ଭୁବନେଶ୍ୱର: ଭୁବନେଶ୍ୱର ଉତ୍ତର ନିର୍ବାଚନମଣ୍ଡଳୀର ପୂର୍ବତନ ବିଧାୟକ ପ୍ରିୟଦର୍ଶୀ ମିଶ୍ର ଆଜି ବିଜେଡିରୁ ଇସ୍ତଫା ଦେଇଛନ୍ତି । ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପାଖକୁ ସେ ତାଙ୍କର ଇସ୍ତଫାପତ୍ର ପଠାଇଛନ୍ତି । ଦଳରେ ତାଙ୍କୁ କ୍ରମାଗତ ଅବହେଳା କରାଯାଉଥିବା ପ୍ରତିବାଦରେ ସେ ବିଜେଡି ଛାଡ଼ିଥିବା ଇସ୍ତଫାପତ୍ରରେ ଉଲ୍ଲେଖ କରିଛନ୍ତି । ତେବେ ଯାହା ବି ହୋଇଯାଉ, ଏଥର ସେ ନିର୍ବାଚନ ଲଢ଼ିବା ନିଶ୍ଚିତ ବୋଲି କହିଛନ୍ତି । ଆଜି ସେ ବିଜେପିରେ ଯୋଗଦେବେ ବୋଲି ମଧ୍ୟ ସୂଚନା ମିଳିଛି ।
ପୂର୍ବତନ ସାଂସଦ ପ୍ରସନ୍ନ ପାଟ୍ଟଶାଣୀଙ୍କ ଜ୍ୱାଇଁ ହେଉଛନ୍ତି ପ୍ରିୟଦର୍ଶୀ । ତେବେ ଶ୍ୱଶୁରଙ୍କ ନାଁରେ ତାଙ୍କର ପରିଚୟ ତିଆରି ହୋଇନି । ସେ ନିଜ ପରିଚୟ ନିଜେ ସୃଷ୍ଟି କରିଛନ୍ତି । ଛାତ୍ର ଓ ଯୁବାବସ୍ଥାରେ ବିଜୁ ବାବୁଙ୍କ ସହ ଜନତା ଦଳରେ କାମ କରିଛନ୍ତି । ପରବର୍ତ୍ତୀ ସମୟରେ ବିଜେଡି ଗଠନ ଆରମ୍ଭରୁ ନବୀନ ବାବୁଙ୍କ ସହ ଏହିଭଳି ଦୀର୍ଘ ୩୦ ବର୍ଷ ଧରି କାମ କରିଛନ୍ତି । ତାଙ୍କର ସାଂଗଠନିକ ଦକ୍ଷତା ଦୃଷ୍ଟିରୁ ୨୦୧୪ ରେ ଭୁବନେଶ୍ୱର ଉତ୍ତରରୁ ବିଜେଡି ଟିକେଟ୍ ପାଇ ବିପୁଳ ଭୋଟରେ ବିଜୟୀ ହୋଇଥିଲେ ।
ମାତ୍ର ୨୦୧୯ ରେ ଦଳ ତାଙ୍କୁ ଟିକେଟ୍ ଦେଲା ନାହିଁ । ତାଙ୍କ ଜାଗାରେ ନୂଆ ମୁହଁ ସୁଶାନ୍ତ(ବାପୁ) ରାଉତଙ୍କୁ ଦିଆଗଲା ଟିକେଟ୍ । ଏଥିରେ ପ୍ରିୟଦର୍ଶୀ ଭୀଷଣ ଅସନ୍ତୁଷ୍ଟ ହୋଇ ଦଳ ଛାଡ଼ିବାକୁ ଧମକ ଦେଇଥିଲେ ମଧ୍ୟ ତାଙ୍କୁ ବୁଝାଇ ଶାନ୍ତ କରାଗଲା । ପରିବର୍ତ୍ତୀ ସମୟରେ ତାଙ୍କୁ ଅଳ୍ପ ସମୟ ପାଇଁ ହାଉସିଂ ବୋର୍ଡ ଅଧ୍ୟକ୍ଷ ଏବଂ ପରେ ଦଳର ସାଧାରଣ ସମ୍ପାଦକ ପଦବୀ ଦିଆଗଲା । ତେବେ ଗତଥର ଦିଆଯାଇଥିବା ପ୍ରତିଶ୍ରୁତି ମୁତାବକ ଏଥର ସେ ଟିକେଟ ପାଇବେ ବୋଲି ଆଶା ରଖିଥିଲେ ଏବଂ ୬ ମାସ ହେଲା ନିଜ ସଂଗଠନକୁ ସୁଦୃଢ଼ କରିବା ସହ ଗାଁ ଗାଁ ବୁଲି ଲୋକସମ୍ପର୍କ ବଢ଼ାଇଥିଲେ । ମାତ୍ର ଟିକେଟ୍ ପାଇବାର ଗ୍ରୀନ୍ ସିଗନାଲ୍ ଏ ଯାଏଁ ନ ମିଳିବାରୁ ଆଗୁଆ ବାଟ କାଟି ଦେଇଛନ୍ତି ।
ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ଯେ ଗତ ୫ ବର୍ଷ ହେଲା ମୋତେ ଦଳୀୟ ସାଂଗଠନିକ କାର୍ଯ୍ୟରେ କେହି ଡାକୁ ନ ଥିଲେ । ଉପରେ ପଡ଼ି ନିଜ ଉଦ୍ୟମରେ ଦଳୀୟ କାର୍ଯ୍ୟକ୍ରମ କିନ୍ତୁ ଜାରି ରଖିଥଲି । ୨୦୨୪ ପାଇଁ ୨୦୧୯ରେ ମୋତେ ପ୍ରତିଶ୍ରୁତି ଦେଇଥିଲେ । କିନ୍ତୁ ପୁଣି ଧୋକ୍କା ମିଳିବା ଜାଣି ଦଳ ଛାଡ଼ିବାକୁ ନିଷ୍ପତ୍ତି ନେଲି । ନିର୍ବାଚନ ଲଢ଼ିବି ବୋଲି ଆଗରୁ କହିଛି, ମୁଁ ନିଶ୍ଚିତ ଲଢ଼ିବି । କେହି ମତେ ଅଟକେଇ ପାରିବି ନାହିଁ ।
ତେବେ ପ୍ରିୟଦର୍ଶୀଙ୍କ ବିଜେଡି ଦଳତ୍ୟାଗ ଏବଂ ବିଜେପିରେ ସାମିଲ ହେବାର ସୂଚନା ଆସିବା ଊଭୟ ଦଳରେ ଭୂକମ୍ପ ସୃଷ୍ଟି କରିଛି । ଉତ୍ତର ନିର୍ବାଚନ ମଣ୍ଡଳୀରେ ପ୍ରିୟଦର୍ଶୀଙ୍କ ଦବଦବା ଭଲ ଥିବାରୁ ବିଜେଡି ପାଇଁ କଠନ ପରିସ୍ଥିତି ସୃଷ୍ଟି କରିଛି । ଅନ୍ୟପକ୍ଷରେ ବିଜେପିକୁ ଯାଇ ପ୍ରିଦଦର୍ଶୀ ଟିକେଟ ହାତେଇଲେ ଦିଲ୍ଲୀପ ମହାନ୍ତିଙ୍କ ଭଳି ଆଶାୟୀ ପ୍ରାର୍ଥୀମାନେ ତାଙ୍କୁ ସମର୍ଥନ ଓ ସହଯୋଗ କରିବାର ପ୍ରଶ୍ନ ଉଠୁନାହିଁ । ତେଣୁ ବିଜେପି ଭୋଟ ମଧ୍ୟ ଭାଗ ଭାଗ ହୋଇଯାଇପାରେ । ରାଜନୀତିର ଏଭଳି ଜଟିଳ ଅଙ୍କକଷାରେ ଉତ୍ତର ଭୁବନେଶ୍ୱର ସ୍ଥିତି ରୋଚକ ମୋଡ଼ ନେଇଛି ।
ସେପଟେ ମଧ୍ୟ ନିର୍ବାଚନମଣ୍ଡଳୀରେ ବିଧାୟକ ଅନନ୍ତ ନାରାୟଣ ଜେନାଙ୍କୁ ବିରୋଧ କରୁଥିବା ଅମରେଶ(ବାଇଁଆ) ଜେନାଙ୍କ ପଦକ୍ଷେପକୁ ସମସ୍ତେ ଚାହିଁ ରହିଥିବା ବେଳେ ଏକାମ୍ରରେ ମଧ୍ୟ ସମାନ ସ୍ଥିତି । ଅଶୋକ ପଣ୍ଡାଙ୍କୁ ସେଠାରେ ପ୍ରବଳ ବିରୋଧ କରୁଛନ୍ତି ବିରଞ୍ଚି ନାରାୟଣ(ଲିଟୁ) ମହାସୁପକାର ।
ରୋଚକ କଥା ହେଉଛି, ଏକାମ୍ରର ଟାଣୁଆ କଂଗ୍ରେସ ନେତ୍ରୀ ରଶ୍ମୀ ମହାପାତ୍ର ବିଜେପିରେ ଯୋଗଦେବାକୁ ଯାଉଥିଲା ବେଳେ ଜୟଦେବର ବିଜେଡି ଯୁବନେତା ସିଲୁ ପାତ୍ର ବିଜେପିରେ ଯୋଗଦେଉଥିବା ବିଶ୍ୱସ୍ତ ସୂତ୍ରରୁ ଖବର ମିଳିଛି ।
