ଭୁବନେଶ୍ୱର: ମହାଲିଙ୍ଗ ସନସାଇନ୍ ପବ୍ଲିକ୍ ସ୍କୁଲ ଅଧ୍ୟକ୍ଷା ମମିତା ମେହେର ହତ୍ୟାକାଣ୍ଡରେ ବିବାଦକୁ ଆସିଥିବା ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବହିଷ୍କାର ଦାବି ଜୋର୍ ହୋଇଛି । ଉଭୟ ବିଜେପି ଓ କଂଗ୍ରେସ ପକ୍ଷରୁ ସାରା ରାଜ୍ୟରେ ବିକ୍ଷୋଭ ଆନ୍ଦୋଳନ ଆରମ୍ଭ ହୋଇଛି । ଦିବ୍ୟଶଙ୍କରଙ୍କୁ ତୁରନ୍ତ ବହିଷ୍କାର ପାଇଁ ରାଜ୍ୟପାଳଙ୍କ ହସ୍ତକ୍ଷେପ ଲୋଡ଼ାଯାଇଛି । ରାଜ୍ୟ ମହିଳା କମିଶନ ଏବଂ ଜାତୀୟ ମହିଳା କମିଶନ ମଧ୍ୟ ମମିତା ହତ୍ୟା ମାମଲାକୁ ଗମ୍ଭୀରତାର ସହ ଗ୍ରହଣ କରିଛନ୍ତି ।
ମମିତାଙ୍କୁ ଗୋବିନ୍ଦ ସାହୁ ହତ୍ୟା କରିଥିବା ପୁଲିସ ଖୁଲାସା କରିସାରିଲାଣି । ଗୋବିନ୍ଦର ପରକୀୟା ପ୍ରୀତି ସମ୍ପର୍କରେ ଜାଣିଥିବା ମମିତାଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଛି ଏବଂ ଗୋବିନ୍ଦ ନିଜ କାର୍ ରେ ହିଁ ତାଙ୍କୁ ମାରି ପରେ ଅଧାପୋଡ଼ା ଅବସ୍ଥାରେ ମିନି ଷ୍ଟାଡିୟମ୍ ପଡ଼ିଆରେ ପୋତି ଦେଇଥିବା କୁହାଯାଇଛି ।
ତେବେ ଏହି ମାମଲାରେ ମନ୍ତ୍ରୀ ଦିବ୍ୟଶଙ୍କରଙ୍କୁ ଯୋଡିଛି ଗୋବିନ୍ଦଙ୍କ ସହ ତାଙ୍କର ଘନିଷ୍ଠ ସମ୍ପର୍କ । ଅଭିଯୋଗ ଅନୁଯାୟୀ, ଦିବ୍ୟଶଙ୍କରଙ୍କ ବଳରେ ଗୋବିନ୍ଦ ପ୍ରଚଣ୍ଡ ବଳୀୟାନ୍ ହୋଇଥିଲେ ଏବଂ ଗୋବିନ୍ଦଙ୍କ ମାଲିକାନାରେ ଥିବା ମହାଲିଙ୍ଗ ସ୍କୁଲ ଓ କଲେଜକୁ ନିୟମିତ ଯାଉଥିଲେ । ଦିବ୍ୟଶଙ୍କର ସେଠାକୁ ନିଜେ ଯିବା ସହ ଅନ୍ୟ ମନ୍ତ୍ରୀମାନଙ୍କୁ ମଧ୍ୟ ନେଉଥିଲେ । ଗୋବିନ୍ଦଙ୍କ ତତ୍ୱାବଧାନରେ ସେଠାରେ ସେକ୍ସ ସ୍କାଣ୍ଡାଲ୍ ଚାଲୁଥିବା ଭଳି ସଙ୍ଗୀନ ଅଭିଯୋଗ ମଧ୍ୟ ହୋଇଛି ।
ମମିତା ନିଖୋଜ ହେବା ପରେ ଗୋବିନ୍ଦଙ୍କୁ ପୁଲିସ ଉଠାଇ ଆଣି ଟିଟିଲାଗଡ଼ ପୁଲିସ ବାରାକ୍ ରେ ରଖିଥିଲା । ସେତେବେଳେ ମନ୍ତ୍ରୀ ଦିବ୍ୟଶଙ୍କରଙ୍କ ନାଁ ମାମଲାରେ ଯୋଡି ହୋଇ ନ ଥିଲା କି ସେ କାହାରି ସନ୍ଦେହରେ ନ ଥିଲେ । ମାତ୍ର ୪ ଦିନ ବାରାକ୍ ରେ ଥିବା ଗୋବିନ୍ଦ ଫେରାର ହୋଇଯିବାରୁ ଦିବ୍ୟଶଙ୍କରଙ୍କ ଭୂମିକା ଉପରେ ଅଙ୍ଗୁଳି ଉଠିଥିଲା । ମନ୍ତ୍ରୀଙ୍କ ଚାପରେ ପୁଲିସ ତାଙ୍କୁ ବାରାକ୍ ରୁ ଫେରାର କରାଇ ଦେଇଥିବା ବିରୋଧୀ ଦଳ ଅଭିଯୋଗ କରିଥିଲେ । ମମିତାଙ୍କ ପରିବାର ପକ୍ଷରୁ ମଧ୍ୟ ଗୁରୁତର ଅଭିଯୋଗମାନ ଆସିଲା । ମନ୍ତ୍ରୀଙ୍କ ସହ ଗୋବିନ୍ଦଙ୍କ ଘନିଷ୍ଠତାର ପ୍ରମାଣ ଘୁରି ବୁଲିଲା ।
ଫେରାର ଗୋବିନ୍ଦଙ୍କୁ ବଲାଙ୍ଗୀର ପୁଲିସ ୨୪ ଘଣ୍ଟା ମଧ୍ୟରେ ଧରିବା ଏବଂ ତାଙ୍କଠାରୁ ସତ ଓଗାଳି ଆଜି କୋର୍ଟ ଚାଲାଣ କରି ରିମାଣ୍ଡରେ ଆଣିଥିଲେ ମଧ୍ୟ ମନ୍ତ୍ରୀ ଦିବ୍ୟଶଙ୍କର ସନ୍ଦେହମୁକ୍ତ ହୋଇନାହାନ୍ତି । ବରଂ ଗୋବିନ୍ଦ ତାଙ୍କ ପ୍ରୋତ୍ସାହନରେ ବଳୀୟାନ୍ ହୋଇ ଏଭଳି ଜଘନ୍ୟ କାଣ୍ଡ କରିବାକୁ ସାହାସ କରିଥିବା ଅଭିଯୋଗ ହେଉଛି ।
ସୁତରାଂ ଗୃହ ରାଷ୍ଟ୍ରମନ୍ତ୍ରୀ ଦାୟିତ୍ୱରେ ଥିବା ଦିବ୍ୟଶଙ୍କରଙ୍କୁ ବହିଷ୍କାର କରି ତଦନ୍ତ ପରିସରଭୁକ୍ତ କରିବାକୁ ବିରୋଧୀ ଦଳ ଦାବି କରିଛନ୍ତି । ଆଜି ପୃଥକ୍ ଭାବେ ବିଜେପି ଓ କଂଗ୍ରେସର ପ୍ରତିନିଧି ଦଳ ରାଜ୍ୟପାଳଙ୍କୁ ଭେଟି ଏ ମର୍ମରେ ସ୍ମାରକପତ୍ର ଦେଇଛନ୍ତି । ନିରପେକ୍ଷ ତଦନ୍ତ ପାଇଁ ମନ୍ତ୍ରୀଙ୍କ ବହିଷ୍କାର ଦାବି କରିଛନ୍ତି । ରାଜ୍ୟ ପୁଲିସ ଉପରୁ ଭରସା ତୁଟାଇ ମାମଲାର ସିବିଆଇ କିମ୍ବା ବିଚାର ବିଭାଗୀୟ ତଦନ୍ତ ପାଇଁ ସେମାନେ ଦାବି କରିଛନ୍ତି ।
ଦିବ୍ୟଶଙ୍କରଙ୍କ ବହିଷ୍କାର ଓ ଗିରଫ ଦାବିରେ ଆଜି ରାଜ୍ୟର ବିଭିନ୍ନ ସ୍ଥାନରେ ବିଜେପି ଓ କଂଗ୍ରେସ ପକ୍ଷରୁ ବିକ୍ଷୋଭ ପ୍ରଦର୍ଶନ, ପୋଡ଼ାଜଳା ହୋଇଥିଲା । ବିଜେପି ମହିଳା ମୋର୍ଚ୍ଚା କର୍ମୀମାନେ ନବୀନ ନିବାସ ଆଗରେ ବିକ୍ଷୋଭ ପ୍ରଦର୍ଶନ କରିଥିଲେ । ନବୀନ ନିବାସକୁ ଧସେଇ ପଶିବାକୁ ଉଦ୍ୟମ କଲା ବେଳେ ପୁଲିସ ସହ ଧସ୍ତାଧସ୍ତି ହୋଇଥିଲା । ପରେ ପୁଲିସ ସେମାନଙ୍କୁ ଗିରଫ କରିନେଇଥିଲା ।
ଯୁବ କଂଗ୍ରେସ ପକ୍ଷରୁ ମଧ୍ୟ ନବୀନ ନିବାସ ଆଗରେ ବିକ୍ଷୋଭ ଓ କଳାପତାକା ପ୍ରଦର୍ଶନ କରାଯାଇଥିଲା । ଯୁବ କଂଗ୍ରେସ କର୍ମୀମାନେ ନବୀନ ନିବାସ ଭିତରକୁ ଧସେଇ ପଶିବାକୁ ଉଦ୍ୟମ କରୁଥିଲା ବେଳେ ପୁଲିସ ସହ ଧସ୍ତାଧସ୍ତି ହୋଇଥିଲା ।
