ବିଜେଡ଼ିରେ ମିଶିଲେ ପ୍ରଦୀପ ମାଝୀ

ଭୁବନେଶ୍ୱର: ପ୍ରଦୀପ ମାଝୀ ଆଜି ବିଜେଡ଼ିରେ ବିଧିବଦ୍ଧ ସାମିଲ ହୋଇଛନ୍ତି । ନବରଙ୍ଗପୁରରେ ଆୟୋଜିତ ମିଶ୍ରଣ ପର୍ବରେ ବିଜେଡ଼ି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ(ବବି) ଦାସ ଏବଂ ଅନ୍ୟାନ୍ୟ ବରିଷ୍ଠ ନେତୃବୃନ୍ଦଙ୍କ ଉପସ୍ଥିତିରେ ଶ୍ରୀ ମାଝୀ ଏବଂ ତାଙ୍କର ହଜାର ହଜାର ସମର୍ଥକ ବିଜେଡ଼ିରେ ମିଶିଥିଲେ । ନବରଙ୍ଗପୁର ସହର ଉପକଣ୍ଠ ଚାଉଳିଆଗୁଡ଼ା ଖେଳପଡ଼ିଆରେ ଏହି ମିଶ୍ରଣ ପର୍ବ ଅନୁଷ୍ଠିତ ହୋଇଥିଲା ।

ବିଜେଡ଼ିରେ ମିିଶିବା ଅବସରରେ ନିଜର ଶକ୍ତି ପ୍ରଦର୍ଶନ କରିଥିଲେ ପ୍ରଦୀପ ମାଝୀ । ସମର୍ଥକମାନେ ଏକ ବିରାଟ ପଟୁଆରରେ ତାଙ୍କୁ ସଭାସ୍ଥଳକୁ ପାଛୋଟି ଆଣିଥିଲେ । ସେଠାରେ ହଜାର ହଜାର ସମର୍ଥକ ଉପସ୍ଥିତ ଥିଲେ । ବିଜେଡ଼ି ସାଂଗଠନିକ ସମ୍ପାଦକ ପ୍ରଣବ ପ୍ରକାଶଙ୍କ ସମେତ ମନ୍ତ୍ରୀ ଶ୍ରୀମତୀ ପଦ୍ମିନୀ ଦିଆନ, ତୁଷାରକାନ୍ତି ବେହେରା, ସାଂସଦ ରମେଶ ମାଝୀ, ଚନ୍ଦ୍ରଶେଖର ମାଝୀ ପ୍ରମୁଖ ସଭାମଞ୍ଚରେ ଉପସ୍ଥିତ ଥିଲେ । ଶ୍ରୀ ମାଝୀଙ୍କ ବେକରେ ଉତ୍ତରୀୟ ଏବଂ ହାତରେ ଫୁଲତୋଡ଼ା ଦେଇ ଶ୍ରୀ ଦାସ ତାଙ୍କୁ ବିଜେଡ଼ିକୁ ସ୍ୱାଗତ କରିଥିଲେ ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆଦର୍ଶରେ ବିଜେଡ଼ିରେ ସେ ସାମିଲ ହୋଇଥିବା ଶ୍ରୀ ମାଝୀ ତାଙ୍କ ଭାଷଣରେ କହିଥିଲେ । ଅବିଭକ୍ତ କୋରାପୁଟ ସମେତ ସାରା ରାଜ୍ୟରେ ବିଜେଡ଼ିକୁ ଅଧିକ ଶକ୍ତିଶାଳୀ କରିବାରେ ସହଯୋଗ କରିବେ ଏବଂ ନବୀନ ପଟ୍ଟନାୟକଙ୍କ ନେତୃତ୍ୱରେ ଓଡ଼ିଶାର ବିକାଶ କାର୍ଯ୍ୟ ଆଗକୁ ନେବେ ବୋଲି ସଂକଳ୍ପ କରିଥିଲେ ।

ବିଜେଡ଼ି ସାଂଗଠନିକ ସମ୍ପାଦକ ଶ୍ରୀ ଦାସ ତାଙ୍କ ଭାଷଣରେ ବିଜେପି ଉପରେ ଧୂମ୍ ବର୍ଷିଥିଲେ । ସେ କହିଥିଲେ, ଶୁଖିଲା ଭାଷଣର ଦଳ ହେଉଛି ବିଜେପି । ଟୁଇଟ୍ କରି ବାହାବା ନେବା ସେମାନଙ୍କର ଏକମାତ୍ର କାମ । ମାତ୍ର ବିଜେପି ପରି ନବୀନ ପଟ୍ଟନାୟକ ଭାଷଣରେ ନୁହେଁ, କାମରେ ବିଶ୍ୱାସ କରନ୍ତି । ଭବିଷ୍ୟତ ପୀଡ଼ି ପାଇଁ ଓଡ଼ିଶାକୁ ତିଆରି କରୁଛନ୍ତି ନବୀନ । ସେଥିପାଇଁ ୨୪ ଘଣ୍ଟା କାମ କରୁଛନ୍ତି । ବିଜେଡ଼ି ଏକମାତ୍ର ଦଳ ଯିଏ ସମସ୍ତଙ୍କୁ ଆଦର ଓ ସମ୍ମାନ କରେ । ଓଡ଼ିଶାବାସୀଙ୍କ ହୃଦୟରେ ରାଜ୍ କରୁଥିବା ନବୀନଙ୍କୁ ବିଜେପି ବାସନ୍ଦ କରିବାକୁ ଆହ୍ୱାନ ଦେବା ନିହାତି ହାସ୍ୟାସ୍ପଦ ବୋଲି ସେ କହିଥିଲେ । ଏହି ଅବସରରେ କେନ୍ଦ୍ରରେ ବିଜେପି ସରକାରଙ୍କ ଜନମାରଣ ନୀତିକୁ ଶ୍ରୀ ଦାସ କଡ଼ା ସମାଲୋଚନା କରିଥିଲେ ।

ସୂଚନାଯୋଗ୍ୟ ଯେ ନବରଙ୍ଗପୁରର ପୂର୍ବତନ ସାଂସଦ, ପିସିସି କାର୍ଯ୍ୟକାରୀ ସଭାପତି ପ୍ରଦୀପ ମାଝୀ ଗତମାସ ୨୨ ତାରିଖରେ କଂଗ୍ରେସରୁ ଇସ୍ତଫା ଦେଇଥିଲେ । ସେ ବିଜେଡ଼ିରେ ଯୋଗଦେବା ନେଇ ୨୪ ତାରିଖରେ ଘୋଷଣା କରିଥିଲେ ।