ଭୁବନେଶ୍ୱର: ଓଡ଼ିଶାରେ ଆଜି ନିର୍ବାଚନ ପ୍ରଚାର କରିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୂର୍ବଥର ଭଳି ଏଥର ମଧ୍ୟ ବିଜେଡି ଉପରେ ଭୀଷଣ ବର୍ଷିଛନ୍ତି । ଓଡ଼ିଶା ବରବାଦୀର କାରଣ ବିଜେଡି ବୋଲି ପ୍ରଧାନମନ୍ତ୍ରୀ ଆରୋପ ଲଗାଇବା ସହ ଏଠି ପ୍ରଥମ ଥର ପାଇଁ ବିଜେପି ସରକାର ଗଠନ ହେବ ବୋଲି ପୁଣି ଦମ୍ଭ ଦେଖାଇଛନ୍ତି ।
ଗତକାଲି ସଂଧ୍ୟାରେ ଓଡ଼ିଶା ଆସିଥିବା ପ୍ରଧାନମନ୍ତ୍ରୀ ମୋଦୀ ଆଜି ସକାଳେ ପୁରୀରେ ମହାପ୍ରଭୁ ଜଗନ୍ନାଥଙ୍କ ଦର୍ଶନ କରିଥିଲେ । ଏହାପରେ ସେ ସିଂହଦ୍ୱାର ସମ୍ମୁଖରୁ ମେଡିକାଲ୍ ଛକ ଯାଏଁ ବଡ଼ଦାଣ୍ଡରେ ରୋଡ୍ ସୋ’ କରିଥିଲେ । ରୋଡ୍ ସୋ’ ସାରି ସିଧା ଯାଇଥିଲେ ଅନୁଗୁଳ ।
ଅନୁଗୁଳ ବିଜୁ ପଟ୍ଟନାୟକ ଷ୍ଟାଡିୟମରେ ଆୟୋଜିତ ପ୍ରଚାର ସଭାରେ ଯୋଗଦେଇ ପ୍ରଧାନମନ୍ତ୍ରୀ କହିଥିଲେ, ସାରା ଦେଶବାସୀ ମୋଦୀ ସରକାରଙ୍କୁ ତୃତୀୟ ଥର ଆଣିବାକୁ ଚାହୁଁଛନ୍ତି । ଓଡ଼ିଶାର ପୁରପଲ୍ଲୀରେ ଗୋଟିଏ ନାରା ସବୁଠି ଗୁଞ୍ଜରିତ ହେଉଛି । ଓଡ଼ିଶାରେ ପ୍ରଥମ ଥର ହେବ ଡବଲ୍ ଇଞ୍ଜିନ ସରକାର । ବିଜେଡି ଉପରେ ଓଡ଼ିଶାବାସୀ ୨୫ ବର୍ଷ ଭରସା କରିସାରିଲେଣି । ପ୍ରାକୃତିକ ସମ୍ପଦରେ ଭରପୂର ଓଡ଼ିଶା କିନ୍ତୁ ଗରିବୀରୁ ମୁକ୍ତି ପାଇନି । ଓଡ଼ିଶା ବରବାଦୀର କାରଣ ହୋଇଛି ବିଜେଡି ସରକାର । ବିଜେଡି ସରକାର ପୂରା ଭ୍ରଷ୍ଟାଚାରୀଙ୍କ ଦ୍ୱାରା ଘେରି ରହିଛି । ଓଡ଼ିଶାର ବିକାଶ ଓଡ଼ିଶା ମାଟିର ପୁଅ ହିଁ କରିପାରିବ ବୋଲି ପ୍ରଧାନମନ୍ତ୍ରୀ କହିଥିଲେ ।
ଏହାପରେ କଟକ ସଭାରେ ପ୍ରଧାନମନ୍ତ୍ରୀ ଶ୍ରୀ ମୋଦୀ ଆହୁରି ଶାଣିତ ଭାଷଣ ଦେଇଥିଲେ । କହିଥିଲେ, ବିଜେଡିର ଭ୍ରଷ୍ଟାଚାରୀ ରାକେଟ୍ କୁ ନେଇ ଲୋକେ ଅତିଷ୍ଠ ହୋଇଗଲେଣି । ଚିଟ୍ ଫଣ୍ଡ ଦୁର୍ନୀତିରେ ବିଜେଡି ଓଡ଼ିଶା ଲୋକଙ୍କୁ ଧୋକା ଦେଇଛି । ବିଜେଡି ଓଡ଼ିଶାକୁ ଜମି, ବାଲି ଏବଂ କୋଇଲା ମାଫିଆ ଦେଇଛି । ମାଫିଆଗିରିରେ ପୂରା ୨୪ ଘଣ୍ଟା ଲାଗିଛନ୍ତି ବିଜେଡି ନେତା । ମାଫିଆ ପ୍ରତି କ୍ଷେତ୍ରକୁ କବଜା କରି ବସିଛନ୍ତି । ଜୁନ୍ ୧୦ରେ ବିଜେପି ସରକାର ଆସିଲେ ଏହି ମାଫିଆଙ୍କ ଅଣ୍ଟା ଭଙ୍ଗାଯିବ ବୋଲି ପ୍ରଧାନମନ୍ତ୍ରୀ କହିଥିଲେ ।
