ଭୁବନେଶ୍ୱର: ରାଜ୍ୟ ମନ୍ତ୍ରିମଣ୍ଡଳ ଅଦଳବଦଳ ନେଇ ଚାଲିଥିବା କଳ୍ପନାଜଳ୍ପନାର ଅବସାନ ଘଟିବାକୁ ଯାଉଛି । ଆସନ୍ତା ସୋମବାର ପୂର୍ବାହ୍ନରେ ମନ୍ତ୍ରିମଣ୍ଡଳ ସମ୍ପ୍ରସାରଣ ହେବ । ଲୋକସଭା ଭବନର କନଭେନସନ୍ ହଲ୍ ରେ ୩ ମନ୍ତ୍ରୀ ଶପଥ ନେବେ । ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ନୂଆ ମନ୍ତ୍ରୀଙ୍କୁ ଶପଥପାଠ କରାଇବେ ।
ଗତ ୧୨ ତାରିଖରେ ବାଚସ୍ପତି ବିକ୍ରମ କେଶରୀ ଆରୁଖ ଅଚାନକ ବାଚସ୍ପତି ପଦରୁ ଇସ୍ତଫା ଦେଇଥିଲେ । ତାଙ୍କ ପରେ ପରେ ମନ୍ତ୍ରୀ ସମୀର ରଂଜନ ଦାଶ ଏବଂ ଶ୍ରୀକାନ୍ତ ସାହୁ ଇସ୍ତଫା ଦେଇଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିଲ୍ଲୀରେ ଥିବା ବେଳେ ବାଚସ୍ପତି ଓ ଦୁଇମନ୍ତ୍ରୀଙ୍କ ଇସ୍ତଫା ହଇଚଇ ସୃଷ୍ଟି କରିଥିଲା । ଖୁବ୍ ଶୀଘ୍ର ମନ୍ତ୍ରିମଣ୍ଡଳ ସମ୍ପ୍ରସାରଣ ହେବ ବୋଲି ଏହା ସ୍ପଷ୍ଟ ଆଭାସ ଦେଇଥିଲା ।
ତେବେ ରାଜ୍ୟପାଳ ପ୍ରଫେସର ଲାଲ୍ ଲମ୍ବା ଛୁଟିରୁ ଫେରିଲା ପରେ ମେ’ ୨୨ ପରେ ନୂଆ ମନ୍ତ୍ରୀ ଶପଥ ନେବେ ବୋଲି ଚର୍ଚ୍ଚା ହୋଇଥିଲା । ମାତ୍ର ରାଜ୍ୟପାଳ ତାଙ୍କୁ ଛୁଟି ସରିବାର ଦିନକ ପୂର୍ବରୁ ଆସନ୍ତାକାଲି ରବିବାର ସଂଧ୍ୟାରେ ଭୁବନେଶ୍ୱର ଫେରି ଆସୁଛନ୍ତି । ସୋମବାର ସକାଳ ୯.୩୦ ରେ ଲୋକସଭା ଭବନର କନଭେନସନ୍ ହଲ୍ ରେ ଶପଥ ଗ୍ରହଣ ଉତ୍ସବର ଆୟୋଜନ କରାଯାଇଛି ।
ନବୀନଙ୍କ ମନ୍ତ୍ରିମଣ୍ଡଳରେ ୩ ଜଣ ସାମିଲ ହେବେ । ସମୀର ଦାଶ ଏବଂ ଶ୍ରୀକାନ୍ତ ସାହୁଙ୍କ ଇସ୍ତଫା ପୂର୍ବରୁ ନବ ଦାସଙ୍କ ମୃତ୍ୟୁ ପରେ ତାଙ୍କ ଜାଗା ମଧ୍ୟ ଖାଲି ରହିଛି । ସୁତରାଂ ଖାଲି ପଡ଼ିଥିବା ଏହି ୩ ଜାଗା ପୂରଣ ହେବ । ସ୍ୱର୍ଗତ ଦାସଙ୍କ ହାତରେ ଥିବା ସ୍ୱାସ୍ଥ୍ୟ ବିଭାଗ ଅର୍ଥମନ୍ତ୍ରୀ ନିରଞ୍ଜନ ପୂଜାରୀଙ୍କ ଉପରେ ନ୍ୟସ୍ତ ଥିବା ବେଳେ ସମୀର ଓ ଶ୍ରୀକାନ୍ତଙ୍କ ହାତରେ ଥିବା ଗଣଶିକ୍ଷା ଓ ଶ୍ରମ ବିଭାଗ ରାଜସ୍ୱମନ୍ତ୍ରୀ ପ୍ରମିଳା ମଲ୍ଲିକଙ୍କ ଉପରେ ନ୍ୟସ୍ତ ରହିଛି । ୩ ନୂଆ ମନ୍ତ୍ରୀଙ୍କ ଭିତରେ ଏହି ବିଭାଗ ଆବଣ୍ଟନ ହେବ । ଏଥିସହ କିଛି ମନ୍ତ୍ରୀଙ୍କ ମଧ୍ୟରେ ବିଭାଗ ଅଦବଳବଦଳ ହୋଇପାରେ ବୋଲି ଚର୍ଚ୍ଚା ହେଉଛି ।
