ଭୁବନେଶ୍ୱର/କଟକ: ଗତକାଲି ଶେଷ ହୋଇଥିବା କଟକର ଐତିହାସିକ ବାଲିଯାତ୍ରା ଆୟୋଜନରେ ବିଭ୍ରାଟକୁ ନେଇ ବର୍ଷିଛନ୍ତି କଟକ ମହାନଗର ପୂଜା କମିଟିର ସମ୍ପାଦକ ତଥା ବାଙ୍କୀର ପୂର୍ବତନ ବିଧାୟକ ପ୍ରଭାତ ତ୍ରିପାଠୀ । ବାଲିଯାତ୍ରା ଆୟୋଜନରୁ ସେ ଦୁର୍ନୀତିର ଗନ୍ଧ ବାରିବା ସହ ବିଭ୍ରାଟ ପାଇଁ ଜିଲ୍ଲା ପ୍ରଶାସନକୁ ଦାୟୀ କରିଛନ୍ତି । କିଛି ଅଫିସରଙ୍କ ମନମାନି ପାଇଁ ବାଲିଯାତ୍ରା ଆୟୋଜନରେ ଯାବତୀୟ ଗଡ଼ବଡ଼ ହୋଇଛି । ରାଜ୍ୟ ସରକାର ଏହାର ସ୍ପେଶାଲ୍ ଅଡିଟ୍ କରିବାକୁ ସେ ଦାବି କରିଛନ୍ତି । ସେହିଭଳି ବାଲିଯାତ୍ରା ମଞ୍ଚକୁ ରାଜନୈତିକ ଦଳର ବନ୍ଦନା ପାଇଁ ବ୍ୟବହାର କରାଯିବାକୁ ଦୃଢ଼ ନାପସନ୍ଦ କରିଛନ୍ତି ।
ସାମ୍ବାଦିକମାନଙ୍କୁ ପ୍ରତିକ୍ରିୟା ଦେଇ ଶ୍ରୀ ତ୍ରିପାଠୀ କହିଛନ୍ତି, କଟକ ବାଲିଯାତ୍ରା ଜିଲ୍ଲା ସଂସ୍କୃତି ସମିତି ନାଁରେ ପାଳନ କରାଯାଉଥିଲେ ହେଁ ଏହାର ସ୍ୱଚ୍ଛତା କଟକବାସୀ କିମ୍ବା ଓଡ଼ିଶାବାସୀ ଜାଣିବା ସମ୍ଭବପର ହେଉନାହିଁ । କିଛି ପ୍ରଶାସନିକ ଅଧିକାରୀଙ୍କ ନିୟନ୍ତ୍ରଣରେ ସମସ୍ତ ବ୍ୟବସ୍ଥା ନିୟନ୍ତ୍ରିତ ହେଉଛି । ଦୋକାନଘରର ଆକାର, ଭଡ଼ା, ଆବଣ୍ଟନର ନିଷ୍ପତ୍ତି ହାତଗଣତି ଲୋକଙ୍କ ଦ୍ୱାରା କରାଯାଉଛି ।
କିନ୍ତୁ କଟକ ସହରର ଏକ ପରମ୍ପରା ରହିଛି । ପ୍ରତ୍ୟେକ କାର୍ଯ୍ୟରେ ନିର୍ବାଚିତ ପ୍ରତିନିଧି, ବିଭିନ୍ନ ରାଜନୈତିକ ଦଳର ପ୍ରତିନିଧି, ମହାନଗର ଶାନ୍ତି କମିଟି, ପୂର୍ବାଞ୍ଚଳ ଶାନ୍ତି କମିଟି ମିଳିତ ଭାବେ ଦାୟିତ୍ୱ ନିଅନ୍ତି । ଅତୀତରେ ବାଲିଯାତ୍ରାର ସମସ୍ତ ହିସାବ ନିକାଶ କଟକବାସୀଙ୍କ ପାଖରେ ଭିନ୍ନ ଭିନ୍ନ ଫୋରମ୍ ରେ ଉପସ୍ଥାପିତ ହେଉଥିଲା । ମାତ୍ର ଏବେ ତାହାକୁ ପ୍ରକାଶ୍ୟରେ ଉପେକ୍ଷା କରାଯାଉଛି ।
ସେ ଅଭିଯୋଗ କରିଛନ୍ତି ଯେ ଚଳିତବର୍ଷ ବାଲିଯାତ୍ରାରେ ଅତିଥି ଚୟନ, ସମ୍ବର୍ଦ୍ଧିତ ବ୍ୟକ୍ତି ଚୟନରେ ବିଭ୍ରାଟ ପରିଲକ୍ଷିତ ହୋଇଛି । ଜିଲ୍ଲା ପ୍ରଶାସନ ଏକଚାଟିଆ ନିଷ୍ପତ୍ତି ନେଇଛନ୍ତି । ବାଲିଯାତ୍ରା ଜାତୀୟ ମାନ୍ୟତା ପାଇବାକୁ ଯାଉଥିବା ବେଳେ ଏହା ଗ୍ରହଣୀୟ ନୁହେଁ । ବାଲିଯାତ୍ରା ରାଜ୍ୟ ସରକାରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ହେଉ । ବାଲିଯାତ୍ରାରେ କେତେ ଆୟ ହୋଇଛି ଓ ବ୍ୟୟ ହୋଇଛି ତାର ଅଡିଟ୍ ହେଉ ବୋଲି ଦାବି କରିଛନ୍ତି ।
ସେହିଭଳି ପଥୋତ୍ସବର ରାଜନୀତିକରଣ ଓ ମଞ୍ଚରେ ଅଶ୍ଲୀଳ ନାଚଗୀତକୁ ଶ୍ରୀ ତ୍ରିପାଠୀ ନାପସନ୍ଦ କରିଛନ୍ତି । ସେ କହିଛନ୍ତି,ଏହା ଠିକ୍ ନୁହେଁ । ବାଲିଯାତ୍ରା ମଞ୍ଚକୁ ଅପସଂସ୍କୃତି ଆଣିବା ଏବଂ ରାଜନୈତିକ ଦଳର ପ୍ରଚାର ପ୍ରସାର ପାଇଁ ବ୍ୟବହାର କରାଯିବା ଅନୁଚିତ । ଏହା ଓଡ଼ିଶାବାସୀଙ୍କ ଅସ୍ମିତା ପ୍ରତି ପଦାଘାତ ।
