ଭୁବନେଶ୍ୱର: ମନ୍ତ୍ରୀ ନବ ଦାସ ହତ୍ୟା ପଛରେ କୌଣସି ଷଡ଼ଯନ୍ତ୍ର ନ ଥିଲା । ଏଏସଆଇ ଗୋପାଳ ଦାସ ବ୍ୟକ୍ତିଗତ ଆକ୍ରୋଶରୁ ତାଙ୍କୁ ହତ୍ୟା କରିଥିଲା । ନବ ଦାସଙ୍କ ପଟୁ ସେ କିଛି ଗୋଟିଏ ଭୟ ଆଶଙ୍କା କରୁଥିଲା । ଲମ୍ବା ସମୟ ଧରି ଏହି ଭୟ ତାକୁ ଆଚ୍ଛନ୍ନ କରିଥିଲା । ଯାହା ତା’ ମନରେ ରାଗ ସୃଷ୍ଟି କରିଥିଲା । ନବ ଦାସଙ୍କୁ ହତ୍ୟା କରିବାକୁ ଯୋଜନା କରି ମାନସିକ ଭାବେ ପ୍ରସ୍ତୁତ ରହିଥିଲା । ଯେଉଁଥିରେ ସେ ସଫଳ ହେଲା ।
ନବ ଦାସ ହତ୍ୟା ମାମଲାର ତଦନ୍ତ କରୁଥିବା କ୍ରାଇମବ୍ରାଞ୍ଚ ଆଜି ଝାରସୁଗୁଡ଼ା ଜେଏମଏଫସି କୋର୍ଟରେ ଦାଖଲ କରିଥିବା ଚାର୍ଜସିଟ୍ ରେ ଏହା ଉଲ୍ଲେଖ କରିଛି । ତଦନ୍ତକାରୀ ଅଧିକାରୀଙ୍କ ସହ ୮୯ ଜଣ ସାକ୍ଷୀଙ୍କଠାରୁ ବୟାନ ରେକର୍ଡ ପରେ ହତ୍ୟାକାଣ୍ଡର ୧୧୮ ଦିନରେ କ୍ରାଇମବ୍ରାଞ୍ଚ ଆଜି ଚାର୍ଜସିଟ୍ ଦାଖଲ କରିଛି ।
ଚାର୍ଜସିଟ୍ ରେ ଏକମାତ୍ର ଅଭିଯୁକ୍ତ ରହିଛନ୍ତି ଗୋପାଳ ଦାସ । ତାଙ୍କ ବିରୋଧରେ ୩୦୨(ହତ୍ୟା), ୩୦୭(ହତ୍ୟା ଉଦ୍ୟମ) ଏବଂ ୨୭(୧) ଆର୍ମସ୍ ଆକ୍ଟରେ ମାମଲା ରୁଜୁ ହୋଇଛି । ତଦନ୍ତ ବେଳେ ରାଜନୈତିକ କିମ୍ବା ଅନ୍ୟ କୌଣସି ଷଡ଼ଯନ୍ତ୍ର ଦିଗର ତଥ୍ୟ ପ୍ରମାଣ କ୍ରାଇମବ୍ରାଞ୍ଚକୁ ମିଳିନାହିଁ ।
ସମ୍ପୂର୍ଣ୍ଣ ଚାର୍ଜସିଟ୍ ଗଣମାଧ୍ୟମର ହସ୍ତଗତ ହୋଇ ନ ଥିଲେ ମଧ୍ୟ କ୍ରାଇମବ୍ରାଞ୍ଚ ପକ୍ଷରୁ ଜାରି ହୋଇଥିବା ପ୍ରେସ୍ ରିଲିଜ୍ ରେ ମୁଖ୍ୟ କଥା ଉଲ୍ଲେଖ କରାଯାଇଛି । ଗୋପାଳ ବ୍ୟକ୍ତିଗତ ଆକ୍ରୋଶ ରଖି ନବ ଦାସଙ୍କୁ ହତ୍ୟା କରିଥିଲା । ନବଙ୍କ ପ୍ରତି ଗୋପାଳ ମନରେ ଆକ୍ରୋଶରୁ ରାଗ ସୃଷ୍ଟି ହୋଇଥିଲା । ନବ ଓ ତାଙ୍କ ସମର୍ଥକଙ୍କ ପଟୁ ତା’ ଜୀବନ ପ୍ରତି ବିପଦ ଥିବା ଗୋପାଳ ଭାବୁଥିଲା । ନବଙ୍କୁ ହତ୍ୟା କରିବା ପାଇଁ ଗୋପାଳ ଯୋଜନା କରି ତାହାକୁ କାମରେ ଲଗାଇଥିଲା । ତେବେ କେଉଁ କାରଣରୁ ନବଙ୍କ ପଟୁ ବିପଦ ଆଶଙ୍କା କରୁଥିଲା ତାହା ତଦନ୍ତ ଅଧିକାରୀଙ୍କୁ ଗୋପାଳ କହିନାହିଁ ।
ଗୋପାଳ ପାଗଳ ନୁହେଁ ବୋଲି ମଧ୍ୟ କ୍ରାଇମବ୍ରାଞ୍ଚ ଚାର୍ଜସିଟ୍ ରେ ସ୍ପଷ୍ଟ କରାଯାଇଛି । ସମ୍ପୂର୍ଣ୍ଣ ସୁସ୍ଥ ମସ୍ତିଷ୍କ ଓ ଯୋଜନାବଦ୍ଧ ଭାବେ ସେ ହତ୍ୟାକାଣ୍ଡ ଘଟାଇଛି । ଗୋପାଳକୁ ତାଙ୍କ ପରିବାର ଲୋକ ପାଗଳ ଦର୍ଶାଇବାକୁ ଉଦ୍ୟମ କରିଥିଲେ । ବାଇପୋଲାର୍ ଡିଜଅର୍ଡର ରୋଗ ପାଇଁ ସେ ଔଷଧ ଖାଉଥିବା କହିଥିଲେ । ମାତ୍ର ତଦନ୍ତ ବେଳେ ଏହା ଭୁଲ୍ ପ୍ରମାଣିତ ହୋଇଛି । ଡିଏମଇଟି ଦ୍ୱାରା ଏକ ଡାକ୍ତରୀ ଟିମ୍ ତାକୁ ପରୀକ୍ଷା କରିଥିଲେ । ଏହି ପରୀକ୍ଷାରୁ ତା’ର କୌଣସି ମାନସିକ ବିକୃତି ଜଣାପଡ଼ି ନ ଥିଲା । ଗୋପାଳର ସହଯୋଗୀ ଏବଂ ତାକୁ ଜାଣିଥିବା ଲୋକମାନେ ସେ ସୁସ୍ଥ ମଣିଷ ବୋଲି କହିଥିଲେ । ତଦନ୍ତ ବେଳେ ସେ ସହଯୋଗ କରୁଥିଲା ଏବଂ ଭଲରେ ଭଲରେ ସବୁ ପ୍ରଶ୍ନର ଉତ୍ତର ଦେଉଥିଲା । ସୁତରାଂ ସେ ପାଗଳ ନ ଥିଲା । ତା’ର ମାନସିକ ସ୍ଥିତି ଠିକ୍ ଥିଲା । ଯୋଜନାବଦ୍ଧ ହୋଇ ସମ୍ପୂର୍ଣ୍ଣ ସୁସ୍ଥ ମନରେ ନବ ଦାସଙ୍କୁ ଗୁଳି କରିଥିଲା ବୋଲି କ୍ରାଇମବ୍ରାଞ୍ଚ ପକ୍ଷରୁ କୁହାଯାଇଛି ।
ସୂଚନାଯୋଗ୍ୟ, ରାଜନୈତିକ କାରଣରୁ ନବ ଦାସଙ୍କୁ ହତ୍ୟା କରାଯାଇଥିବା ଅଭିଯୋଗ ଆଣି ବିରୋଧୀ ଦଳ ପୂର୍ବରୁ ତମ୍ବି ତୋଫାନ କରିଥିଲେ । କ୍ରାଇମବ୍ରାଞ୍ଚ ତଦନ୍ତର ନିରପେକ୍ଷତାକୁ ପ୍ରଶ୍ନ ଉଠାଇଥିଲେ । ଅନ୍ୟପକ୍ଷରେ ହାଇକୋର୍ଟର ଅବସରପ୍ରାପ୍ତ ବିଚାରପତିଙ୍କ ଅନୁଧ୍ୟାନରେ ତଦନ୍ତ ଚାଲୁଥିବାରୁ କ୍ରାଇମବ୍ରାଞ୍ଚଉପରେ ବିଶ୍ୱାସ ରଖିବାକୁ ସରକାର ଭରସା ଦେଇଥିଲେ ।
କ୍ରାଇମବ୍ରାଞ୍ଚ ଆଜି କୋର୍ଟରେ ଚାର୍ଜସିଟ୍ ଦାଖଲ ପରେ ବିଜେପି ଓ କଂଗ୍ରେସ ପ୍ରତିକ୍ରିୟା ପ୍ରକାଶ କରିଛନ୍ତି । ହତ୍ୟା ପଛରେ ରହିଥିବା ଷଡ଼ଯନ୍ତ୍ର ଦିଗକୁ ଚାପି ଦିଆଯାଇଛି ବୋଲି ସେମାନେ ଅଭିଯୋଗ କରିଛନ୍ତି । ତେବେ ବିନା ତଥ୍ୟ ପ୍ରମାଣରେ ବିରୋଧୀଙ୍କ ରାଜନୈତିକ ବୟାନବାଜିକୁ ବିଜେଡି ନେତା ସମାଲୋଚନା କରିଛନ୍ତି ।
