ଚୁଲିକି ଗଲା ଓଡ଼ିଆ ଅସ୍ମିତା !

ଭୁବନେଶ୍ୱର: ନିର୍ବାଚନ ବେଳେ ଓଡ଼ିଆ ଅସ୍ମିତା କଥା କହି ବିଜେପି ନେତାମାନେ ହୁରି ପକାଇଥିଲେ । ଭି.କେ. ପାଣ୍ଡିଆନଙ୍କୁ ସାମନାରେ ରଖି ସବୁ ଅଣଓଡ଼ିଆ ଅଧିକାରୀମାନଙ୍କୁ ନିଶାନା କରିଥିଲେ । ଏଠି ଅଣଓଡ଼ିଆଙ୍କ ଶାସନ ଚାଲିବ ନାହିଁ । ସେମାନଙ୍କ ହାତରେ ଓଡିଆ ଅସ୍ମିତା ବିପଦରେ ବୋଲି ଲୋକଙ୍କୁ ଶୁଣାଇ କେନ୍ଦ୍ରୀୟ ବିଜେପିର ଶୀର୍ଷ ନେତାମାନେ ମଧ୍ୟ ଏଠି ଭାଷଣ ବର୍ଷା କଲେ । ଏହି ଓଡିଆ ଅସ୍ମିତାର ସ୍ଲୋଗାନ୍ ଓଡ଼ିଶାବାସୀଙ୍କ ମନକୁ ବି ଛୁଇଁଗଲା । ଯାହାର ଫଳ ହେଲା ବିଜେପି ରାଜ୍ୟରେ ଶାସନ କ୍ଷମତାକୁ ଆସିଲା ।

ବିଜେପି ଶାସନକୁ ଏବେ ମାତ୍ର ୨ ମାସ ପୂରିଛି । ମୋହନ ସରକାର ଓଡ଼ିଆ ଅସ୍ମିତାର ସୁରକ୍ଷାକବଚ ବୋଲି ଧୂମ୍ ପ୍ରଚାର କରୁଛନ୍ତି । ମାତ୍ର ତାହା ଲୋକଦେଖାଣିଆ ବୋଲି ପ୍ରଥମରୁ ପ୍ରମାଣିତ ହୋଇଗଲାଣି । ବିଜେପି ଯେଉଁ ଅଣଓଡ଼ିଆଙ୍କ ଶାସନ କଥା କହି ବିଜେଡି ସରକାରଙ୍କୁ ଟାର୍ଗେଟ୍ କରିଥିଲା, ନିଜେ ଶାସନକୁ ଆସିଲା ପରେ ତାହା ପ୍ରଥମରୁ ହିଁ ଆପଣେଇ ସାରିଲାଣି ।

ରାଜ୍ୟର ଦୁଇଟି ସର୍ବୋଚ୍ଚ ପଦବୀରେ ଅଣଓଡ଼ିଆ ଅଧିକାରୀଙ୍କୁ ନିଯୁକ୍ତି ଦେଇଛନ୍ତି ମୋହନ ସରକାର । ମୋହନ ସରକାର ଆସୁ ଆସୁ ମୁଖ୍ୟ ଶାସନ ସଚିବ ଭାବେ ମନୋଜ ଆହୁଜାଙ୍କୁ ନିଯୁକ୍ତି ଦେଇଥିବା ବେଳେ ଆଜି ୱାଇ.ବି ଖୁରାନିଆଙ୍କୁ ପୁଲିସ ଡିଜି ଭାବେ ନିଯୁକ୍ତି ଦେଇଛନ୍ତି । ୭ ମାସ ହେଲା ଅସ୍ଥାୟୀ ଡିଜି ଭାବେ ଦାୟିତ୍ୱ ସମ୍ଭାଳୁଥିବା ଓଡିଆ ପୁଅ ଅରୁଣ ଷଡ଼ଙ୍ଗୀଙ୍କଠାରୁ ସେ ଦାୟିତ୍ୱ ଗ୍ରହଣ କରିଛନ୍ତି ।

ଉଭୟ ମନୋଜ ଆହୁଜା ଏବଂ ୱାଇ.ବି ଖୁରାନିଆ ଦକ୍ଷ, ସଚ୍ଚୋଟ ଅଫିସର ଭାବେ ଜଣାଶୁଣା । ଦୁଇ ସର୍ବୋଚ୍ଚ ପଦରେ ସେମାନଙ୍କ ନିଯୁକ୍ତି ଉପରେ କାହାର ଆପତ୍ତି ନାହିଁ । କାରଣ ଆଇଏଏସ୍ କି ଆଇପିଏସ୍ ଙ୍କ ଭଳି ସର୍ବଭାରତୀୟ ଅଧିକାରୀମାନେ ତାଙ୍କ ରାଜ୍ୟ କ୍ୟାଡରରେ ଯେ କୌଣସି ପଦବୀରେ ରହିପାରିବେ । ଏଥିରେ ବାଛବିଚାର ରହିବା ଉଚିତ୍ ନୁହେଁ । ମାତ୍ର ବିଜେଡି ସରକାର ଅମଳରେ ଅଣଓଡିଆ ଅଫିସର ଭେଦଭାବ ସୃଷ୍ଟି କରିଥିବା ବିଜେପି ପାଇଁ ଏହା ବୁମେରାଂ ହୋଇଯାଇଛି । ଯେଉଁ ଅଣଓଡ଼ିଆ ଅଧିକାରୀଙ୍କୁ ନିଶାନା କରି ରାଜନୀତି କରୁଥିଲା ଏବେ ସେଇ ଅଣଓଡ଼ିଆଙ୍କ ହାତରେ କ୍ଷମତା ଦେଇ ନିଜକୁ ଭୁଲ୍ ବୋଲି ପ୍ରମାଣିତ କରିଛି ।

ନିଶ୍ଚିତ ଭାବେ ରାଜନୈତିକ ଦୃଷ୍ଟିରୁ ବିଜେଡି ପାଇଁ ଏହା ବିଜେପିକୁ ସମାଲୋଚନାର ସୁଯୋଗ ଦେଇଛି । ବିଜେପି ସରକାର ଓଡ଼ିଆ ଅସ୍ମିତାକୁ ଏକ ପ୍ରହସନରେ ପରିଣତ କରିଛନ୍ତି ବୋଲି ବିଜେଡି ମୁଖପାତ୍ର ଶ୍ରୀମତୀ ଲେଖାଶ୍ରୀ ସାମନ୍ତସିଂହାର ଆଜି ଏକ ସାମ୍ବାଦିକ ସମ୍ମିଳନୀରେ କଟାକ୍ଷ କରିଛନ୍ତି । ସେ କହିଛନ୍ତି ଓଡ଼ିଶାରେ ଅଣଓଡ଼ିଆଙ୍କ ରାଜ୍ ଚାଲିଛି ବୋଲି କହୁଥିବା ବିଜେପି ଆଜି ଅଣଓଡ଼ିଆଙ୍କୁ ଗୁରୁତ୍ୱ ଦେଉଛି । ଏହାଦ୍ୱାରା ବିଜେପିର ଦୋମୁହାଁ ନୀତି ପଦାରେ ପଡ଼ିଛି ବୋଲି ସେ କହିଛନ୍ତି ।

ଏଥିସହ ସେ ଦଳ ପକ୍ଷରୁ ସ୍ପଷ୍ଟ କରିଛନ୍ତି ଯେ ଆମେ କୌଣସି ଅଧିକାରୀଙ୍କୁ ବ୍ୟକ୍ତିଗତ ଭାବେ ବିରୋଧ କରୁନାହୁଁ କି ତାଙ୍କର ଯୋଗ୍ୟତା ବା ଦକ୍ଷତା ଉପରେ ପ୍ରଶ୍ନ ଉଠାଉ ନାହୁଁ । କେବଳ ବିଜେପିକୁ ପ୍ରଶ୍ନ କରିବାକୁ ଚାହୁଁଛୁ ଯେ ନିର୍ବାଚନ ପୂର୍ବରୁ ବିଜେପି ଯାହା କୁହେ, ସରକାରକୁ ଆସିଲା ପରେ ଠିକ ତାର ଓଲଟା କାର୍ଯ୍ୟ କରେ । ଯାହା ତାଙ୍କ କାର୍ଯ୍ୟକଳାପରୁ ସ୍ପଷ୍ଟ ପ୍ରମାଣିତ ।

କେବଳ ସର୍ବୋଚ୍ଚ ପଦବୀରେ ଅଣଓଡ଼ିଆଙ୍କୁ ଗୁରୁତ୍ୱ ଦେବାରେ ମୋହନ ସରକାର ସୀମିତ ନାହାନ୍ତି । ଜଣେ ଓଡ଼ିଆ ଅଧିକାରୀ(ଏଏସଓ)ଙ୍କୁ ତଣ୍ଟିଆ ଓ ଜୋତା ଚଟାଇଥିବା ଅଣଓଡ଼ିଆ ଯୁବକଙ୍କୁ ସୁରକ୍ଷା ଦିଆଯାଇଛି । ଅଭିଯୁକ୍ତ ଜଣଙ୍କ ରାଜ୍ୟପାଳ ରଘୁବର ଦାସଙ୍କ ପୁଅ ହୋଇଥିବାରୁ ତାଙ୍କ ପାଇଁ ଆଇନକାନୁନ ବାଟ ହୁଡ଼ିଯାଇଛି । ଜୁଲାଇ ୭ ତାରିଖରୁ ଅଭିଯୋଗ ହୋଇଥିଲେ ମଧ୍ୟ ଅଭିଯୁକ୍ତଙ୍କ ବିରୋଧରେ ଏ ପର୍ଯ୍ୟନ୍ତ କାର୍ଯ୍ୟାନୁଷ୍ଠାନ ହେଲା ନାହିଁ ।

ଏହି ଘଟଣାକୁ ନେଇ ବିଧାନସଭା ଅଶାନ୍ତ ହେବାରୁ ସରକାର ଚତୁରତାର ସହ ଏଡ଼ାଇ ଦେଇଥିଲେ । ପୁରୀ ଜିଲ୍ଲାପାଳ ତଦନ୍ତ କରି ୧୫ ଦିନ ଭିତରେ ରିପୋର୍ଟ ଦେବେ । ରିପୋର୍ଟ ଆସିଲା ପରେ ଦୋଷୀ ଯିଏ ହୁଅନ୍ତୁ ନା କାହିଁକି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଆଇନମନ୍ତ୍ରୀ ଗଣମାଧ୍ୟମରେ ବୟାନ ଦେଲେ । ମାତ୍ର ୧୫ ଦିନ ଯାଇ ଆହୁରି ୧୫ ଦିନ ବିତିବାକୁ ବସିଲାଣି । ଜିଲ୍ଲାପାଳଙ୍କ ରିପୋର୍ଟର ନାଁ ଗନ୍ଧ ନାହିଁ ।

ଏ ସମ୍ପର୍କରେ ନା ବିରୋଧୀ ଦଳ ନା ମୁଖ୍ୟ ଗଣମାଧ୍ୟମ ପ୍ରଶ୍ନ କରୁଛନ୍ତି । ଏଏସଓଙ୍କୁ ମାଡ଼ ଘଟଣା ବୋଧହୁଏ ସମସ୍ତେ ଭୁଲି ଗଲେଣି । ବିଜେପିର ଓଡ଼ିଆ ଅସ୍ମିତା ସତେ ଯେମିତି ଚୁଲିକି ଚାଲିଗଲାଣି!!