ଭୁବନେଶ୍ୱର: ମମିତା ମେହେର ହତ୍ୟା ଘଟଣାରେ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ଉପରକୁ ଅଙ୍ଗୁଳି ଉଠାଇ ଆନ୍ଦୋଳନ ଚଳାଇଥିବା ବିରୋଧୀ ଦଳ ବିଶେଷ କରି ବିଜେପିକୁ ଆଜି ଜୋରଦାର ଢ଼ଙ୍ଗରେ ଜବାବ ଦେଇଛି ବିଜେଡ଼ି । ମହିଳାମାନଙ୍କ ପ୍ରତି ଜଘନ୍ୟ ଅପରାଧ ମାମଲାକୁ ସଙ୍କୀର୍ଣ୍ଣ ରାଜନୈତିକ ସ୍ୱାର୍ଥ ପାଇଁ ବିଜେପି ବ୍ୟବହାର କରି ଆସୁଥିବା କହିଛନ୍ତି ବିଜେଡ଼ି ରାଷ୍ଟ୍ରୀୟ ମୁଖପାତ୍ର ତଥା ରାଜ୍ୟସଭା ସାଂସଦ ଡ. ସସ୍ମିତ୍ ପାତ୍ର । ଆଜି ଏକ ସାମ୍ବାଦିକ ସମ୍ମିଳନୀରେ ସେ ଟିକିରି ଶିକ୍ଷୟିତ୍ରୀ ଇତିଶ୍ରୀ ପ୍ରଧାନ ଏବଂ କୁନ୍ଦୁଲି ଗଣଦୁଷ୍କର୍ମ ମାମଲା ସମ୍ପର୍କିତ ଦୁଇଟି ଭିଡ଼ିଓ ଜାରି କରି ବିଜେପିକୁ ଭୀଷଣ ଭାବେ କଟାକ୍ଷ କରିଛନ୍ତି । ପୀଡ଼ିତା କିମ୍ବା ସେମାନଙ୍କ ପରିବାର ପ୍ରତି ବିଜେପିର ସହାନୁଭୂତି କି ସମ୍ମାନ ନାହିଁ, ବରଂ ଟିଭି ଓ ଖବରକାଗଜରେ ମୁହଁ ଦେଖାଇବା ପାଇଁ ବିଜେପି ନେତାମାନେ ପ୍ରତିଯୋଗିତାରେ ମାତି ରହୁଥିବା କହିଛନ୍ତି ।
ଡକ୍ଟର ପାତ୍ର କହିଛନ୍ତି ଯେ ନିଜର ସଙ୍କୀର୍ଣ୍ଣ ରାଜନୈତିକ ସ୍ୱାର୍ଥ ପାଇଁ ଜଣେ ମହିଳାଙ୍କ ବିରୋଧରେ ଏକ ଯନ୍ତ୍ରଣାଦାୟକ ଜଘନ୍ୟ ଅପରାଧକୁ ବ୍ୟବହାର କରିବା ହେଉଛି ବିଜେପିର ଏକମାତ୍ର ଉଦ୍ଦେଶ୍ୟ । ସେମାନେ ନିଜର ରାଜନୈତିକ ସ୍ୱାର୍ଥକୁ ବଞ୍ଚାଇ ରଖିବା ପାଇଁ ଗୋଟିଏ ମାମଲାରୁ ଅନ୍ୟ ଗୋଟିଏ ମାମଲାକୁ ଡେଇଁପଡନ୍ତି ।
ଇତିଶ୍ରୀ ପ୍ରଧାନ ମାମଲା ୨୦୧୩ରେ ଆସିଥିଲା ଏବଂ ୨୦୧୪ ନିର୍ବାଚନରେ ଏହାକୁ ଏକ ପ୍ରସଙ୍ଗ କରିବା ପାଇଁ ବିଜେପି ଶସ୍ତା ରାଜନୀତି ଆରମ୍ଭ କରିଥିଲା । ଏହି ପ୍ରସଙ୍ଗକୁ ବ୍ୟବହାର କରି ସେମାନେ ଓଡିଶାକୁ ବଦନାମ କରିଥିଲେ ଏବଂ ଏହି ଘଟଣାର ଲଜ୍ଜାଜନକ ରାଜନୀତିକରଣ ଓଡିଶାବାସୀଙ୍କୁ ପସନ୍ଦ ନଥିଲା, ଯେଉଁମାନେ ୨୦୧୪ ନିର୍ବାଚନରେ ସେମାନଙ୍କୁ ଏହାର ଠିକଣା ଜବାବ ଦେଇଥିଲେ । ନିର୍ବାଚନ ସରିବା ପରେ ବିଜେପି ପୁଣିଥରେ ଏହି ପ୍ରସଙ୍ଗକୁ ଭୁଲି ଯାଇଥିଲା ।
ଏହି ମାମଲାରେ ବିଜେପି ତଥ୍ୟ ଅନୁସନ୍ଧାନକାରୀ ଦଳ ଆଜିଭଳି ସେତେବେଳେ ବି ଇତିଶ୍ରୀର ଗାଁକୁ ଯାଇ ରାଲି କରିଥିଲେ । ସେତେବେଳର ବିଜେଡି ନେତା ଜୟରାମ ପାଙ୍ଗି ଏହି ଘଟଣାର ମୁଖ୍ୟ ଷଡଯନ୍ତ୍ରକାରୀ ବୋଲି ଚିତ୍କାର କରିବା ସହିତ ତାଙ୍କର ଗିରଫ ଦାବି କରିଥିଲେ । ଅପରାଧୀଙ୍କୁ ଗିରଫ କରାଯାଇଥିଲା, ଚାର୍ଜସିଟ୍ ଦାଖଲ କରାଯାଇଥିଲା ଏବଂ ଦୋଷୀକୁ ଆଜୀବନ କାରାଦଣ୍ଡରେ ଦଣ୍ଡିତ କରାଯାଇଥିଲା । ତା’ପରେ ସୁପ୍ରିମକୋର୍ଟ ସିବିଆଇ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ । ସିବିଆଇ ତଦନ୍ତ ଚାଲିଥିବାବେଳେ ବିଜେପି ଖୋଲା ହୃଦୟରେ ଜୟରାମ ପାଙ୍ଗିଙ୍କୁ ତାଙ୍କୁ ବିଜେପିକୁ ସ୍ୱାଗତ କରିବା ସହିତ ତାଙ୍କୁ ଦଳର ଆସେଟ୍ ବୋଲି କହିଥିଲା ଏବଂ ପରେ ତାଙ୍କୁ ୨୦୧୯ ନିର୍ବାଚନରେ କୋରାପୁଟରୁ ସାଂସଦ ପ୍ରାର୍ଥୀ ଭାବେ ଟିକେଟ ଦେଇଥିଲା । ସିବିଆଇ ଅନୁସନ୍ଧାନରେ କିଛି ନୂଆ ତଥ୍ୟ ମିଳିଲା ନାହିଁ ଏବଂ କ୍ରାଇମବ୍ରାଞ୍ଚର ଅନୁସନ୍ଧାନ ବିବରଣୀକୁ ପ୍ରମାଣିତ କରାଯାଇଥିଲା । ଓଡିଶା ସରକାରଙ୍କ ତଦନ୍ତ ପ୍ରକୃତରେ ସଠିକ୍ ଥିଲା । ଏହା ଦର୍ଶାଉଛି ଯେ ରାଜନୈତିକ ଦଳ ବିଶେଷକରି ବିଜେପି କିପରି ସ୍ୱାର୍ଥପର ରାଜନୈତିକ ଏଜେଣ୍ଡା ପାଇଁ ମହିଳାଙ୍କ ପ୍ରତି ଏପରି ଜଘନ୍ୟ ଅପରାଧକୁ ବ୍ୟବହାର କରେ ।
ସେହିଭଳି ଦୁର୍ଭାଗ୍ୟଜନକ କୁନ୍ଦୁଲି ଘଟଣା ଖବର ପାଇବା ପରେ ଓଡିଶା ସରକାର ତୁରନ୍ତ ପୋଲିସ ତଦନ୍ତ ଆରମ୍ଭ କରିଥିଲେ, କିନ୍ତୁ ବିଜେପୁର ଉପନିର୍ବାଚନ ଥିବାରୁ ବିଜେପି ଶସ୍ତା ରାଜନୀତି ଆରମ୍ଭ କରିଥିଲା । ଆଶ୍ଚର୍ଯ୍ୟର କଥା ଯେ ଯେତେବେଳେ ତଦନ୍ତ କମିଶନ ସତ୍ୟପାଠ, ସାକ୍ଷୀ ପାଇଁ ଅନୁରୋଧ କଲେ ସେତେବେଳେ ବିଜେପି କିମ୍ବା କଂଗ୍ରେସ ପକ୍ଷରୁ ଗୋଟିଏ ହେଲେ ସତ୍ୟପାଠ ଦାଖଲ ହୋଇନଥିଲା । କାହିଁକି ବିରୋଧୀ ଦଳଗୁଡ଼ିକ ଗୋଟିଏ ବି ସତ୍ୟପାଠ ଦାଖଲ କରିନଥିଲେ? କାରଣ ବିଜେପୁର ଉପ-ନିର୍ବାଚନ ଶେଷ ହୋଇଯାଇଥିଲା । ବିରୋଧୀ ଦଳ ବିଶେଷ କରି ବିଜେପିର ଏକାଧିକ ତଥ୍ୟ ଅନୁସନ୍ଧାନକାରୀ ଦଳ ପୀଡିତାଙ୍କ ପରିବାରକୁ ଭେଟିଥିବା ବେଳେ କାହିଁକି ଏହି ପ୍ରସଙ୍ଗରେ କୌଣସି ସତ୍ୟପାଠ ଦାଖଲ କରିନଥିଲେ? ଯଦି ଗୋଟିଏ ହେଲେ ସତ୍ୟପାଠ ଦାଖଲ କରିପାରିଲେ ନାହିଁ, ତେବେ ତଥ୍ୟ ଅନୁସନ୍ଧାନକାରୀ ଦଳ ଖୋଜୁଥିଲେ କ’ଣ ବୋଲି ଡ. ପାତ୍ର ପ୍ରଶ୍ନ କରିଛନ୍ତି ।
ଏହା କେବଳ ଆରମ୍ଭ ମାତ୍ର । ଆଗାମୀ ଦିନରେ ସମ୍ବେଦନଶୀଳ ଘଟଣାକୁ ନେଇ ବିଜେପି କିଭଳି ଲଜ୍ଜାଜନକ ଭାବେ ରାଜନୀତିକରଣ କରିଥାଏ ତାହାକୁ ବିଜେଡି ଓଡିଶାବାସୀଙ୍କ ସମ୍ମୁଖରେ ରଖିବ । ସତ୍ୟର ସର୍ବଦା ଜୟ ହୋଇଥାଏ, ସତ୍ୟମେବ ଜୟତେ ଏବଂ ବିଜେଡି ସତ୍ୟ ସହିତ ରହିଥିବାବେଳେ ବିଜେପି ମିଥ୍ୟା ଏବଂ ଶସ୍ତା ରାଜନୀତି ସହିତ ରହିଛି । ରାଜନୈତିକ ଲାଭ ପାଇଁ ପୀଡିତା ଏବଂ ସେମାନଙ୍କ ପରିବାରକୁ ବଦନାମ କରିବା ତଥା ଜାତୀୟ ସ୍ତରରେ ଓଡିଶା ଏବଂ ଏହାର ଲୋକଙ୍କୁ ବଦନାମ କରିବା ପାଇଁ ବଡ଼ ଷଡଯନ୍ତ୍ର କରିବା ଏକ ଅମାନବୀୟ କାର୍ଯ୍ୟ । ଆମେ ବିଜେପିକୁ ଆହ୍ୱାନ କରୁଛୁ ଯଦି ସାହସ ଅଛି ବିଜେପିର ତଥ୍ୟ ଅନୁସନ୍ଧାନ ଦଳକୁ କୁହ ପୋଲିସ୍ ଏବଂ ଅଦାଲତ ନିକଟରେ ପ୍ରମାଣ ଉପସ୍ଥାପନ କରିବେ । ବିଜେପିର ବିବୃତ୍ତି ମିଥ୍ୟା ଉପରେ ଆଧାରିତ ଏବଂ ଏଭଳି ନିମ୍ନ ମାନର ରାଜନୀତିକୁ ତ୍ୟାଗ କରିବା ଆବଶ୍ୟକ ବୋଲି ଡକ୍ଟର ପାତ୍ର କହିଛନ୍ତି ।
