-ବିଜେପିରେ ପ୍ରିୟଦର୍ଶୀ ମିଶ୍ର
-ବିଜେଡିରେ କେ. ସୁରିଆ ରାଓ
-ବିଜେପିରେ ରଶ୍ମୀ ମହାପାତ୍ର
-କଂଗ୍ରେସ ଛାଡ଼ିଲେ ଚିରଞ୍ଜିବୀ ବିଶ୍ୱାଳ
ଭୁୁବନେଶ୍ୱର: ସାଧାରଣ ନିର୍ବାଚନ ବେଳେ ଦଳ ଡିଆଁଡିଇଁ ଏକ ସାଧାରଣ କଥା । ଏହିକ୍ରମରେ ଆଜି ଦିନକରେ ବଡ଼ ବଡ଼ ଚେହେରା ନିଜ ଦଳରୁ ଇସ୍ତଫା ଦେଇଛନ୍ତି । କିଛି ଅନ୍ୟ ଦଳକୁ ଡେଇଁଛନ୍ତି, ଆଉ କିଛି ଡେଇଁବେ । ଏଥିରେ ବେଶୀ କ୍ଷତି ସହିଛି ଶାସକ ଦଳ ବିଜେଡି । ତେବେ ଉପକୂଳ ଓଡ଼ିଶାରୁ କଂଗ୍ରେସର ଜଣେ ହେଭିୱେଟ୍ ଦଳରୁ ଇସ୍ତଫା ଦେଇ ବିଜେଡି ମୁହାଁ ହୋଇଥିଲା ବେଳେ ଦକ୍ଷିଣ ଓଡ଼ିଶାରୁ ଜଣେ ପୂର୍ବତନ ବିଧାୟକ ଶାସକ ଦଳ ଶିବିରକୁ ଡ଼େଇଁଛନ୍ତି ।
ଆଜି ସକାଳୁ ସକାଳୁ ବିଜେଡିରୁ ଇସ୍ତଫା ଦେଇଥିଲେ ଉତ୍ତର ଭୁବନେଶ୍ୱରର ପୂର୍ବତନ ବିଧାୟକ ପ୍ରିୟଦର୍ଶୀ ମିଶ୍ର । ଦଳରେ ତାଙ୍କୁ କ୍ରମାଗତ ଅବହେଳା କରାଯାଉଥିବା ପ୍ରତିବାଦରେ ସେ ବିଜେଡି ଛାଡ଼ୁଥିବା ଇସ୍ତଫାପତ୍ରରେ ଉଲ୍ଲେଖ କରିଥିଲେ । ଆଉ ଇସ୍ତଫା ଘୋଷଣାର ଅଳ୍ପ ସମୟ ପରେ ବିଜେପି ଅଫିସ୍ ଯାଇ ପଦ୍ମ ଧରିଥିଲେ । ମିଶ୍ରଣ ପର୍ବରେ ଉପସ୍ଥିତ ଥିଲେ ପ୍ରଭାରୀ ବିଜୟପାଲ୍ ସିଂହ ତୋମାର, ରାଜ୍ୟ ସଭାପତି ମନମୋହନ ସାମଲ, ସାଂସଦ ଅପରାଜିତା ଷଡ଼ଙ୍ଗୀ ପ୍ରମୁଖ ।
ଉତ୍ତରରୁ ନିଶ୍ଚିତ ନିର୍ବାଚନ ଲଢ଼ିବେ ବୋଲି ପ୍ରିୟଦର୍ଶୀ ଘୋଷଣା କରି ବିଜେପିରେ ମିଶିଥିବାରୁ ସ୍ଥିତି ରୋଚକ ହୋଇଛି । କାରଣ ସେଠାରେ ବିଜେପିର ପ୍ରମୁଖ ଦାବିଦାର ଅଛନ୍ତି ଦଳର ବରିଷ୍ଠ ନେତା ତଥା ମୁଖପାତ୍ର ଦିଲ୍ଲୀପ ମହାନ୍ତି । ୫ ବର୍ଷ ହେଲା ସେ ବିଭିନ୍ନ ସାଂଗଠନିକ କାର୍ଯ୍ୟ ଜରିଆରେ ଲୋକଙ୍କ ସହ ସମ୍ପର୍କ ଯୋଡିଛନ୍ତି । ସେଥିପାଇଁ ସେ ମଧ୍ୟ ଅକ୍ଲାନ୍ତ ପରିଶ୍ରମ କରିଛନ୍ତି । ତେଣୁ ପ୍ରିୟଦର୍ଶୀ ପ୍ରାର୍ଥୀ ହେଲେ ଦିଲ୍ଲୀପ କ’ଣ କରିବେ ତାହା ଦେଖିବାର ଅଛି ।
ପାରଳାଖେମୁଣ୍ଡିର ପୂର୍ବତନ କଂଗ୍ରେସ ବିଧାୟକ କେ.ସୁରିଆ ରାଓ ନିଜର ଶତାଧିକ କର୍ମୀଙ୍କ ସହ ଦଳରୁ ଇସ୍ତଫା ଦେଇ ବିଜେଡିରେ ଯୋଗଦେଇଛନ୍ତି । ଆଜି ଶଙ୍ଖ ଭବନଠାରେ ଆୟୋଜିତ ମିଶ୍ରଣ ପର୍ବରେ ମନ୍ତ୍ରୀ ଅତନୁ ସବ୍ୟସାଚୀ ନାୟକ, ରାଜ୍ୟସଭା ସାଂସଦ ଡ. ସସ୍ମିତ୍ ପାତ୍ରଙ୍କ ଉପସ୍ଥିତିରେ ସେମାନେ ଶଙ୍ଖ ଧରିଥିଲେ ।
ସେହିଭଳି ଦଶପଲ୍ଲା ଏନଏସିର ଦୁଇ ବିଜେପି କାଉନସିଲରଙ୍କ ସହ ଜଣେ ବିଜେପି ଜିଲ୍ଲା ପରିଷଦ ପ୍ରାର୍ଥୀ ଆଜି ଶଙ୍ଖ ଭବନଠାରେ ଦଶପଲ୍ଲା ବିଧାୟକ ରମେଶ ବେହେରା ଏବଂ ରାଜ୍ୟସଭା ସାଂସଦ ଡ. ପାତ୍ରଙ୍କ ଉପସ୍ଥିତିରେ ବିଜେଡିରେ ଯୋଗ ଦେଇଛନ୍ତି । ଦୁଇ କାଉନସିଲର ହେଲେ ୧୧ ନଂ ୱାର୍ଡର କିରଣ କୁମାର ସାହୁ, ୫ ନଂ ୱାର୍ଠର ମାନିନୀ ସେଠୀ ଏବଂ ଗରିଆ ଜୋନ୍ ୮ ର ବିଜେପି ଜିଲ୍ଲା ପରିଷଦ ପ୍ରାର୍ଥୀ ମନୋରଞ୍ଜନ ମହାପାତ୍ର ।
କଂଗ୍ରେସର ହେଭିୱେଟ୍ ତଥା ପୂର୍ବତନ ବିଧାୟକ ଚିରଞ୍ଜିବୀ ବିଶ୍ୱାଳ ଦଳରୁ ଇସ୍ତଫା ଦେଇଛନ୍ତି । ଅତୀତରେ ଦଳ ବିରୋଧୀ କାର୍ଯ୍ୟ ଅଭିଯୋଗରେ ସେ ଏବଂ କଟକ ବାରବାଟୀ ବିଧାୟକ ମହମ୍ମଦ ମୋକିମ୍ ନିଲମ୍ବିତ ହୋଇଥିଲେ । ପରବର୍ତ୍ତୀ ଉଭୟଙ୍କ ଉପରୁ ନିଲମ୍ବନ ହଟିଥିଲା । ତେବେ ଚିରଞ୍ଜିବୀଙ୍କୁ ଆଉ ଦଳୀୟ କାର୍ଯ୍ୟକ୍ରମରେ ଦେଖିବାକୁ ମିଳିଲା ନାହିଁ । ଖୁବଶୀଘ୍ର ସେ ବିଜେଡିରେ ଯୋଗଦେବେ ବୋଲି ଚର୍ଚ୍ଚା ହେଉଛି ।
କେନ୍ଦ୍ରାପଡ଼ା ସାଂସଦ ତଥା ଓଡ଼ିଆ ସିନେଷ୍ଟାର୍ ଅନୁଭବ ମହାନ୍ତି ଆଜି ବିଜେଡିରୁ ଇସ୍ତଫା ଦେଇଛନ୍ତି । ସେ ମଧ୍ୟ ବିଜେପିରେ ଯୋଗଦେଇପାରନ୍ତି । ଭର୍ତ୍ତୃହରି ମହତାବଙ୍କ ପରେ ସେ ବିଜେଡିର ଦ୍ୱିତୀୟ ସିଟିଂ ସାଂସଦ ଯିଏ ଇସ୍ତଫା ଦେଇଛନ୍ତି ।
ସେହିଭଳି କୋରେଇର ପୂର୍ବତନ ବିଧାୟକ ତଥା ଓଡ଼ିଆ ସିନେଷ୍ଟାର୍ ଆକାଶ ଦାସ ନାୟକ ବିଜେଡିରୁ ଇସ୍ତଫା ଦେଇଛନ୍ତି । ସେ ମଧ୍ୟ ବିଜେପିରେ ଯୋଗଦେଇପାରନ୍ତି । ଯାହା ବି ହେଲେ କୋରେଇରୁ ସେ ନିର୍ବାଚନ ଲଢ଼ିବେ ବୋଲି ଗଣମାଧ୍ୟକୁ ପ୍ରତିକ୍ରିୟା ଦେଇଛନ୍ତି ।
ଭୁବନେଶ୍ୱର ଏକାମ୍ରର ବରିଷ୍ଠ କଂଗ୍ରେସ ନେତ୍ରୀ ରଶ୍ମୀ ମହାପାତ୍ର ଦଳରୁ ଇସ୍ତଫା ଦେଇ ବିଜେପିରେ ମିଶିଛନ୍ତି ।
