ଭୁବନେଶ୍ୱର: କଂଗ୍ରେସର ଶୀର୍ଷ ନେତା ରାହୁଲ ଗାନ୍ଧୀ ଆଜି ଓଡ଼ିଶାରେ ଦଳ ପାଇଁ ନିର୍ବାଚନ ପ୍ରଚାର କରିଛନ୍ତି । ବଲାଙ୍ଗୀରରେ ଆୟୋଜିତ ଜନ ଆଶୀର୍ବାଦ ସଭାରେ ସେ କେନ୍ଦ୍ରର ନରେନ୍ଦ୍ର ମୋଦୀ ସରକାରଙ୍କ ଉପରେ ଭୀଷଣ ବର୍ଷିଛନ୍ତି । ଜୁନ୍ ୪ ତାରିଖରେ ଦେଶରେ ଇଣ୍ଡି ମେଣ୍ଟ ସରକାର ଗଠନ ହେବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି । ତେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ତାଙ୍କ ବିଜେଡି ସରକାରଙ୍କ ନାଁ ଧରିଲେନି କି ବିରୋଧରେ ପଦୁଟିଏ କହିଲେନି ।
ବଲାଙ୍ଗୀର କୋଶଳ କଳାମଣ୍ଡପ ଜନସଭାରେ ରାହୁଲ ଗାନ୍ଧୀ ଆରମ୍ଭରୁ ଶେଷ ଯାଏଁ ବିଜେପି ନେତୃତ୍ତ୍ୱାଧୀନ କେନ୍ଦ୍ର ଏନଡିଏ ସରକାରଙ୍କ ବିରୋଧରେ ବର୍ଷିଥିଲେ । କହିଥିଲେ, ସେମାନେ ଜିତିଲେ ସମ୍ବିଧାନ ବଦଳାଇଦେବେ ବୋଲି କହୁଛନ୍ତି । ସଂରକ୍ଷଣ ବ୍ୟବସ୍ଥା ଉଚ୍ଛେଦ କରିଦେବାକୁ କହୁଛନ୍ତି । ପ୍ରଥମ ଥର ପାଇଁ କୌଣସି ଦଳ ଏଭଳି କହୁଛନ୍ତି । ମାତ୍ର ଦୁନିଆର କୌଣସି ଶକ୍ତି ସମ୍ବିଧାନକୁ ଛୁଇଁ ପାରିବନି ।
ଏନଡିଏ ସରକାରଙ୍କ ଗରିବୀ ମାରଣ ନୀତି ସମ୍ପର୍କରେ ରାହୁଲ କହିଥିଲେ, ସେମାନେ ୨୨ ଆରବପତିଙ୍କୁ ୧୬ ଲକ୍ଷ କୋଟି ଛାଡ଼ କରିଦେଲେ । ମାତ୍ର ଗରିବ, ଖଟିଖିଆ, କୃଷକଙ୍କ ଋଣ ଛାଡ଼ କଲେ ନାହିଁ । ଦିଲ୍ଲୀରେ ସରକାରକୁ ୯୦ ଅଫିସର ଚଳାଉଛନ୍ତି । ଯେଉଁଥିରେ ମାତ୍ର ୩ ଜଣ ହେଉଛନ୍ତି ଦଳିତ ।
ରାହୁଲ କହିଥିଲେ, ଦେଶରେ ଜୁନ୍ ୪ ରେ ଇଣ୍ଡି ମେଣ୍ଟ ସରକାର ହେବ । ଆମେ ସରକାରକୁ ଆସିବା କ୍ଷଣି ଜାତି ଜନଗଣନା ହେବ, ସବୁ ବର୍ଗଙ୍କୁ ଗଣତି ହେବ । ୧ କୋଟି ଲକ୍ଷପତି ସୃଷ୍ଟି କରିବୁ । ପ୍ରତି ପରିବାରର ଜଣେ ଜଣେ ମହିଳାଙ୍କୁ ଲକ୍ଷପତି କରାଯିବ । ଜୁଲାଇ ୪ ରେ ପ୍ରଥମ କିସ୍ତି ଭାବେ ମହିଳାଙ୍କ ଖାତାକୁ ୮୫୦୦ ଯିବ । ବର୍ଷକରେ ୧ ଲକ୍ଷ ଟଙ୍କା ପ୍ରତି ମହିଳାଙ୍କ ଖାତାକୁ ଯିବ । କୋଟିଏ ମହିଳାଙ୍କୁ ବର୍ଷକ ମଧ୍ୟରେ ଲକ୍ଷପତି କରିଦିଆଯିବ । ସାରା ଦେଶରେ ବନ୍ଦ ପଡ଼ିଥିବା କାରଖାନା ପୁଣି ଚାଲୁ କରାଯିବ । ଶିଳ୍ପ କାରଖାନାରେ ସ୍ଥାନୀୟ ଲୋକଙ୍କୁ ନିଯୁକ୍ତି ମିଳିବ । ଚାଷୀମାନଙ୍କ ଋଣ ଛାଡ଼ କରାଯିବ । ଗ୍ୟାରେଣ୍ଟି ଏମଏସପି ଲାଗୁ ହେବ । ଇଣ୍ଡି ମେଣ୍ଟ ସରକାର ମନରେଗା ମଜୁରୀ ୪୦୦ ଟଙ୍କା କରାଯିବ । ବେରୋଜଗାର ଯୁବବର୍ଗଙ୍କୁ ବର୍ଷକ ଯାଏଁ ମାସିକ ୮୫୦୦ ଟଙ୍କା ଦିଆଯିବ । ମନରେଗାରେ ମଜୁରୀ ୪୦୦ ଟଙ୍କାକୁ ବୃଦ୍ଧି କରିବୁ । ଅଙ୍ଗନବାଡ଼ି, ଆଶାକର୍ମୀଙ୍କ ଦରମା ୨ ଗୁଣା କରିବୁ ।
କଂଗ୍ରେସକୁ ଆଶୀର୍ବାଦ ଦିଅନ୍ତୁ, ଦେଶକୁ ବଞ୍ଚାନ୍ତୁ ବୋଲି ରାହୁଲ ଗାନ୍ଧୀ କହିଥିଲେ ।
