ଭୁବନେଶ୍ୱର: ରାଜ୍ୟରେ ଆଗୁଆ ପଞ୍ଚାୟତ ନିର୍ବାଚନ ହୋଇପାରେ ବୋଲି ବିଜେପି ରାଜ୍ୟ ସଭାପତି ମନମୋହନ ସାମଲ ଗତକାଲି ସୂଚନା ଦେଇଥିଲେ । ଜନଗଣନା ପାଇଁ ନିର୍ଦ୍ଧାରିତ ସମୟର ଦୁଇରୁ ତିନି ମାସ ପୂର୍ବରୁ ନିର୍ବାଚନ ଅନୁଷ୍ଠିତ ହେବ ବୋଲି ଆକଳନ କରିଥିଲେ । ଏହି ଦୃଷ୍ଟିରୁ ୬ ମାସ ଭିତରେ ବାକିଆ କାମ ସାରି ନିର୍ବାଚନ ପାଇଁ ପ୍ରସ୍ତୁତ ରହିବାକୁ ସେ ସମର୍ଥକ ସରପଞ୍ଚ ଓ ସମିତି ସଭ୍ୟମାନଙ୍କୁ ଆହ୍ୱାନ ଦେଇଥିଲେ । ଗଣମାଧ୍ୟମରେ ଏହା ମୁଖ୍ୟ ଶିରୋନାମା ପାଲଟିଥିଲା ।
ମାତ୍ର ଶାସକ ଦଳର ରାଜ୍ୟ ସଭାପତିଙ୍କ ଏହି ଆକଳନ ଯେ ଭୁଲ୍ ତାହା ଆଜି ସ୍ପଷ୍ଟ କରିଛନ୍ତି ରାଜ୍ୟ ନିର୍ବାଚନ କମିସନର ମଧୁସୂଦନ ପାଢ଼ୀ । ପଞ୍ଚାୟତ ନିର୍ବାଚନ ନିର୍ଦ୍ଧାରିତ ସମୟରେ ହେବ ବୋଲି କହିଛନ୍ତି । ପଞ୍ଚାୟତର କାର୍ଯ୍ୟକାଳ ୫ ବର୍ଷ । ଏହି କାର୍ଯ୍ୟକାଳ ସରିଲେ ଯେମିତି ନିର୍ବାଚନ ହେବା କଥା ହେବ । ସମୟ ଆସିଲେ ଏହାର ନିଷ୍ପତ୍ତି ନିଆଯିବ । ତେବେ ଏଥିପାଇଁ ସବ୍ ଡିଭିଜନସ୍ତରରେ ପ୍ରସ୍ତୁତି ଆରମ୍ଭ ହୋଇଛି । ୧୦ ଦିନ ଭିତରେ ଜିଲ୍ଲାପାଳଙ୍କ ସହ ବୈଠକ ହୋଇଛି । ବୁଥ୍, ବ୍ୟାଲେଟ୍ ବକ୍ସ, ଇଭିଏମ୍ ସମେତ ଆବଶ୍ୟକୀୟ କାମ ଆରମ୍ଭ କରିବାକୁ ନିର୍ଦ୍ଦେଶ ଦିଆଯାଇଥିବା ସେ ସୂଚନା ଦେଇଛନ୍ତି ।
ସୂଚନାଥାଉକି, ବର୍ତ୍ତମାନର ପଞ୍ଚାୟତ କାର୍ଯ୍ୟକାଳ ୨୦୨୭ ଫେବ୍ରୁଆରିରେ ସରୁଛି । ନିର୍ଦ୍ଧାରିତ ସମୟରେ ହେଲେ, ଆଗାମୀ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଜାନୁଆରୀ-ଫେବ୍ରୁଆରି ମାସରେ ଅନୁଷ୍ଠିତ ହେବ । ସାରା ଦେଶରେ ଦ୍ୱିତୀୟ ପର୍ଯ୍ୟାୟ ଜନଗଣନା ଆସନ୍ତାବର୍ଷ ଫେବ୍ରୁଆରି ୯ରୁ ୨୮ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଥିବାରୁ ତା ପୂର୍ବରୁ ପଞ୍ଚାୟତ ନିର୍ବାଚନ ଶେଷ ହେବ ।
