ଭୁବନେଶ୍ୱର: ଭିଜିଲାନସ୍ କୁ ଡରି ପଡୋଶୀ ଘର ଛାତକୁ ଡେଇଁଥିବା ଭୁବନେଶ୍ୱର ଜଳଯୋଗାଣ ବିଭାଗର( ଆରଡବ୍ଲୁଏସଏସ) ଆସିଷ୍ଟାଣ୍ଟ ଇଞ୍ଜିନିୟର ସୁନୀଲ କୁମାର ପାଢ଼ୀ ଆଜି ଗିରଫ ହୋଇ ଝାରପଡ଼ା ଜେଲ୍ ଯାଇଛନ୍ତି । ଏ ବାବୁଙ୍କର ୫ କୋଟିରୁ ଅଧିକ ଟଙ୍କାର ସ୍ଥାବର ଓ ଅସ୍ଥାବର ସମ୍ପତ୍ତି ଠାବ ହୋଇଛି । ଦୁର୍ନୀତି ଉପାୟରେ ସେ ନିଜ ଆୟଠାରୁ ୧୬୮ ପ୍ରତିଶତ ଅଧିକ ମାଲ୍ କମେଇଛନ୍ତି ।
ରାଜଧାନୀର ଜାଗମରା(ପାଢ଼ୀ ଭିଲ୍ଲା, ପ୍ଲଟ୍ ନଂ ୫୦୦/୫୧୨୦, ମଲ୍ଲିକ କମ୍ପ୍ଲେକ୍ସ)ରେ ତାଙ୍କର ଅଛି ଅତ୍ୟନ୍ତ ବିଳାସପୂର୍ଣ୍ଣ କୋଠା । ସାଢ଼େ ୩ ହଜାର ବର୍ଗଫୁଟ ଜାଗାରେ ନିର୍ମିତ ଏହି ତିନି ମହଲା କୋଠାର ଇଣ୍ଟେରିୟର କାମ ଆଖି ଖୋସି ଦେଉଛି । ପୈତୃକ ଘର ଗଞ୍ଜାମ ଜିଲ୍ଲା ଆସ୍କାରେ ବି ତାଙ୍କର ଅଛି ବିଶାଳ କୋଠା । ଆସ୍କା ବସଷ୍ଟାଣ୍ଡରେ ୭ ହଜାର ବର୍ଗଫୁଟ୍ ଜାଗାରେ ଗଢ଼ିଛନ୍ତି ମାର୍କେଟ୍ କମ୍ଫ୍ଲେକ୍ସ । ସେଠି ୯ଟି ଦୋକାନ ଘର ଭଡ଼ାରେ ଲାଗିଛି । ବ୍ରହ୍ମପୁର ସହର ଓ ଆଖପାଖରେ ୫ଟି ପ୍ଲଟ୍ ପକେଇଛନ୍ତି । ପ୍ରାୟ ୫୭ ଲକ୍ଷ ଟଙ୍କା ବ୍ୟାଙ୍କ ଏବଂ ଇନସୁରାନ୍ସରେ ଜମା ରଖିଛନ୍ତି । ବାବୁଙ୍କର ଗୋଟିଏ କାର୍ ଏବଂ ଚାରିଟି ମଟର ସାଇକେଲ ଓ ସ୍କୁଟି ଅଛି । ଘରେ ପ୍ରାୟ ୨୧ ଲକ୍ଷ ଟଙ୍କାର ଆସବାବପତ୍ର ରଖିଥିବା ଆକଳନ କରାଯାଇଛି । ଭିଜିଲାନସ୍ ଚଢ଼ଉ ବେଳେ ତାଙ୍କ ଘରୁ ନଗଦ ମିଳିଛି ୪ ଲକ୍ଷ ୫ ହଜାର ୩୧୮ ଟଙ୍କା । ତଦନ୍ତ ଚାଲିଥିବାରୁ ଆହୁରି ଅଧିକ ସମ୍ପତ୍ତି ଠାବ ହୋଇପାରେ ।
ଗତକାଲି ଭିଜିଲାନସ୍ ଟିମ୍ ଭୋର୍ ୪ଟାରେ ତାଙ୍କ ଜାଗମରାସ୍ଥିତ ଘର, ଅଫିସ, ଆସ୍କା ପୈତୃକ ଘର, ମାର୍କେଟ୍ କପ୍ଲେକ୍ସ, ଭଞ୍ଜନଗରରେ ସମ୍ପର୍କୀୟ ଘର ଏହିଭଳି ୫ଟି ଜାଗାରେ ଏକକାଳୀନ ଚଢ଼ଉ କରିଥିଲା । ଭିଜିଲାନସ୍ ଟିମ୍ ତାଙ୍କ ଜାଗମରା ଘରେ ପହଞ୍ଚିଲା କ୍ଷଣି ଶ୍ରୀ ପାଢ଼ୀ ଡରରେ ପଡୋଶୀ ଘରର ଛାତକୁ ଡେଇଁ ପଡ଼ି ଫେରାର ହୋଇଯାଇଥିଲେ । ତେବେ ପରେ ସେ ଧରାପଡ଼ି ଯାଇଥିଲେ ।
ସୂୂଚନାଯୋଗ୍ୟ, ଗିରଫ ହୋଇଥିବା ଅଭିଯୁକ୍ତ ଜେଇ ସୁନୀଲ ପାଢ଼ୀଙ୍କ ବାପା ଜଗବନ୍ଧୁ ପାଢ଼ୀ ବନ ବିଭାଗରେ ରେଞ୍ଜର ଚାକିରି କରିଥିଲେ । ଜି.ଉଦୟଗିରି ରେଞ୍ଜ ଅଫିସର ଥିବା ସମୟରେ ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ଗିରଫ ହୋଇଥିଲେ । ୨୦୦୯ ମସିହାରେ ମାମଲାର ବିଚାର କରି ବ୍ରହ୍ମପୁର ସ୍ୱତନ୍ତ୍ର ଭିଜିଲାନସ୍ କୋର୍ଟ ୭ ବର୍ଷ ଜେଲଦଣ୍ଡ ସହ ୧୦ ଲକ୍ଷ ଟଙ୍କା ଜରିମାନା କରିଥିଲେ ।
