ବିଧାୟକ ପ୍ରଶାନ୍ତ ଜଗଦ୍ଦେବ ବିଜେଡ଼ିରୁ ନିଲମ୍ବିତ

ଭୁୁବନେଶ୍ୱର: ବାହୁବଳୀ ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ଗୁଣ୍ଡାଗିରି ପୁଣି ଦେଖିବାକୁ ମିଳିଛି । ନିଜ ନିର୍ବାଚନମଣ୍ଡଳୀ ଚିଲିକା ଅନ୍ତର୍ଗତ ବାଲୁଗାଁଠାରେ ବିଜେପିର ମଣ୍ଡଳ ସଭାପତି ନିରଞ୍ଜନ ସେଠୀଙ୍କୁ ରାସ୍ତା ମଝିରେ ପିଟିଛନ୍ତି । ସୋସିଆଲ୍ ମିଡ଼ିଆରେ ବିଧାୟକଙ୍କ ଦାଦାଗିରି ଭାଇରାଲ୍ ହେବା ପରେ ହଇଚଇ ସୃଷ୍ଟି ହୋଇଛି । ବିଧାୟକଙ୍କ ଗିରଫ ଦାବିରେ ବାଲୁଗାଁ ବିଜେପି ପକ୍ଷରୁ ଥାନା ଘେରାଉ କରାଯାଇଛି । ସେଠାରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଛି ।

ସେପଟେ ବିଜେଡ଼ି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଧାୟକଙ୍କ ଏତାଦୃଶ ଆଚରଣ ପାଇଁ କଠୋର ହୋଇଛନ୍ତି । ତାଙ୍କୁ ବିଜେଡ଼ିରୁ ନିଲମ୍ବିତ କରିଛନ୍ତି । ବିଜେଡ଼ିରୁ ତାଙ୍କୁ ତୁରନ୍ତ ନିଲମ୍ବିତ କରାଗଲା ବୋଲି ସଭାପତିଙ୍କ ଦସ୍ତଖତରେ ଅଫିସ୍ ଅର୍ଡର ବାହାରିଛି । ଖୋର୍ଦ୍ଧା ଜିଲ୍ଲା ଯୋଜନା ବୋର୍ଡ଼ ଅଧ୍ୟକ୍ଷ ପଦରୁ ମଧ୍ୟ ତାଙ୍କୁ ବହିଷ୍କାର କରାଯାଇଛି।

ଅଭିଯୋଗ ଅନୁଯାୟୀ, ବାଲୁଗାଁ ବିଜେପି ମଣ୍ଡଳ ସଭାପତି ନିରଞ୍ଜନ ସେଠୀ ଆଜି ତାଙ୍କର ସହଯୋଗୀମାନଙ୍କ ସହ ଏନଏସି ନିର୍ବାହୀ ଅଧିକାରୀଙ୍କ ଅଫିସକୁ ଭତ୍ତା ବଣ୍ଟନରେ ବିଳମ୍ବର କାରଣ ପଚାରିବାକୁ ଯାଇଥିଲେ । ନିର୍ବାହୀ ଅଧିକାରୀଙ୍କୁ ଭେଟି ଫେରୁଥିବା ବେଳେ ବିଧାୟକ ସେଠାକୁ ଆସୁଥିବା ଦେଖିଲେ । କାର୍ ରେ ଥିବା ବିଧାୟକ ହଠାତ୍ ତାଙ୍କୁ ଦେଖି ଚିହିଁକି ଉଠିଥିଲେ ଏବଂ ଗାଡ଼ିରୁ ଓହ୍ଲାଇ ରାସ୍ତା ଉପରେ ତାଙ୍କୁ ଧକ୍କା ମାରିଥିଲେ । ବିଧାୟକଙ୍କ ଦବଙ୍ଗଗିରିର ଏହି ଭିଡ଼ିଓଟି ଏବେ ଭାଇରାଲ୍ ହୋଇଛି ।

ବିଧାୟକଙ୍କ ଦାଦାଗିରି ବିରୋଧରେ ଶ୍ରୀ ସେଠୀ ବାଲୁଗାଁ ଥାନାରେ ଏତଲା ଦେଇଛନ୍ତି । ଘଟଣା ପ୍ରଚାରିତ ହେବା ପରେ ଶତାଧିକ ବିଜେପି କର୍ମୀ ବିଧାୟକଙ୍କ ଗିରଫ ଦାବିରେ ବାଲୁଗାଁ ଥାନା ଘେରାଉ କରିଛନ୍ତି । ବିଜେପି ସାଧାରଣ ସମ୍ପାଦକ ତଥା ଚିଲିକା ନିର୍ବାଚନମଣ୍ଡଳୀ ବିଜେପି ପ୍ରାର୍ଥୀ ପୃଥ୍ୱୀରାଜ ହରିଚନ୍ଦନ ବାଲୁଗାଁରେ ପହଞ୍ଚି ଆନ୍ଦୋଳନର ନେତୃତ୍ୱ ନେଉଛନ୍ତି । ବିଧାୟକଙ୍କ ଏହି ଦାଦାଗିରି ବିରୋଧରେ ବିଜେପି ବ୍ୟାପକ ଆନ୍ଦୋଳନ କରିବ ବୋଲି ସେ ଚେତାବନୀ ଦେଇଛନ୍ତି ।

ସୂଚନାଯୋଗ୍ୟ, ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ନାଁରେ ଏକାଧିକ ଦାଦାଗିରି ମାମଲା ରହିଛି । ପ୍ରଥମ ଥର ବେଗୁନିଆରୁ ନିର୍ବାଚିତ ହୋଇଥିବା ଜଗଦ୍ଦେବଙ୍କ ଦବଙ୍ଗଗିରି ତାଙ୍କୁ ବିବାଦୀୟ କରିଥିଲା । ତେବେ ଦ୍ୱିତୀୟ ଥର ତାଙ୍କୁ ଚିଲିକାରୁ ଟିକେଟ ମିଳିଥିଲା ଏବଂ ଲୋକେ ତାଙ୍କୁ ପୁନର୍ବାର ଜିତାଇଥିଲେ ।