ଭୁବନେଶ୍ୱର: କାଁ ଭାଁ ଗଣ୍ଡଗୋଳ ମଧ୍ୟରେ ଆଜି ଶେଷ ହୋଇଛି ତୃତୀୟ ପର୍ଯ୍ୟାୟ ମତଦାନ । ମୁଖ୍ୟ ନିର୍ବାଚନ ଅଧିକାରୀ ନିକୁଞ୍ଜ ବିହାରୀ ଧଳଙ୍କ ସୂଚନା ଅନୁଯାୟୀ ସଂଧ୍ୟା ୬ଟା ସୁଦ୍ଧା ୫୯.୭୨% ମତଦାନ ହୋଇଛି । ସମ୍ବଲପୁର ସଂସଦୀୟ କ୍ଷେତ୍ରରେ ସର୍ବାଧିକ ୬୬.୬୭% ମତଦାନ ହୋଇଥିଲା ବେଳେ କେନ୍ଦୁଝରରେ ୬୨.୪୩%, ପୁରୀରେ ୬୧.୧୭%, ଢ଼େଙ୍କାନାଳରେ ୬୦.୮୮%, କଟକରେ ୫୪.୩୬% ଏବଂ ଭୁବନେଶ୍ୱରରେ ସର୍ବନିମ୍ନ ୫୩.୫୪% ମତଦାନ ହୋଇଛି । ଅଧିକାଂଶ ଜାଗାରେ ପ୍ରବଳ ଭିଡ଼ ଥିବାରୁ ଏହି ହାର ଆହୁରି ବୃଦ୍ଧି ପାଇବ ବୋଲି କୁହାଯାଇଛି ।
ଆଜି ସମ୍ବଲପୁର, ଢ଼େଙ୍କାନାଳ, କେନ୍ଦୁଝର, କଟକ, ପୁରୀ, ଭୁବନେଶ୍ୱର ଲୋକସଭା ଆସନ ଓ ଏହା ଅନ୍ତର୍ଗତ ୪୨ଟି ବିଧାନସଭା ଆସନରେ ମତଦାନ ଅନୁଷ୍ଠିତ ହୋଇଥିଲା । ୬ଟି ଲୋକସଭା ଆସନରେ ୬୪ ଜଣ ପ୍ରାର୍ଥୀ ଏବଂ ୪୨ଟି ବିଧାନସଭା ଆସନରେ ୩୮୩ ପ୍ରାର୍ଥୀ ଏହିଭଳି ୪୮ ଆସନରେ ମୋଟ୍ ୪୪୭ ପ୍ରାର୍ଥୀଙ୍କର ଭାଗ୍ୟ ଇଭିଏମ୍ ରେ ସିଲ୍ ହୋଇଛି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ନବୀନ ନିବାସରୁ ନିକଟସ୍ଥ ଭୋଟ ଗ୍ରହଣ କେନ୍ଦ୍ରକୁ ଚାଲି ଚାଲି ଯାଇ ଭୋଟ ଦେଇଥିଲେ । ସକାଳ ପ୍ରାୟ ୧୦ଟା ବେଳେ ମୁଖ୍ୟମନ୍ତ୍ରୀ ଭୁବନେଶ୍ୱର ଏରୋଡ୍ରମ୍ ପ୍ରାଇମେରୀ ସ୍କୁଲର ୧୧୪ ନମ୍ବର ବୁଥ୍ ରେ ପହଞ୍ଚି ଭୋଟ ଦେଇଥିଲେ । ବିଜେଡି ବହୁ ଆସନ ସହ ଷଷ୍ଠଥର ପାଇଁ ସରକାର ଗଢ଼ିବ ବୋଲି ମୁଖ୍ୟମନ୍ତ୍ରୀ ଦମ୍ଭୋକ୍ତି ପ୍ରକାଶ କରିଥିଲେ । ୟୁନିଟ୍-୬ ଅଞ୍ଚଳର ଏକ ମତଦାନ କେନ୍ଦ୍ରକୁ ଅଟୋରେ ଆସି ଭୋଟ ଦେଇଥିଲେ ବିଜେଡି ନେତା କାର୍ତ୍ତିକ ପାଣ୍ଡିଆନ୍ । ଅପରାହ୍ନରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ରାଜଧାନୀର ଏକ କେନ୍ଦ୍ରରେ ଭୋଟ ଦେଇଥିଲେ ।
