ଭୁବନେଶ୍ୱର: ଓଡ଼ିଶା ଡିଜିପି ନିଯୁକ୍ତି ମାମଲାକୁ ନେଇ ଆଜି ସୁପ୍ରିମକୋର୍ଟରେ ହେବାକୁ ଥିବା ଶୁଣାଣି ହୋଇନାହିଁ । ସେପ୍ଟେମ୍ବର ୨ ତାରିଖକୁ ତାହା ଘୁଞ୍ଚାଇ ଦିଆଯାଇଛି । ଆଜି ରାଜ୍ୟ ସରକାର କେବଳ ତାଙ୍କର ପକ୍ଷ ରଖିଥିଲେ । ମୁଖ୍ୟ ବିଚାରପତି ଜଷ୍ଟିସ୍ ସୂର୍ଯ୍ୟକାନ୍ତଙ୍କ ବେଞ୍ଚ ରାଜ୍ୟ ସରକାରଙ୍କ ପକ୍ଷ ଶୁଣିଲା ପରେ ଆଜି କୌଣସି ଶୁଣାଣି ନ କରି ସେପ୍ଟେମ୍ବର ୨ ପରବର୍ତ୍ତୀ ଶୁଣାଣି ତାରିଖ ଘୋଷଣା କରିଥିଲେ ।
ଓଡ଼ିଶା ଡିଜିପି ନିଯୁକ୍ତି ପ୍ରକ୍ରିୟାକୁ ନେଇ ସୁପ୍ରିମକୋର୍ଟରେ ଏକ ଜନସ୍ୱାର୍ଥ ମାମଲା ରୁଜୁ ହୋଇଛି । ଅଗଷ୍ଟ ୧୩ରେ ୟୁପିଏସସି ଚୟନ କମିଟିର ବୈଠକ ବସି ନୂଆ ବରିଷ୍ଠତା ତାଲିକା ଉପରେ ମୋହର ବଜାଇବାର ଥିଲା । ଏ ସମ୍ପର୍କରେ ଆବେଦନକାରୀଙ୍କ ଓକିଲ ପି. ଚିଦାମ୍ବରମ୍ ପ୍ରଧାନ ବିଚାରପତିଙ୍କ ଜରୁରୀ ଦୃଷ୍ଟି ଆକର୍ଷଣ କରିଥିଲେ । ୨୦୦୬ ମସିହା ପ୍ରକାଶ ସିଂ ମାମଲାରେ ସୁପ୍ରିମକୋର୍ଟଙ୍କ ଗାଇଡଲାଇନ୍ ଉଲ୍ଲଂଘନ କରାଯାଇ ଓଡ଼ିଶାରେ ଡିଜିପି ଚୟନ ପ୍ରକ୍ରିୟା ଚାଲିଥିବା ସେ ଜଣାଇଥିଲେ । ଓଡ଼ିଶା ସରକାରଙ୍କ ପକ୍ଷରୁ ଆଡଭୋକେଟ୍ ଜେନେରାଲ୍ ପୀତାମ୍ବର ଆଚାର୍ଯ୍ୟ ଅଭିଯୋଗକୁ କପୋଳକଳ୍ପିତ କହିଥିଲେ ।
ପ୍ରଧାନ ବିଚାରପତି ଜଷ୍ଟିସ୍ ସୂର୍ଯ୍ୟକାନ୍ତ ଏହା ଉପରେ ଆମିକସକ୍ୟୁରୀ ଭାବେ କାର୍ଯ୍ୟ କରୁଥିବା ବରିଷ୍ଠ ଆଇନଜୀବୀ ରାଜୁ ରାମଚନ୍ଦ୍ରନଙ୍କ ମତାମତ ଲୋଡ଼ିଥିଲେ । ସେ ଚିଦାମ୍ବରମଙ୍କ ଯୁକ୍ତିକୁ ସମର୍ଥନ କରିବା ପରେ ମୁଖ୍ୟ ବିଚାରପତି ୟୁପିଏସସି ବୈଠକକୁ ଅଟକାଇବା ସହ ପରବର୍ତ୍ତୀ ନିଷ୍ପତ୍ତି ପର୍ଯ୍ୟନ୍ତ ଡିଜିପି ନିଯୁକ୍ତି ପ୍ରକ୍ରିୟା ଉପରେ ରୋକ୍ ଲଗାଇଥିଲେ ।
