ଭୁୁବନେଶ୍ୱର: ବିଜେଡି ରାଜନୀତିର କେନ୍ଦ୍ରବିନ୍ଦୁ ନବୀନ ନିବାସ ପୁଣି ଚଳଚଞ୍ଚଳ ହୋଇଛି । ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ଥିବା ବେଳେ ଦଳୀୟ ନେତା ଓ କର୍ମୀଙ୍କ ଯେମିତି ଗହଳି ଲାଗୁଥିଲା ଏବେ ସେହି ଅବସ୍ଥା ପୁଣି ଫେରି ଆସିଛି । ଆଜି ଶହ ଶହ ଛାତ୍ର, ମହିଳା, ଯୁବକ, ପଞ୍ଚାୟତ ପ୍ରତିନିଧି ଓ ବିଜେଡି କର୍ମୀ ନବୀନ ନିବାସରେ ଦଳ ସଭାପତି ତଥା ବିରୋଧୀ ଦଳ ନେତା ଶ୍ରୀ ପଟ୍ଟନାୟକଙ୍କୁ ଭେଟି ବିଭିନ୍ନ ପ୍ରସଙ୍ଗରେ ଆଲୋଚନା କରିଥିଲେ । ଆଗାମୀ ଦିନରେ ଦଳୀୟ କାର୍ଯ୍ୟକ୍ରମକୁ ଆହୁରି ବ୍ୟାପକ କରାଯିବ ବୋଲି ଘୋଷଣା କରିଥିଲେ ସୁପ୍ରିମୋ ।
ନବୀନ ନିବାସରେ ନେତାଙ୍କୁ ଭେଟିବାକୁ ଆସିଥିବା ଲୋକଙ୍କ ମଧ୍ୟରେ ଥିଲେ ବୋଲଗଡ଼ ବେଗୁନିଆ ଏବଂ ପାଲଲହଡ଼ା ବିଧାନସଭା ନିର୍ବାଚନମଣ୍ଡଳୀର ସରପଞ୍ଚ, ଜିଲ୍ଲା ପରିଷଦ ସଭ୍ୟ, ପଞ୍ଚାୟତ ସଭ୍ୟ, ବ୍ଲକ୍ ଅଧ୍ୟକ୍ଷକଙ୍କ ସହ ଶତାଧିକ ଦଳୀୟ କର୍ମୀ । ସେହିଭଳି ଭୁବନେଶ୍ୱର ମଧ୍ୟ ନିର୍ବାଚନମଣ୍ଡଳୀରୁ ଆସିଥିଲେ ଯୁବ, ଛାତ୍ରଛାତ୍ରୀ ଓ ମହିଳା ନେତୃବୃନ୍ଦ । ନବୀନ ବାବୁଙ୍କୁ ଭେଟି ସେମାନଙ୍କ ବିଭିନ୍ନ ସମସ୍ୟା ବିଷୟରେ ଆଲୋଚନା କରିବା ସହ ଦଳର ସଂଗଠନକୁ ମଜବୁତ କରିବା ପାଇଁ ସଂକଳ୍ପବଦ୍ଧ ଭାବେ କାମ କରିବାକୁ ଘୋଷଣା କରିଥିଲେ ।
ଏହି ଅବସରରେ ଶ୍ରୀ ପଟ୍ଟନାୟକ ସମସ୍ତଙ୍କୁ ଧନ୍ୟବାଦ ଜଣାଇବା ସହ ଆଗାମୀ ଦିନରେ ଦଳୀୟ କାର୍ଯ୍ୟକ୍ରମକୁ ଆହୁରି ବ୍ୟାପକ କରାଯିବ ବୋଲି ଘୋଷଣା କରିଥିଲେ । ଏଥିପାଇଁ ସେ ସମସ୍ତଙ୍କୁ ଉତ୍ସାହିତ କରିଥିଲେ ।
