ଭୁବନେଶ୍ୱର: ଉତ୍ତରାଖଣ୍ଡ ଟନେଲରୁ ଉଦ୍ଧାର ପାଇଥିବା ୪ ଓଡ଼ିଆ ଶ୍ରମିକ ଆଜି ନିଜ ଜନ୍ମମାଟିକୁ ଫେରିଛନ୍ତି । ସେମାନେ ହେଲେ ମୟୁରଭଞ୍ଜ ଜିଲ୍ଲା ବାଙ୍ଗିରିପୋଷି ବ୍ଲକ୍ ଯୋଗିବନ୍ଧ ଗାଁର ବିଶ୍ୱେଶ୍ୱର ନାଏକ, ବେଡ଼ାକୁଦ ଗାଁର ଧୀରେନ ନାଏକ, ରାଇରଙ୍ଗପୁର ବ୍ଲକ୍ କୁଳଡିହା ଗାଁର ରାଜୁ ନାଏକ ଏବଂ ନବରଙ୍ଗପୁର ଜିଲ୍ଲା ଡାବୁଗାଁ ବ୍ଲକ୍ ତାଲବେଡ଼ା ଗାଁର ଭଗବାନ ଭତରା । ଭଦ୍ରକ ଜିଲ୍ଲା ବାସୁଦେବପୁର ବ୍ଲକ୍ ଚାଳିଶଚେନ୍ ଗାଁର ତପନ ମଣ୍ଡଳ ପରେ ଆସିବେ ।
ଶ୍ରମମନ୍ତ୍ରୀ ସାରଦା ନାୟକ ଆଜି ଏହି ୪ ଶ୍ରମିକଙ୍କୁ ସାଙ୍ଗରେ ଧରି ଦିଲ୍ଲୀରୁ ବିମାନଯୋଗେ ଆସି ଭୁବନେଶ୍ୱରରେ ପହଞ୍ଚିଥିଲେ । ମରଣ ମୁହଁରୁ ଫେରିଥିବା ଏହି ଶ୍ରମିକଙ୍କୁ ପାଛୋଟି ନେବା ପାଇଁ ସେମାନଙ୍କ ପରିବାର ଲୋକ ଉପସ୍ଥିତ ଥିଲେ । ସେମାନଙ୍କୁ ଦେଖିବା ପାଇଁ ବିମାନବନ୍ଦରରେ ଲୋକଙ୍କର ପ୍ରବଳ ଭିଡ଼ ହୋଇଥିଲା । ସେଠାରୁ ଶ୍ରମିକମାନଙ୍କୁ ସିଧାସଳଖ ସର୍କିିଟ୍ ହାଉସ୍ ନିଆଯାଇ ମଧ୍ୟାହ୍ନ ଭୋଜନରେ ଆପ୍ୟାୟତ କରାଯାଇଥିଲା । ଅପରାହ୍ନରେ ସେମାନେ ନବୀନ ନିବାସ ଆସି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଥିଲେ । ସାଙ୍ଗରେ ସେମାନଙ୍କ ପରିବାର ସଦସ୍ୟମାନେ ମଧ୍ୟ ନବୀନ ନିବାସ ଆସିଥିଲେ ।
ଏହି ଅବସରରେ ମୁଖ୍ୟମନ୍ତ୍ରୀ ସେମାନଙ୍କୁ ଅଭିନନ୍ଦନ ଜଣାଇ ସେମାନଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝିବା ସହ ପ୍ରତ୍ୟେକ ଶ୍ରମିକଙ୍କୁ ୨ ଲକ୍ଷ ଟଙ୍କା ଲେଖାଏଁ ସହାୟତା ପ୍ରଦାନ କରିଥିଲେ । ମୁଖ୍ୟମନ୍ତ୍ରୀଙ୍କ ସହୃଦୟତା ପାଇଁ ଶ୍ରମିକମାନେ ତାଙ୍କୁ ଧନ୍ୟବାଦ ଜଣାଇଥିଲେ ।
ଟନେଲ୍ ଭିତରେ ସେମାନଙ୍କ ସଂଘର୍ଷ ପୂର୍ଣ୍ଣ ଜୀବନ ବିଷୟରେ ମୁଖ୍ୟମନ୍ତ୍ରୀ ବେଶ୍ ଆଗ୍ରହର ସହ ଶୁଣିଥିଲେ । ଆପଣମାନେ ବାସ୍ତବରେ ଜଣେ ଜଣେ ହୀରୋ । ପ୍ରତିକୂଳ ପରିସ୍ଥିତିରେ ଜୀବନ ପାଇଁ ସଂଗ୍ରାମ କରି ବିଜୟ ହେବା ବାସ୍ତବିକ୍ ପ୍ରେରଣା ଦାୟକ ବୋଲି ମୁଖ୍ୟମନ୍ତ୍ରୀ କହିଥିଲେ ।
ଗତକାଲି ୫-ଟି ଓ ନବୀନ ଓଡ଼ିଶା ଅଧ୍ୟକ୍ଷ ଭି.କେ.ପାଣ୍ଡିଆନ୍ ଏହି ଶ୍ରମିକମାନଙ୍କ ସହ ଭିଡ଼ିଓ ଜରିଆରେ ଆଲୋଚନା କରି ସେମାନଙ୍କ ସ୍ୱାସ୍ଥ୍ୟ ଅବସ୍ଥା ପଚାରି ବୁଝିଥିବାରୁ ସେମାନେ କୃତଜ୍ଞତା ଜଣାଇଥିଲେ ।
ଏହି ସାକ୍ଷାତ ସମୟରେ ଶ୍ରମମନ୍ତ୍ରୀ ଶ୍ରୀ ନାୟକ ଏବଂ ଶ୍ରମ କମିସନର ଡ. ଥିରୁମାଲା ନାଏକ ଉପସ୍ଥିତ ଥିଲେ ।
ଏହାପରେ ୪ ଜଣ ଯାକ ଶ୍ରମିକଙ୍କୁ ସ୍ୱତନ୍ତ୍ର ଗାଡ଼ି ଯୋଗେ ସେମାନଙ୍କ ଘରକୁ ପଠାଯାଇଛି ।
