ଭୁବନେଶ୍ୱର: ଆଗ ଶଙ୍ଖଭବନ ଘେରିଲେ । ହୋ ହଲ୍ଲା କଲେ । ସେଠାରୁ ନବୀନ ନିବାସ ଆଡକୁ ମୁହାଁଇଲେ । ପାଟକୁରା ବିଧାୟକ ଅରବିନ୍ଦ ମହାପାତ୍ରଙ୍କ ଶହ ଶହ ସମର୍ଥକ ଏହିଭଳି ଭାବେ ଆଜି ରାଜଧାନୀରେ ଶକ୍ତି ପ୍ରଦର୍ଶନ କରିଥିଲେ । ଅରବିନ୍ଦଙ୍କ ବିରୋଧରେ ଅଣାଯାଇଥିବା ଅଭିଯୋଗ ଭିତ୍ତିହୀନ ଏବଂ ତାଙ୍କ ପ୍ରତି ଅବିଚାର କରାଯାଇଛି ବୋଲି ଗର୍ଜନ କରି ନିଲମ୍ବନ ପ୍ରତ୍ୟାହାର ପାଇଁ ଜିଦ୍ ଧରିଥିଲେ । ସେମାନଙ୍କର ଏକ ପ୍ରତିନିଧି ଦଳକୁ ଶଙ୍ଖ ଭବନ ଡାକି ଦଳର ଦୁଇ ବରିଷ୍ଠ ନେତା ଦେବୀ ପ୍ରସାଦ ମିଶ୍ର ଏବଂ ପ୍ରତାପ ଜେନା ଆଲୋଚନା କରିଥିଲେ ମଧ୍ୟ ସେମାନେ ଶାନ୍ତ ପଡ଼ି ନ ଥିଲେ । ସଭାପତି ନବୀନ ପଟ୍ଟନାୟକଙ୍କୁ ଭେଟିବାକୁ ନବୀନ ନିବାସ ଯିବାକୁ ଉଦ୍ୟମ କରିଥିଲେ । ମାତ୍ର ଅଧାବାଟରୁ ପୁଲିସ ସେମାନଙ୍କୁ ଫେରାଇ ଦେଲା ।
ଅରବିନ୍ଦ ମହାପାତ୍ରଙ୍କ ଶତାଧିକ ସମର୍ଥକ ନବୀନ ନିବାସ ଆସୁଛନ୍ତି ବୋଲି ଆଜି ସକାଳେ ପ୍ରଚାର ହୋଇଥିଲା । ନବୀନ ନିବାସର ସୁରକ୍ଷା ଦୃଷ୍ଟିରୁ ପୁଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରି ଦିଆଯାଇଥିଲା । ଏୟାରପୋର୍ଟ ଛକରୁ ନବୀନ ନିବାସ ପର୍ଯ୍ୟନ୍ତ ପୁଲିସ ଛାଉଣି ହୋଇଯାଇଥିଲେ । ଫରେଷ୍ଟ ପାର୍କରେ ଚାରି ଥାକିଆ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା । ପୁଲିସ ସମ୍ପୂର୍ଣ୍ଣ ସଜାଗ ଥିବା ବେଳେ ଗରଦପୁର ବ୍ଲକ୍ ଅଧ୍ୟକ୍ଷଙ୍କ ନେତୃତ୍ୱରେ ଶତାଧିକ ସମର୍ଥକ ଏକ ପଟୁଆରରେ ଆସି ଶଙ୍ଖ ଭବନ ଆଗରେ ପହଞ୍ଚିଥିଲେ । ପାଖାପାଖି ଦେଢ଼ଘଣ୍ଟା କାଳ ଶଙ୍ଖଭବନକୁ ଘେରି ରହିଥିଲେ । ବିଧାୟକ ନିଦେ୍ର୍ଦାଷ ଏବଂ ତାଙ୍କ ବିରୋଧରେ ଚକ୍ରାନ୍ତ କରାଯାଇଛି ବୋଲି ଗଣମାଧ୍ୟମ ଆଗରେ ପ୍ରତିକ୍ରିୟା ଦେଇଥିଲେ । ଅରବିନ୍ଦଙ୍କ ଉପରୁ ନିଲମ୍ବନ ତୁରନ୍ତ ପ୍ରତ୍ୟାହାର କରିବାକୁ ଦାବି କରିଥିଲେ । ସଭାପତିଙ୍କୁ ଭେଟି ଏହି ଦାବି ଜଣାଇବେ ବୋଲି ଜିଦ୍ କରିଥିଲେ ।
କୌଣସି ଅପ୍ରୀତିକର ପରିସ୍ଥିତି ଆଶଙ୍କାରେ ଶଙ୍ଖଭବନରେ ଉପସ୍ଥିତ ଦଳର ଦୁଇ ବରିଷ୍ଠ ନେତା ଦେବୀ ପ୍ରସାଦ ମିଶ୍ର ଓ ପ୍ରତାପ ଜେନା ସେମାନଙ୍କର ଏକ ପ୍ରତିନିଧି ଦଳକୁ ଆଲୋଚନା ପାଇଁ ଡାକିଥିଲେ । ପ୍ରାୟ ଅଧଘଣ୍ଟା ଧରି ଆଲୋଚନା ହୋଇଥିଲା । ବାହାରକୁ ଆସି ପ୍ରତିନିଧିଦଳ ଗଣମାଧ୍ୟମକୁ ପ୍ରତିକ୍ରିୟା ଦେଇଥିଲେ । ଆଲୋଚନା ସକରାତ୍ମକ ଥିଲା ଏବଂ ଅରବିନ୍ଦଙ୍କ ଉପରୁ ନିଲମ୍ବନ ଆଦେଶର ପୁନର୍ବିଚାର ପାଇଁ ପ୍ରତିଶ୍ରୁତି ପାଇଥିବା କହିଥିଲେ । ବରିଷ୍ଠ ନେତାଦ୍ୱୟ ପୁନର୍ବିଚାର ପାଇଁ ସମୟ ମାଗିଛନ୍ତି ଏବଂ ସଭାପତିଙ୍କ ସହ ଆଲୋଚନା କରିବା ପରେ ନିଷ୍ପତ୍ତି ନିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି ।
ଏହା ପରେ ବି ସମର୍ଥକମାନଙ୍କର ମନ ବୁଝି ନ ଥିଲା । ସଭାପତିଙ୍କୁ ଭେଟିବାକୁ ସେମାନେ ନବୀନ ନିବାସ ଆଡ଼କୁ ଅଗ୍ରସର ହୋଇଥିଲେ । ତେବେ ଫରେଷ୍ଟ ପାର୍କ ଛକରେ ପୁଲିସ କର୍ଡନ ଯୋଗୁଁ ଅଟକି ଯାଇଥିଲେ । ପୁଲିସ ସୁରକ୍ଷା ବଳୟ ଭେଦି ଆଗକୁ ଯିବା ସେମାନଙ୍କ ପକ୍ଷେ ସମ୍ଭବ ହୋଇ ନ ଥିଲା ।
ଟାର୍ଗେଟ୍ ରେ ଅତନୁ
ଅରବିନ୍ଦ ମହାପାତ୍ରଙ୍କ ସମର୍ଥନରେ ଆସିଥିବା ବିଜେଡି କର୍ମୀମାନଙ୍କର ଟାର୍ଗେଟ୍ ରେ ଥିଲେ ପୂର୍ବତନ ମନ୍ତ୍ରୀ ଅତନୁ ସବ୍ୟସାଚୀ ନାୟକ । ଅରବିନ୍ଦଙ୍କୁ ବିଜେଡିରୁ ନିଲମ୍ବନ ପାଇଁ ଅତନୁ ଦାୟୀ ବୋଲି ସେମାନେ କହିଥିଲେ । ଅତନୁଙ୍କ କଥାରେ ପଡ଼ି ନବୀନ ବାବୁ ଏହି ନିଷ୍ପତ୍ତି ନେଇଛନ୍ତି ବୋଲି ବିଷୋଦଗାର କରିଥିଲେ । ସେମାନଙ୍କର ଅଭିଯୋଗ, ବିଜୟ ମହାପାତ୍ରଙ୍କ ଉପରେ ଥିବା ରାଗ ତାଙ୍କ ପୁଅ ଅରବିନ୍ଦଙ୍କ ଉପରେ ସୁଝାଇଛନ୍ତି । ବିଧାୟକ ଭାବେ ଅରବିନ୍ଦଙ୍କର ପ୍ରଦର୍ଶନ ଭଲ । ମାତ୍ର ତାଙ୍କୁ ଦୁର୍ନୀତିଗ୍ରସ୍ତ ଓ ବିଶ୍ୱାସଘାତକ ବୋଲି ଅତନୁ କହିଛନ୍ତି । ନବୀନ ବାବୁଙ୍କୁ ଉସକାଇ ନିଲମ୍ବନ କରାଇଛନ୍ତି । ନବୀନ ବାବୁ ଏହାର ପୁନର୍ବିଚାର କରିବାକୁ ସେମାନେ ଦାବି କରିଥିଲେ । ନଚେତ୍ ନବୀନଙ୍କ ହାତଛାଡ଼ି ଦେବେ ବୋଲି ଚେତାବନୀ ଦେଇଥିଲେ ।
