ଭୁବନେଶ୍ୱର: ମନ୍ତ୍ରୀ ନବ ଦାସଙ୍କ ହତ୍ୟା ମାମଲାରେ ଆମେରିକାର ଫେଡେରାଲ୍ ବ୍ୟୁରୋ ଅଫ୍ ଇନଭେଷ୍ଟିଗେସନ୍(FBI)ର ସହାୟତା ପାଇଁ ରାଜ୍ୟ ସରକାର ଚିଠି ଲେଖିଥିଲେ । ମାତ୍ର କିଛି ଗଣମାଧ୍ୟମରେ ଏହାକୁ ନେଇ ସମ୍ପୂର୍ଣ୍ଣ ମିଛ, ଦାୟିତ୍ୱହୀନ ଓ ଉଦ୍ଦେଶ୍ୟମୂଳକ ଖବର ପ୍ରକାଶ ପାଇଛି । ଏଫବିଆଇର ସହାୟତା ପାଇଁ ଫେବୃଆରୀ ୨୨ ତାରିଖରେ ଗୃହ ମନ୍ତ୍ରଣାଳୟକୁ ରାଜ୍ୟ ଗୃହ ବିଭାଗ ଚିଠି ଲେଖିଥିଲା ବୋଲି କ୍ରାଇମବ୍ରାଞ୍ଚ ପକ୍ଷରୁ ଆଜି ସ୍ପଷ୍ଟ କରାଯାଇଛି ।
କ୍ରାଇମବ୍ରାଞ୍ଚର ପ୍ରେସ୍ ରିଲିଜ୍ ରେ ଗୃହ ମନ୍ତ୍ରଣାଳୟକୁ ଦିଆଯାଇଥିବା ଚିଠି ନମ୍ବର ସହ ବିସ୍ତୃତ ତଥ୍ୟ ଦିଆଯାଇଛି । ସେଥିରେ କୁହାଯାଇଛି, ନବ ଦାସଙ୍କ ହତ୍ୟା ଅଭିଯୁକ୍ତ ଗୋପାଳ ଦାସର ପରିବାର ଲୋକ ତାର ମାନସିକ ସ୍ଥିତି ଠିକ ନ ଥିବା କହିଥିଲେ । ମାତ୍ର ମେଡିକାଲ୍ ଟିମ୍ ଦ୍ୱାରା ଯାଞ୍ଚରୁ ସେ ମାନସିକ ଭାବେ ସମ୍ପୂର୍ଣ୍ଣ ସୁସ୍ଥ ଥିବା ଜଣାପଡ଼ିଥିଲା । ଅଧିକ ସ୍ପଷ୍ଟତା ପାଇଁ ନୂଆଦିଲ୍ଲୀର ସିଏଫଏସଏଲ, ଗୁଜୁରାଟର ଏସଏଫଏଲ ଏବଂ କଟକ ଏସସିବି ସହାୟତା ନିଆଯାଇଥିଲା । ନିମହାନ୍ସ ବେଙ୍ଗାଲୁରୁକୁ ମଧ୍ୟ ଅନୁରୋଧ କରାଯାଇଥିଲା । ମାତ୍ର ନିମହାନ୍ସ ଏହା ଖାରଜ କରିଥିଲା । ଗୋପାଳର ବ୍ୟବହାରିକ ଚାଲିଚଳଣର ଅଧିକ ପରୀକ୍ଷା ନିରୀକ୍ଷା ଲାଗି ଏଫବିଆଇର ସହାୟତା ଲୋଡିବା ପାଇଁ ସ୍ଥିର କରାଯାଇଥିଲା ।
ନିୟମାନୁସାରେ କୌଣସି ରାଜ୍ୟ ସରକାର ସିଧାସଳଖ ଏଫବିଆଇକୁ ସହାୟତା ପାଇଁ କହିପାରିବେନି । ସୁତରାଂ କେନ୍ଦ୍ର ଗୃହ ମନ୍ତ୍ରଣାଳୟକୁ ଜଣା ଯାଇଥିଲା । ଫେବୃଆରୀ ୨୨ରେ କେନ୍ଦ୍ରକୁ ଏ ନେଇ ରାଜ୍ୟ ସରକାର ଚିଠି ଲେଖିଥିଲେ । ଚିଠି ନମ୍ବର 187/c/22.02.2023 ରେ ଏଫବିଆଇର ସହାୟତା ପାଇଁ ଗୃହ ମନ୍ତ୍ରଣାଳୟକୁ ଅନୁରୋଧ କରାଯାଇଥିଲା । ମାତ୍ର କିଛି ଗଣମାଧ୍ୟମରେ ଏହାକୁ ନେଇ ମିଛ ଖବର ପ୍ରକାଶ ପାଇଛି । ଅସମର୍ଥିତ ଖବର ପ୍ରସାରଣ ନ କରିବାକୁ କ୍ରାଇମବ୍ରାଞ୍ଚ ପକ୍ଷରୁ ଅନୁରୋଧ କରାଯାଇଛି ।
ସୂଚନାଯୋଗ୍ୟ, ମନ୍ତ୍ରୀ ନବ ଦାସ ହତ୍ୟା ମାମଲାରେ ଗତକାଲି କ୍ରାଇମବ୍ରାଞ୍ଚ ପକ୍ଷରୁ ଝାରସୁଗୁଡ଼ା ଜେଏମଏଫସି କୋର୍ଟରେ ୫୪୩ ପୃଷ୍ଠାର ଚାର୍ଜସିଟ୍ ଦାଖଲ କରାଯାଇଛି । ନବଙ୍କୁ ବ୍ୟକ୍ତିଗତ ଆକ୍ରୋଶରୁ ଏଏସଆଇ ଗୋପାଳ ଦାସ ହତ୍ୟା କରିଥିବା ଏଥିରେ ଉଲ୍ଲେଖ କରାଯାଇଛି । ତେବେ ବିରୋଧୀ ଦଳ ଏହାକୁ ଗ୍ରହଣ କରିନାହାନ୍ତି । ପ୍ରକୃତ ସତ୍ୟକୁ ଚପାଇ ଦେବା ପାଇଁ ଉଦ୍ୟମ ହୋଇଥିବା ସେମାନେ ଅଭିଯୋଗ କରିଛନ୍ତି ।
