ ଅସ୍ମିତା ହଜିଗଲା । ଯେଉଁ ମାମଲାର ତଦନ୍ତ ପୁଲିସ କରିବା କଥା, ଜିଲ୍ଲାପାଳ ତାହାର ତଦନ୍ତ କରିବେ ବୋଲି ମନ୍ତ୍ରୀ କାହିଁକି କହିଲେ ତାହା ମଧ୍ୟ ବୁଝାପଡ଼ିଲା ନାହିଁ ।
ଠିକ୍ ମାସେ ତଳେ, ଜୁଲାଇ ୭ ତାରିଖ ରାତିରେ ପୁରୀ ରାଜଭବନରେ ଏହି ଅଘଟଣ ଘଟିଥିଲା । ଏଏସଓ ବୈକୁଣ୍ଠ ପ୍ରଧାନଙ୍କ ଅଭିଯୋଗ ଅନୁଯାୟୀ, ରାଜ୍ୟପାଳଙ୍କ ପୁଅ ଲଳିତ କୁମାର ଏବଂ ତାଙ୍କର ୫ ଜଣ ସହଯୋଗୀ ମିଶି ତାଙ୍କୁ ଅଶ୍ଲୀଳ ଭାଷାରେ ଗାଳିଗୁଲଜ କରିବା ସହ ନିସ୍ତୁକ ପିଟିଥିଲେ । ହତ୍ୟା ଧମକ ଦେଇ ଡ଼ରାଇଥିଲେ । ଜୋତାରେ ଛେପ ପକାଇ ଚାଟିବାକୁ କହିଥିଲେ । ରାଜ୍ୟପାଳଙ୍କ ପୁଅ ଥିଲେ ଏହି ଜଘନ୍ୟ କାଣ୍ଡର ମୁଖ୍ୟ ସର୍ଦ୍ଦାର ।
ମାଡ଼ ଓ ନିର୍ଯ୍ୟାତନା ପାଇଥିବା ଏଏସଓ ଶ୍ରୀ ପ୍ରଧାନ ପରଦିନ ରାଜ୍ୟପାଳଙ୍କ ପ୍ରମୁଖ ସଚିବଙ୍କୁ ଭେଟି ନ୍ୟାୟ ଭିକ୍ଷା କରିଥିଲେ । ପରେ ତାଙ୍କ ପତ୍ନୀ ପୁରୀ ସମୁଦ୍ର କୂଳ ଥାନାରେ ଏତଲା ଦେଇଥିଲେ । ପୁଲିସ ପ୍ରଥମେ ଏତଲା ରଖୁ ନ ଥିଲା । ମାତ୍ର ରାଜ୍ୟ ସଚିବାଳୟ ସଂଘର ହସ୍ତକ୍ଷେପରେ ପୁଲିସ ଏତଲାକୁ ଥାନାରେ ରେଜିଷ୍ଟ୍ରି କଲା । ହେଲେ ତଦନ୍ତ କଲା ନାହିଁ ।
୧୩ ତାରିଖରେ ଡିସିପି ପ୍ରତୀକ ସିଂଙ୍କ ଉପସ୍ଥିତିରେ ରାଜ୍ୟପାଳ ଶ୍ରୀ ଦାସ ପୀଡ଼ିତ ଓ ତାଙ୍କ ପରିବାରଙ୍କ ସହ ରାଜଭବନରେ ଆଲୋଚନା କରିଥିଲେ । ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ନିଜେ ରାଜ୍ୟପାଳ ପ୍ରତିଶ୍ରୁତି ଦେଇ ୭ ଦିନ ସମୟ ନେଇଥିଲେ । ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଦୃଷ୍ଟିକୁ ବି ମାମଲା ଅଣାଯାଇଥିଲା ଏବଂ ସମାନ ପ୍ରତିଶ୍ରୁତି ମିଳିଥିଲା ।
ଆସନ୍ତାକାଲି ଏହି ଘଟଣାକୁ ମାସେ ପୂରୁଛି । ମାତ୍ର ଏ ପର୍ଯ୍ୟନ୍ତ ଏହି ଅପରାଧିକ ମାମଲାର ତଦନ୍ତ ପୁଲିସ କଲାନି । ବିଧାନସଭାରେ ଏହାକୁ ନେଇ ଝଡ଼ ବୋହିବା ପରେ ଆଇନମନ୍ତ୍ରୀଙ୍କ ପ୍ରତିଶ୍ରୁତି ଅନୁଯାୟୀ ଜିଲ୍ଲାପାଳଙ୍କ ତଦନ୍ତ ରିପୋର୍ଟ ଆସିଲାନି । ତଦନ୍ତ ରିପୋର୍ଟ କେବେ ଆସିବ ଏବଂ ଅପରାଧୀଙ୍କ ବିରୋଧରେ କେବେ କାର୍ଯ୍ୟାନୁଷ୍ଠାନ ହେବ ତାହାକୁ ଓଡ଼ିଶାବାସୀ ଅପେକ୍ଷା କରିଛନ୍ତି ।
