ଭୁବନେଶ୍ୱର: ଆଦିବାସୀଙ୍କ ଜମି କିଣାବିକା ନେଇ ରାଜ୍ୟ କ୍ୟାବିନେଟ୍ ର ନିଷ୍ପତ୍ତି ସମ୍ପୂର୍ଣ୍ଣ ପ୍ରତ୍ୟାହାର ପାଇଁ ବିରୋଧୀ ଦଳ ଦାବି କରିଛନ୍ତି । ଆଜି ବିଧାନସଭାରେ କଂଗ୍ରେସ ଓ ବିଜେପି ଏହି ପ୍ରସଙ୍ଗ ଉଠାଇ ପ୍ରବଳ ହଟ୍ଟଗୋଳ କରିବାରୁ ଗୃହ ଚାଲିପାରିନାହିଁ । କ୍ୟାବିନେଟ୍ ରେ ହୋଇଥିବା ନିଷ୍ପତ୍ତି କୁ ସରକାର ସ୍ଥଗିତ ନ ରଖି ସମ୍ପୂର୍ଣ୍ଣ ପ୍ରତ୍ୟାହାର କରନ୍ତୁ ବୋଲି ସେମାନେ ଜିଦ୍ ଧରିଛନ୍ତି । ଗୃହରେ ଅଚଳାବସ୍ଥା ଦୂର ପାଇଁ ବାଚସ୍ପତି ଶ୍ରୀମତୀ ପ୍ରମିଳା ମଲ୍ଲିକ ଡାକିଥିବା ସର୍ବଦଳୀୟ ବୈଠକ ସଫଳ ହୋଇନାହିଁ ।
ଆଜି ବିଧାନସଭା ବୈଠକ ଆରମ୍ଭ ହେବା ମାତ୍ରେ କଂଗ୍ରେସ ଓ ବିଜେପି ବିଧାୟକମାନେ ହାତରେ ପ୍ଲାକାର୍ଡ ଧରି ଗୃହର ମଧ୍ୟଭାଗକୁ ଆସି ପ୍ରବଳ ହଟ୍ଟଗୋଳ କରିଥିଲେ । ଆଦିବାସୀଙ୍କ ଜମି ଅଣ ଆଦିବାସୀଙ୍କୁ କିଣାବିକା ନେଇ କ୍ୟାବିନେଟ୍ ନିଷ୍ପତ୍ତି ପ୍ରତ୍ୟାହାର ପାଇଁ ସେମାନେ ନାରାବାଜି କରିଥିଲେ । ଆଦିବାସୀଙ୍କ ଅଧିକାର ନେଇ ମୋସନ୍ ଆକାରରେ ବିଜେପି ଆଲୋଚନା ମଧ୍ୟ ଚାହୁଁଥିଲା । ବିଧାୟକମାନେ ନିଜ ନିଜ ଆସନକୁ ଫେରି ପ୍ରଶ୍ନୋତ୍ତର କାର୍ଯ୍ୟରେ ସହଯୋଗ କରିବାକୁ ବାଚସ୍ପତି ଅନୁରୋଧ କରିଥିଲେ ମଧ୍ୟ କେହି ଶୁଣି ନ ଥିଲେ । ତେଣୁ ବାଚସ୍ପତି ଗୃହକୁ ଦିନ ୧୨ଟା ପର୍ଯ୍ୟନ୍ତ ମୁଲତବୀ ରଖିଥିଲେ ।
୧୨ଟାରେ ଅନୁରୂପ ଅବସ୍ଥା ଦେଖାଦେବାରୁ ବାଚସ୍ପତି ପ୍ରଥମେ ୪୫ ମିନିଟ୍ ପାଇଁ ଗୃହକୁ ମୁଲତବୀ ଘୋଷଣା କରି ସର୍ବଦଳୀୟ ବୈଠକ ଡାକିଥିଲେ । ପରେ ଗୃହକୁ ୪ଟା ପର୍ଯ୍ୟନ୍ତ ମୁଲତବୀ ରଖାଯାଇଥିଲା । ଇତିମଧ୍ୟରେ ସର୍ବଦଳୀୟ ବୈଠକରେ କୌଣସି ନିର୍ଯ୍ୟାସ ବାହାରି ନ ଥିଲା । ଅପରାହ୍ନ ଅଧିବେଶନ ଆରମ୍ଭରୁ ବିରୋଧୀ ପୁଣି ହଟ୍ଟଗୋଳ କରିଥିଲେ । ଏହି ହଟ୍ଟଗୋଳ ମଧ୍ୟରେ ସରକାରଙ୍କ ପକ୍ଷରୁ ଭୂ-ସଂସ୍କାର ଦ୍ୱିତୀୟ ସଂଶୋଧନ ବିଧେୟକ ଉପସ୍ଥାପନ କରାଯାଇଥିଲା । ଏହାପରେ ଆସନ୍ତାକାଲି ପର୍ଯ୍ୟନ୍ତ ବିଧାନସଭାକୁ ମୁଲତବୀ ଘୋଷଣା କରିଥିଲେ ବାଚସ୍ପତି ।