ଭୁବନେଶ୍ୱର: ପଞ୍ଚାୟତ ନିର୍ବାଚନର ତାରିଖ ଘୋଷଣା ପୂର୍ବରୁ ରାଜନୈତିକ ମାହୋଲରେ ଏହାର ଉଷ୍ମତା ଦେଖିବାକୁ ମିଳିଲାଣି । ଦିଲ୍ଲୀ କି ଭୁବନେଶ୍ୱରରେ ଖାଲି ଭାଷଣବାଜି ନୁହେଁ, ଏଥର ଗ୍ରାଉଣ୍ଡକୁ ଯାଇ ଲୋକଙ୍କ ମନ ଜିଣିବାକୁ ପଡ଼ିବ । ସମ୍ଭବତଃ ଏହାକୁ ହୃଦୟଙ୍ଗମ କରି ଉଭୟ ବିଜେପି ଓ ବିଜେଡ଼ି ଶୀର୍ଷ ନେତୃବୃନ୍ଦ ଚଳିତ ସପ୍ତାହରୁ ଗ୍ରାଉଣ୍ଡ ଜିରୋ ଅଭିଯାନ ଆରମ୍ଭ କରୁଛନ୍ତି । ଏଥିରେ କଂଗ୍ରେସ ବି ପଛରେ ପଡ଼ିବାକୁ ଚାହିଁନି । ଦଳ ପକ୍ଷରୁ ବ୍ୟାପକ ଯୋଜନା ପ୍ରସ୍ତୁତି ଚାଲିଛି ।
ଆସନ୍ତା ୧୯ରୁ ୨୨ ତାରିଖ ପର୍ଯ୍ୟନ୍ତ ବିଜେପି ପକ୍ଷରୁ ଓଡ଼ିଶାରେ ‘ଜନ ଆଶୀର୍ବାଦ’ ଯାତ୍ରାର ଆୟୋଜନ କରାଯାଇଛି । ଏହାକୁ ପ୍ରଭାବୀ ଓ ଶକ୍ତିଶାଳୀ କରିବାର ବିଶେଷ ଯୋଜନା କରାଯାଇଛି । ଏହି ଯାତ୍ରାର ନେତୃତ୍ୱ ନେବେ ଦୁଇ ହେଭିୱେଟ୍ ଅଶ୍ୱିନୀ ବୈଷ୍ଣବ ଏବଂ ଧର୍ମେନ୍ଦ୍ର ପ୍ରଧାନ । ଏହି ଦୁଇ କେନ୍ଦ୍ରମନ୍ତ୍ରୀ ସମୁଦାୟ ୪୧୯ କିମି ଗସ୍ତ କରିବେ । ଗସ୍ତକାଳରେ ବିଭିନ୍ନ ଜିଲ୍ଲା ଯାଇ ୧୧୫ ଟି ସ୍ଥାନରେ କାର୍ଯ୍ୟକ୍ରମରେ ଯୋଗଦେବେ । କେନ୍ଦ୍ରରେ ମୋଦି ସରକାରଙ୍କ ବିଭିନ୍ନ ବିକାଶମୂଳକ ଯୋଜନା ଲୋକଙ୍କ ପାଖରେ ପହଞ୍ଚାଇବା ସହ ସେମାନଙ୍କଠାରୁ ଆଶୀର୍ବାଦ ଭିକ୍ଷା କରିବେ ।
ଅପରପକ୍ଷରେ ଲୋକଙ୍କ ଆକର୍ଷଣ ଅନ୍ୟ ଆଡକୁ ନ ଯିବା ପାଇଁ ବିଜେଡ଼ି ତା’ର ରଣନୀତି ପ୍ରସ୍ତୁତ କରିଛି । ବିଜେଡ଼ି ସଭାପତି ନବୀନ ପଟ୍ଟନାୟକ ନିଜେ ଲୋକଙ୍କ ପାଖରେ ରାଜ୍ୟ ସରକାରଙ୍କ ବିକାଶ ପ୍ୟାକେଜ୍ ପହଞ୍ଚାଇବାକୁ ଯୋଜନା ହୋଇଛି । ବିଜୁ ସ୍ୱାସ୍ଥ୍ୟ କଲ୍ୟାଣକୁ ନୂଆ ରୂପରେ ଲାଗୁ କରି ସ୍ମାର୍ଟ ହେଲଥ୍ କାର୍ଡ ପ୍ରଚଳନ କରିଥିବା ମୁଖ୍ୟମନ୍ତ୍ରୀ ଜିଲ୍ଲାୱାରୀ ଗସ୍ତ କରି ନିଜେ ଏହି କାର୍ଡ ବଣ୍ଟନର ଶୁଭାରମ୍ଭ କରିବେ । ଏଥିସହ ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଶିଳାନ୍ୟାସ ଓ ଉଦଘାଟନ କରିବାର କାର୍ଯ୍ୟକ୍ରମ ସ୍ଥିର ହୋଇଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି ।
ଏହିକ୍ରମରେ ୨୦ ତାରିଖରେ ପ୍ରଥମେ ମାଲକାନଗିିରି ଗସ୍ତ କରିବେ ମୁଖ୍ୟମନ୍ତ୍ରୀ । ନଭେମ୍ବର ସୁଦ୍ଧା ସମସ୍ତ ହିତାଧିକାରୀଙ୍କୁ ସ୍ମାର୍ଟ କାର୍ଡ ମିଳିବ ବୋଲି ଘୋଷଣା ହୋଇଥିବାରୁ ମୁଖ୍ୟମନ୍ତ୍ରୀ ପର୍ଯ୍ୟାୟକ୍ରମେ ଅନ୍ୟ ଜିଲ୍ଲାଗୁଡ଼ିକୁ ଗସ୍ତ କରିବେ ବୋଲି ଏହି ସୂତ୍ରରୁ ଜଣାପଡ଼ିଛି । ତେବେ ମୁଖ୍ୟମନ୍ତ୍ରୀଙ୍କ ଗସ୍ତସୂଚୀ ଏ ପର୍ଯ୍ୟନ୍ତ ସାର୍ବଜନୀନ ହୋଇନାହିଁ ।
ସୂଚନାଥାଉକି, ପୂର୍ବରୁ ପ୍ରଥମ ଲହର କୋଭିଡ୍ ପରେ ଚଳିତ ଜାନୁଆରୀ ମାସରେ ମୁଖ୍ୟମନ୍ତ୍ରୀ ଜିଲ୍ଲାଗସ୍ତରେ ବାହାରିଥିଲେ । ପ୍ରଥମ କଳାହାଣ୍ଡି ଏବଂ ପରେ ସୁନ୍ଦରଗଡ଼ ଗସ୍ତରେ ଯାଇ ଇନ୍ଦ୍ରାବତୀ ମେଗା ପ୍ରକଳ୍ପ ଉଦଘାଟନ ଏବଂ ରାଉରକେଲା ହକି ଷ୍ଟାଡିୟମ୍ ର ଶିଳାନ୍ୟାସ କରିଥିଲେ ।