ଭୁବନେଶ୍ୱର: କଟକ ବଡ଼ ଡ଼ାକ୍ତରଖାନା(ଏସସିବି)ରେ ଏକ ଅଭାବନୀୟ ଘଟଣା ଘଟିଛି । ଚିକିତ୍ସା ପାଇଁ ଆସିଥିବା ଜଣେ ରୋଗୀଙ୍କୁ ଡାକ୍ତରଖାନାର ସୁରକ୍ଷାକର୍ମୀ ଏବଂ ଆଟେଣ୍ଡାଣ୍ଟ ପିଟି ପିଟି ମାରିଦେଇଥିବା ଅଭିଯୋଗ ହୋଇଛି । ଏ ନେଇ ତାଙ୍କ ପରିବାର ଲୋକଙ୍କ ପକ୍ଷରୁ ମଙ୍ଗଳାବାଗ ଥାନାରେ ଏତଲା ଦିଆଯାଇଛି । ମୃତକ ହେଉଛନ୍ତି ଯାଜପୁର ରୋଡ ଅଞ୍ଚଳର ଶ୍ରୀକାନ୍ତ ଦାସ(୩୮) । ୨୮ ତାରିଖରେ ମାନସିକ ରୋଗ ବିଭାଗରେ ଭର୍ତ୍ତି ହୋଇଥିଲେ ।
ମୃତକଙ୍କ ପତ୍ନୀ ସସ୍ମିତା ଦାସଙ୍କ ଅଭିଯୋଗ ଅନୁଯାୟୀ, ତାଙ୍କ ଘରର ଆର୍ଥିକ ପରିସ୍ଥିତିକୁ ନେଇ ବର୍ଷେ ହେଲା ସ୍ୱାମୀ ମଦ ପିଉଥିଲେ । ମଦ ଛଡ଼ାଇବା ପାଇଁ ସେ ଚିକିତ୍ସା କରାଉଥିଲେ । ଘରେ ରହି ଉପଚାର କରୁଥିଲେ ମଧ୍ୟ ମଝିରେ ମଝିରେ ଦେହ ଖରାପ ଯୋଗୁଁ ଡାକ୍ତରଖାନା ଆସିବାକୁ ପଡୁଥିଲା । ୨୮ ତାରିଖରେ ତାଙ୍କର ଭୀଷଣ ଦେହ ଖରାପ ହେବାରୁ ପରିବାର ଲୋକେ ତାଙ୍କୁ ଏସସିବିକୁ ଆଣିଥିଲେ । ମାତ୍ର ତାଙ୍କୁ ଜୋର ଜବରଦସ୍ତ ମାନସିକ ରୋଗ ବିଭାଗରେ ଭର୍ତ୍ତି କରାଯାଇଥିଲା । ଗତକାଲି ସଂଧ୍ୟା ପର୍ଯ୍ୟନ୍ତ ସବୁ ଠିକ୍ ଥିଲା । ମାତ୍ର ଆଉ ସେଠାରେ ରହିବେ ନାହିଁ ବୋଲି ରାତି ପ୍ରାୟ ୯ଟା ବେଳକୁ ଜିଦ୍ କରିଥିଲେ । ତାଙ୍କୁ ଘରକୁ ଛାଡ଼ିଦେବାକୁ ଅନୁରୋଧ କରିଥିଲେ । ମାତ୍ର ସେମାନେ ମନା କରିବା ପରେ ବାହାରେ ଅପେକ୍ଷା କରିଥିବା ଗାଁ ର ଜଣେ ପିଲାକୁ ଅନ୍ତତଃ ଭେଟିବାକୁ ଚାହିଁଥିଲେ । ସେ ବାହାରକୁ ଆସୁଥିଲା ବେଳେ ସେଠାରେ ଥିବା ସୁରକ୍ଷାକର୍ମୀ ଏବଂ ଆଟେଣ୍ଡାଣ୍ଟ ତାଙ୍କୁ ଟାଣି ନେଇ ନିର୍ଦ୍ଧୁମ ପିଟିଥିଲେ । ଗୋଟେ ପ୍ଲାଷ୍ଟିକ୍ ପାଇପ୍ ରେ ପିଟି ପିଟି ଦେହସାରା ନୋଳା ବସାଇ ଦେଇଥିଲେ । ତଳେ ପଡ଼ି ସେ ଛଟପଟ ହେଉଥିଲେ ମଧ୍ୟ ତାଙ୍କର ହାତଗୋଡ଼ ବାନ୍ଧି ନିର୍ଦ୍ଦୟ ଭାବରେ ପିଟି ଚାଲିଥିଲେ । କାନମୁଣ୍ଡାରେ ଗୋଟେ ପାହାର ବାଜିବାରୁ ସେ ନିଶ୍ଚଳ ହୋଇଯାଇଥିଲେ । ସେ ମରିଯାଇଥିବା ଜାଣି କୌଶଳକ୍ରମେ ଏକ ଇଞ୍ଜେକସନ୍ ଲଗାଇ ବେଡ୍ ରେ ଶୁଆଇ ଦେଇଥିଲେ । ଆଜି ପାହାନ୍ତରୁ ପରିବାର ଲୋକ ତାଙ୍କୁ ସେଠାରେ ମୃତ ଅବସ୍ଥାରେ ଦେଖିଥିଲେ ।
