ରାହୁଲ ଗାନ୍ଧୀଙ୍କ ଧକ୍କାରେ ତଳେ ପଡ଼ିଗଲି- ପ୍ରତାପ
ସିସିଟିଭି ଫୁଟେଜ୍ ଦେଖାଅ- ରାହୁଲ
ନୂଆଦିଲ୍ଲୀ: ଆମ୍ବେଦକରଙ୍କୁ ନେଇ ଗୃହମନ୍ତ୍ରୀ ଅମିତ ଶାହାଙ୍କ ଟିପ୍ପଣୀକୁ ଇଣ୍ଡି ମେଣ୍ଟ ର ବିରୋଧ ପରିପ୍ରେକ୍ଷୀରେ ଆଜି ଏକ ବଡ଼ ଅଘଟଣ ଘଟିଛି । ପାର୍ଲିଆମେଣ୍ଟର ପ୍ରବେଶ ପଥରେ କଂଗ୍ରେସ ଓ ବିଜେପି ସାଂସଦଙ୍କ ଠେଲାପେଲା ଯୋଗୁଁ ତଳେ ପଡ଼ି ଆହତ ହୋଇଛନ୍ତି ବାଲେଶ୍ୱର ସାଂସଦ ପ୍ରତାପ ଷଡ଼ଙ୍ଗୀ । ମୁଣ୍ଡ ଫାଟି ଯାଇଛି । ୟୁପି ଫାରୁକାବାଦର ବିଜେପି ସାଂସଦ ମୁକେଶ ରାଜପୁତ ମଧ୍ୟ ଏଥିରେ ଆହତ ହୋଇଛନ୍ତି । ଉଭୟଙ୍କୁ ରାମ ମେନାହର ଲୋହିଆ ହସ୍ପିଟାଲରେ ଭର୍ତ୍ତି କରାଯାଇଛି । ଆଇସିୟୁରେ ସେମାନଙ୍କର ଚିକିତ୍ସା ଚାଲିଛି ।
ଗୃହମନ୍ତ୍ରୀ ଅମିତ ଶାହା ଗତକାଲି ସଂସଦ ବିତର୍କରେ ଆମ୍ବେଦକରଙ୍କ ଉପରେ ଦେଇଥିବା ଟିପ୍ପଣୀକୁ ଇଣ୍ଡି ମେଣ୍ଟ ପକ୍ଷରୁ ପ୍ରବଳ ବିରୋଧ ଜାରି ରହିଛି । ସମ୍ବିଧାନ ପ୍ରଣେତାଙ୍କ ପ୍ରତି ଅପମାନସୂଚକ ମନ୍ତବ୍ୟ ପାଇଁ ରାହୁଲ ଗାନ୍ଧୀଙ୍କ ନେତୃତ୍ୱରେ ଇଣ୍ଡି ମେଣ୍ଟର ସାଂସଦମାନେ ଗୃହମନ୍ତ୍ରୀଙ୍କ ଇସ୍ତଫା ଦାବିରେ ଆଜି ସଂସଦ ବାହାରେ ଆମ୍ବେଦକରଙ୍କ ପ୍ରତିମୂର୍ତ୍ତି ତଳେ ଧାରଣା ଦେଇଥିଲେ । ସେଠାରୁ ଏକ ଶୋଭାଯାତ୍ରାରେ ସଂସଦ ଗୃହକୁ ଯିବାକୁ ବାହାରିଥିଲେ । ଏହି ସମୟରେ ବିଜେପି ନେତୃତ୍ୱରେ ଏନଡିଏ ସାଂସଦମାନେ ସେମାନଙ୍କ ବିରୋଧରେ ଏକତ୍ରିତ ହୋଇଥିଲେ । ଆମ୍ବେଦକରଙ୍କ ପ୍ରତି ଅପମାନସୂଚକ ମନ୍ତବ୍ୟ ଦେଇଥିବାରୁ ସେମାନେ ଓଲଟି କଂଗ୍ରେସଠାରୁ କ୍ଷମା ଦାବି କରିଥିଲେ ।
ପାର୍ଲିଆମେଣ୍ଟର ପ୍ରବେଶ ପଥ ମକର ଦରରେ ଏନଡିଏ ସାଂସଦମାନଙ୍କ ସହ ଇଣ୍ଡି ମେଣ୍ଟ ସାଂସଦମାନଙ୍କର ମୁହାଁମୁହିଁ ହୋଇଥିଲା । ଉଭୟ ପକ୍ଷରୁ ସ୍ଲୋଗାନବାଜି ସହ ଜୋରରେ ଠେଲାପେଲା ହୋଇଥିଲା । ଏଥିରେ ପ୍ରତାପ ଷଡ଼ଙ୍ଗୀ ସିଡିରୁ ତଳକୁ ଖସିପଡ଼ିଥିଲେ । ତାଙ୍କ ଉପରେ ପଡ଼ିଥିଲେ ମୁକେଶ ରାଜପୁତ ।
ରାହୁଲ ଗାନ୍ଧି ଠେଲିଦେବାରୁ ସେ ତଳେ ପଡ଼ିଗଲେ ବୋଲି ପ୍ରତାପ ଷଡ଼ଙ୍ଗୀଙ୍କ ଅଭିଯୋଗ ପରେ ନିଆଁ ଲାଗିଯାଇଛି । ବିଜେପି ସାଂସଦମାନେ ରାହୁଲଙ୍କୁ ଟାର୍ଗେଟ୍ କରିଛନ୍ତି । ରାହୁଲଙ୍କ ବିରୋଧରେ ଏତଲା ଦେଇଛନ୍ତି । ଅପରପକ୍ଷରେ ବିଜେପି ସାଂସଦମାନଙ୍କର ଆକ୍ରମଣରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଆହତ ହୋଇଥିବା ଅଭିଯୋଗ ଆଣି କଂଗ୍ରେସ ପକ୍ଷରୁ ପାଲଟା ଏତଲା ଦିଆଯାଇଛି । ଏହାକୁ ନେଇ ଉଭୟ ପକ୍ଷ ମଧ୍ୟରେ ଆରୋପ ପ୍ରତ୍ୟାରୋପ ଜାରି ରହିଛି । ସିସିଟିଭି ଫୁଟେଜ୍ ଖୋଲି ପ୍ରକୃତ ଘଟଣା କ’ଣ ଦେଶବାସୀଙ୍କୁ ଜଣାଇବାକୁ ରାହୁଲ ଗାନ୍ଧୀ ଦାବି କରିଛନ୍ତି ।
