ଭୁବନେଶ୍ୱର: ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ରଘୁବର ଦାସ ଓଡ଼ିଶାର ରାଜ୍ୟପାଳ ଭାବେ ନିଯୁକ୍ତି ପାଇଛନ୍ତି । ଆଜି ସଂଧ୍ୟାରେ ରାଷ୍ଟ୍ରପତି ଭବନରୁ ଏହାର ବିଜ୍ଞପ୍ତି ପ୍ରକାଶ ପାଇଛି । ପ୍ରଫେସର ଗଣେଶୀ ଲାଲଙ୍କ ଜାଗାରେ ସେ ଓଡ଼ିଶାର ରାଜ୍ୟପାଳ ହେବେ । ପ୍ରଫେସର ଲାଲଙ୍କ କାର୍ଯ୍ୟକାଳ ଗତ ମେ’ ମାସରେ ପୂରି ଯାଇଛି । ପରବର୍ତ୍ତୀ ରାଜ୍ୟପାଳ ନିଯୁକ୍ତି ହୋଇ ନ ଥିବାରୁ ସେ ଦାୟିତ୍ୱରେ ଥିଲେ ।
ନୂଆ ରାଜ୍ୟପାଳ ରଘୁବର ଦାସ ହେଉଛନ୍ତି ବିଜେପିର ଜଣେ ବରିଷ୍ଠ ନେତା । ବର୍ତ୍ତମାନ ସେ ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ଅଛନ୍ତି । ଝାଡ଼ଖଣ୍ଡ ବିଧାନସଭାକୁ ସେ ୫ ଥର ନିର୍ବାଚିତ ହୋଇଛନ୍ତି । ୨୦୦୪ ରେ ଝାଡ଼ଖଣ୍ଡ ବିଜେପି ସଭାପତି ଭାବେ ନିଯୁକ୍ତି ପାଇଥିଲେ । ତାଙ୍କ ନେତୃତ୍ୱରେ ବିଜେପି ୩୦ଟି ବିଧାନସଭା ଆସନରେ ବିଜୟ ଲାଭ କରିଥିଲା । ୨୦୦୫ ରେ ଅର୍ଜୁନ ମୁଣ୍ଡାଙ୍କ ସରକାର(ଏନଡିଏ)ରେ ତାଙ୍କୁ ମନ୍ତ୍ରୀ ପଦ ମିଳିଥିଲା । ପରବର୍ତ୍ତୀ ଥର ଶିବୁ ସୋରେନଙ୍କ ମୁଖ୍ୟମନ୍ତ୍ରୀତ୍ୱ କାଳରେ ୬ ମାସ ପାଇଁ ସେ ରାଜ୍ୟର ଉପମୁଖ୍ୟମନ୍ତ୍ରୀ ହୋଇଥିଲେ । ୨୦୧୪ ନିର୍ବାଚନରେ ବିଜେପି ସଂଖ୍ୟା ଗରିଷ୍ଠତା ଲାଭ କରିଥିଲା ଏବଂ ଝାଡ଼ଖଣ୍ଡର ଷଷ୍ଠ ମୁଖ୍ୟମନ୍ତ୍ରୀ ଭାବେ ରଘୁବର ଶପଥ ନେଇଥିଲେ । ସେ ଥିଲେ ଝାଡ଼ଖଣ୍ଡର ପ୍ରଥମ ଅଣଆଦିବାସୀ ମୁଖ୍ୟମନ୍ତ୍ରୀ ।
ତେବେ ୨୦୧୯ ନିର୍ବାଚନରେ ତାଙ୍କର ନେତୃତ୍ୱ ବିପର୍ଯ୍ୟୟର ସାମନା କରିଥିଲା । ୮୧ ଆସନରୁ ବିଜେପିକୁ ମିଳିଥିଲା ମାତ୍ର ୨୫ ଆସନ । ନିଜର ଜନ୍ମସ୍ଥାନ ଜାମସେଦପୁର(ପୂର୍ବ) ଆସନରୁ ସ୍ୱାଧୀନ ଭାବେ ଲଢ଼ୁଥିବା ବିଜେପିର ବିଦ୍ରୋହୀ ପ୍ରାର୍ଥୀ ସରୟୁ ରାଏଙ୍କଠାରୁ ୧୫ ହଜାରରୁ ଅଧିକ ଭୋଟରେ ପରାସ୍ତ ହୋଇଥିଲେ ।
